﻿Ilawiyyen.
8.
Issiweř SIDI ak-d Musa, inna: 
“Ksi Harun jmiɛ ak-d warraw nnes d warruḍ d zzect i wedhan d ufunas ameẓyan n tɣarṣt n ddenb d tnayen n icarriyyen d tsuǧet s weɣrum břa antun, 
u řaɣa i marra tamesmunt ɣar wadaf n Uqiḍun n Umsagar.” 
Igga Musa am mammec d as iweṣṣa SIDI uca tmun tmesmunt ɣar wadaf n Uqiḍun n Umsagar. 
Inna Musa i tmesmunt: “Wa d min iweṣṣa SIDI ad ittwagg.” 
Musa issqarreb-dd Harun d warraw nnes uca issird i-ten s waman. 
Issars xas tcamir, ibyes as s tḥezzamt, issyarḍ as aseřham. Igga xas apalṭu uca ibyes as s tḥezzamt izewwqen n upalṭu uca iqqen as zzayes apaltu. 
Issemten xas tajmect uca igga iẓra n ‘Urim’ d ‘Tumim’ di tajmect. 
Igga areẓẓet x uzeǧif nnes uca ɣar zzat x areẓẓet igga tařwiḥt s nnuwwar n wureɣ n ttaj iqeddsen n weɛzař, am mammec yumur SIDI i Musa. 
Xenni iksi Musa zzect i wedhan uca idhen Tazeddiɣt d marra min dayes iǧan uca issqeddes marra aya. 
Irucc zzayes x uɛalṭar sebɛa n twařawin uca idhen ɛawed aɛalṭar d marra řeqcuɛ nnes uřa d tabanyut ak-d uḍar nnes maḥend ad ten issqeddes. 
Iseyyeb zzect i wedhan x uzeǧif n Harun uca idhen i-t, ḥima ad t issqeddes. 
Issqarreb-dd Musa arraw n Harun uca yarḍ asen tcamirat uca ibyes asen s tḥezzamin uca inneḍ asen ticuccay am mammec yumur SIDI i Musa. 
Issqarreb-dd afunas ameẓyan n tɣarṣt n ddenb uca Harun d warraw nnes ssarsen ifassen nsen x uzeǧif n ufunas ameẓyan n tɣarṣt n ddenb. 
Iɣarṣ as uca iksi Musa idammen uca igga cwayt zzaysen s uḍaḍ nnes x waccawen n uɛalṭar i iǧan ɣar marra iɣezdisen nnes uca ammu i issizdeg aɛalṭar. Xenni iseyyeb idammen ɣar uḍar n uɛalṭar. Ammu i issqeddes i-t i weṣřaḥ xas. 
Iksi marra tadunt nni iǧan x wadan d min yuyřen ɣar tsa d tnayen n tiẓẓař d tadunt nsent uca Musa issbexxar aya x uɛalṭar. 
Maca afunas ameẓyan d yiřem nnes d weysum nnes d amessař nnes, issarɣ i-ten barra i řmargeḥ n řɛeskar, am mammec yumur SIDI i Musa. 
Issqarreb-dd Musa icarri n tɣarṣt n wecmaḍ uca Harun d warraw nnes ssarsen ifassen nsen x uzeǧif n icarri. 
Iɣarṣ i icarri uca izeǧeɛ Musa idammen x uɛalṭar ɣar marra iɣezdisen nnes. 
Ibḍa icarri d iceǧiqen nnes uca issbexxar Musa azeǧif d iceǧiqen d tadunt. 
Issird adan d iḍaren s waman uca issbexxar Musa marra icarri x uɛalṭar, aqa d taɣarṣt n wecmaḍ s yict n řefwaḥet ittfuḥen, aqa d tawhibt n tmessi i SIDI, am mammec yumur SIDI i Musa. 
Issqarreb-dd xenni icarri nneɣni, icarri i udeccen, uca Harun d warraw nnes ssarsen ifassen nsen x uzeǧif n icarri. 
Uca iɣarṣ as uca iksi Musa cwayt zeg idammen uca igga i-ten x iɣes n umezzuɣ afusi n Harun u x uḍaḍ n yimez n ufus nnes afusi u x uḍaḍ n yimez n uḍar nnes afusi. 
Issqarreb-dd ɛawed arraw n Harun uca igga Musa cwayt zeg idammen x iɣes n umezzuɣ nsen afusi u x uḍaḍ n yimez n ufus nsen afusi u x uḍaḍ n yimez n uḍar nsen afusi uca izeǧeɛ Musa idammen iqqimen x uɛalṭar ɣar marra iɣezdisen nnes. 
Iksi tadunt d unewwar s tadunt d marra tadunt tenni iǧan x wadan d min yuyřen ɣar tsa d tnayen n tiẓẓař ak-d tadunt nsent uřa d acekrud afusi. 
Zi tsuǧet s weɣrum břa antun, tenni tuɣa zzat i wudem n SIDI, iksi ijj n řemsemmem břa antun d yict n temsemmemt isswejden s zzect d ict n teřfeft uca issars i-ten x tadunt u x ucekrud afusi. 
Igga marra man aya deg ifassen n Harun u deg ifassen n warraw nnes uca issenhezz aya am yict n tewhibt n wenhezzi zzat i wudem n SIDI. 
Awarni as iksi ten Musa ɛawed zeg ifassen nsen uca issbexxar i-ten x uɛalṭar, x tɣarṣt n wecmaḍ. Aqa d tiɣarṣa i udeccen s yict n řefwaḥet ittfuḥen, aqa d tawhibt n tmessi i SIDI. 
Iksi Musa idmaren uca issenhezz i-ten am yict n tewhibt n wenhezzi zzat i wudem n SIDI. Man aya d tasɣart n ucarri i udeccen, tenni iǧan i Musa, am mammec yumur SIDI i Musa. 
Iksi Musa cwayt n zzect i wedhan u n idammen i iǧan x uɛalṭar uca irucc man aya x Harun u x warruḍ nnes, x warraw nnes u x warruḍ n warraw nnes, inni akides iǧan. Ammu i issqeddes Harun d warruḍ nnes d warraw nnes d warruḍ n warraw nnes akides. 
Inna Musa i Harun u i warraw nnes: “Senwem aysum nni ɣar wadaf n Uqiḍun n Umsagar uca teccem t dinni s weɣrum nni iǧan di tsuǧet n tɣarṣa i udeccen, am mammec weṣṣiɣ necc, nniɣ: ‘Harun d warraw nnes ad t ccen.’ 
Min iceṭṭen n weysum d weɣrum, ad t tesscemḍen s tmessi. 
Zeg wadaf n Uqiḍun n Umsagar war zzayes dd-tᵉtteffɣem ca sebɛa n wussan, ař ass min di i ɣa kemmřen wussan n uřeqqem nwem, minzi netta ad kenniw yařeqqem sebɛa n wussan. 
Am mammec igga marra deg wass-a, ammu i iweṣṣa SIDI, maḥend ad xawem igg aṣřaḥ. 
Ad teqqimem ɣar wadaf n Uqiḍun n Umsagar, ass d ǧiřet, sebɛa n wussan uca ad tᵉṭṭfem aḥeṭṭu i SIDI, ḥima war tᵉttmettim ca, minzi ammu i t ttweṣṣiɣ necc.” 
Harun d warraw nnes ggin marra min d asen iweṣṣa SIDI s tsexxart n Musa. 
