﻿Ilawiyyen.
5.
“Mařa ixḍa ḥed umi isřa ahejji n ict n nneɛřet uca netta d acehhad xas, niɣ iẓra i-t niɣ issen i-t: mařa war xas iqqar walu, xenni ad yarbu řmuɛṣiyyet nnes. 
Niɣ mařa iḥada ḥed min ma zi tmesřact ixemjen, řxecbet n řmař ixmej, niɣ řxecbet n řebhimet ixemjen, niɣ řxecbet n umuddar ixmej ittbuɛen, uca netta war issin aya, aqa ixmej u dayes amarwas. 
Niɣ mařa iḥada ca n řexmej n bnadem, min ma zi řexmej nnes i zi idweř netta ixmej, mařa tennuffar xas uca issen it awarni as, aqa dayes amarwas. 
Niɣ mařa iẓẓuǧ ḥed s tcarfayeḥ nnes, maḥend ad igg řɣar niɣ ad igg řxar, niɣ min ma izemmar bnadem ad inṭeq amenni waha s ict n tjaǧit, am war tt issin, maca issen i-t awarni man aya, aqa dayes amarwas di ssibbet n ict zi tmesřayin-a. 
Xenni ad imsar, mařa dayes amarwas di ssibbet n icten zi tmesřayin-a, ad inɛem x min tuɣa ixḍa. 
X ddenb i igga, ittxeṣṣa as ad iqeddem ict n tewtemt n wuǧi d taɣarṣt n umarwas, ict n texsi niɣ ict n tɣayḍet, d taɣarṣt n ddenb i SIDI, uca akehhan ad xas igg aṣřaḥ di ssibbet n ddenb nnes. 
Maca mařa afus nnes war ɣares min iqedden i yijj zeg wuǧi, xenni ad yawi i SIDI i tɣarṣt n umarwas x ddenb i igga, tnayen n tejlilliḥin niɣ tnayen n idbiren imeẓyanen, ijjen i tɣarṣt n ddenb u ijjen i tɣarṣt n wecmaḍ. 
Ad ten yawi ɣar ukehhan, wenni dd ɣa yawyen d amezwaru tajlilliḥt niɣ aḍbir i iǧan i tɣarṣt n ddenb uca ad ikkes azeǧif nnes zi cwayt awarni yiri nnes, maca war t ibeṭṭi marra. 
Ad irucc cwayt n idammen ɣar uɣezdis n uɛalṭar uca min iceṭṭen zeg idammen, ad t iẓemm ɣar uḍar n uɛalṭar. Aqa-tt d taɣarṣt n ddenb. 
Ad issewjed ameddar nneɣni am tɣarṣt n wecmaḍ ɛlaḥsab lfariḍa uca ammu i xas i ɣa yegg ukehhan aṣřaḥ x ddenb nnes i igga uca ad as ittwaɣfar. 
Mařa afus nnes war ɣares min iqedden i tnayen n tejlilliḥin niɣ i tnayen n idbiren imeẓyanen, xenni wenni ixḍan, ad yawi am tewhibt nnes taɛcart n ijj n ifa n waren azdad d tawhibt n ddenb. War xas ittegg zzect uřa war xas issrusi jjawi, minzi aqa-tt d taɣarṣt n ddenb. 
Ad tt yawi ɣar ukehhan uca akehhan ad zzayes iksi ijj n wuru iccur uca ad issbexxar aya am řidaret dayes x uɛalṭar, x tewhibin n tmessi i SIDI. Aqa-tt d taɣarṣt n ddenb. 
Ammu i xas ɣa yegg ukehhan aṣřaḥ x ddenb nnes nni igga zi jjihet n icten zi tmesřayin-a uca ad as ittwaɣfar. Min iceṭṭen ad yiři i ikehhanen am mammec i yeǧan ak-d tewhibt n řɣiǧet.” 
Issiweř SIDI ak-d Musa, inna: 
“Mařa igga ḥed s řeɣdar uca ixḍa s uweddar di tmesřayin iqeddsen n SIDI, ittxeṣṣa ad yawi icarri icnan qaɛ zeg wuǧi d taɣarṣt n umarwas i SIDI. Ad tiři řqimet nnes ɛlaḥsab řqimet i tqeddared cek deg iciqluten n nnuqart ɛlaḥsab ciqlu n Zzawect Iqeddsen. Aqa d taɣarṣt n umarwas. 
Zi tmesřayin iqeddsen ad yarr di min di ixḍa qbeř, uca ad dayes yarni řexmus. Uca ad iwc man aya i ukehhan uca akehhan ad t isseṣřeḥ s icarri n tɣarṣt n umarwas uca ad as ittwaɣfar. 
Mařa ixḍa ḥed uca igga ict n tmesřact i war tᵉttcuwwar ad tᵉttwagg, am dd-iffeɣ deg ict n tmesřact zi tweṣṣa n SIDI, uca tuɣa tnuffar xas, ad dayes yiři umarwas uca ad yarbu řmuɛṣiyyet nnes. 
Ad yawi ijj n icarri icnan qaɛ zeg wuǧi ɣar ukehhan i tɣarṣt n umarwas, ad tiři řqimet nnes ɛlaḥsab řqimet i tqeddared cek uca ad t isseṣřeḥ ukehhan x uweddar nnes i di iweddar am war t issin uca ad as ittwaɣfar. 
Aqa d taɣarṣt n umarwas. S tidett tuɣa dayes amarwas zzat i SIDI.” 
Issiweř SIDI ak-d Musa, inna: 
“Mařa ixḍa ḥed uca iɣdar SIDI am issxarriq x jjar nnes x min d as immewcen, maḥend ad t iḥḍa, niɣ x min ijja deg ufus nnes, niɣ x min xas yucaren, niɣ x ca n ubeɛɛej i igga i jjar nnes, 
niɣ am issxarriq x ca min iweddaren i ca n yijjen u ittwaf zzayes uca xenni netta ijjuǧ ẓur, wah, am issxarriq netta x icten zi marra timesřayin nni ittegg bnadem ařami ixeṭṭa s man aya, 
xenni ittxeṣṣa, umi ixḍa uca idweř dayes umarwas, aqa netta ad dd-yarr tuceffart nni yucar, niɣ min ittwakksen nni iksi netta s uɣiř, niɣ min tuɣa iḥḍa nni d as immewcen maḥend ad tt iḥḍa, niɣ min iweddaren nni yufa. 
Uca marra min xef ijjuǧ ẓur, ad dd-yarr řqimet nnes tmun uca ad yarni řexmus. Netta ad t iwc i wenni umi dd-tusa deg wass n tɣarṣt nnes n umarwas. 
Netta ad yawi taɣarṣt nnes n umarwas ɣar SIDI, ijj n icarri icnan qaɛ zeg wuǧi, wenni řqimet nnes ad tiři ɛlaḥsab řqimet i tqeddared cek, ad tiři d taɣarṣt n umarwas, uca ad t yawi ɣar ukehhan. 
Xenni akehhan ad xas igg asřaḥ zzat i wudem n SIDI uca ad as ittwaɣfar x min igga, mařa idweř dayes amarwas s ict n tmesřact zi marra timesřayin-a.” 
