﻿Uffuɣ.
35.
Musa issmun marra tamesmunt n ayt n Israil uca inna asen: “Ina d awařen nni yumur SIDI, ḥima ad ten teggem. 
Setta n wussan ad tegged řxedmet u ass wiss sebɛa ad awem yiři iqeddes, aqa d ssebt, arraḥet tmun i SIDI. Kuř ijj, wenni dayes iggin ca n řxedmet, ad ittwaneɣ. 
War tessruɣim kenniw timessi di marra tizeddiɣin nwem deg wass n ssebt.” 
Issiweř Musa ak-d marra tamesmunt n ayt n Israil, inna: “D wa d min iweṣṣa SIDI, umi inna: 
‘Ksim zi min ɣarwem ict n tewhibt n usgeɛɛed i SIDI. Kuř ijj, wenni umi yennurzem wuř nnes, ad tt yawi, aqa-tt d tawhibt n usgeɛɛed i SIDI: ureɣ d nnuqart d nnḥas, 
afiřu adeḥmi d urjuwani d uzeggʷaɣ iḥedqen d řeqṭen azdad d ccɛar n iɣayḍen, 
iřmawen izeggʷaɣen n icarriyyen d iřmawen n ddenfiřat d ukeccuḍ n ukasiya, 
zzect i tfawt, řeɛṭur i zzect n wedhan u i řebxur ittfuḥen, 
iẓra n uniks d iẓra iɣřan nneɣni, maḥend ad ten ggen x upalṭu u x tejmect. 
Marra inni iǧan jar awem s wuř d amiɣis, ad dd-asen ad ggen marra min yumur SIDI: 
Tazeddiɣt, Aqiḍun nnes d tseqqaft nnes d tsennarin nnes d tfeřwin nnes d tḥenya nnes n uɛarreḍ d ipilaren nnes d tyarsawin nnes, 
d Ttabut ak-d iɛumad nnes i tarebbut d tqebbart n weṣřaḥ d uřeḥḥaf i dduri, 
d tzewḍa ak-d iɛumad nnes i tarebbut d marra řeqcuɛ nnes d weɣrum n wescan, 
d řqendiř i tfawt d řeqcuɛ nnes d teftiřin nnes d zzect i tfawt 
d uɛalṭar n řebxur ak-d iɛumad nnes i tarebbut d zzect i wedhan d řebxur ittfuḥen d arwaq n wadaf ɣar wadaf n Tzeddiɣt, 
d uɛalṭar n wecmaḍ d tracca nnes n nnḥas d iɛumad nnes i tarebbut d marra řeqcuɛ nnes d tbanyut s uḍar nnes, 
d řizarat n řemraḥ, ipilaren nnes ak-d tyarsawin nsen d arwaq i wadaf n řemraḥ, 
d řewtad n Tzeddiɣt d řewtad n řemraḥ d ifiřan nsen, 
arruḍ i řxedmet deg Uqeddas, arruḍ iqeddsen n ukehhan Harun d warruḍ n warraw nnes, maḥend ad xedmen am yikehhanen.’” 
Xenni ffɣen nitni, marra tamesmunt n ayt n Israil, ggʷejen zi zzat n uɣembub n Musa. 
Xenni yusa-dd kuř ijj, wenni umi inhezz wuř nnes, u marra wenni umi innurzem buḥbeř nnes, uca iwyen-dd nitni tawhibt n usgeɛɛed, tenni ssgeɛɛden nitni ɣar SIDI, d tenni i ɣa yiřin i Uqiḍun n Umsagar u i tsexxart i dayes u i warruḍ iqeddsen. 
Ammu dd-usin iryazen jmiɛ ak-d temɣarin, marra inni umi innurzem wuř nsen uca iwyen-dd timessakin d texrazin n umezzuɣ d tinzar d txudan n ucemmiɛ d tseddiyin s wedmam n wureɣ d marra řeqcuɛ n wureɣ, wah, kuř ijjen yiwi ict n tewhibt n wenhezzi n wureɣ i SIDI. 
Marra wi ɣar ittwaf afiřu adeḥmi d urjuwani d uzeggʷaɣ iḥedqen niɣ řeqṭen azdad niɣ ccɛar n iɣayḍen niɣ iřmawen izeggʷaɣen n icarriyyen niɣ iřmawen n ddenfiřat, iwyen-dd man aya. 
Marra wi issgeɛɛden tawhibt n nnuqart niɣ n nnḥas, iwyen tawhibt-a n usgeɛɛed ɣar SIDI, d marra wi ɣar ittwaf ukeccuḍ n ukasiya i marra řxedmet n tsexxart, iwyen man aya. 
Marra timɣarin s wuř amiɣis ttqarḍcent s ifassen nsent uca nitenti iwyent-i-dd min qareḍcent: afiřu adeḥmi d urjuwani d uzeggʷaɣ iḥedqen d řeqṭen azdad.    
Marra timɣarin nni umi inhezz wuř nsent s tiɣit, qareḍcent ccɛar n iɣayḍen. 
Řḥukkam iwyen-dd iẓra n uniks d iẓra iɣřan nneɣni, ḥima ad ten ggen x upalṭu u x tejmect, 
řeɛṭur d zzect i tfawt d zzect i wedhan u i řebxur ittfuḥen. 
Ayt n Israil wcin s řxaḍar i SIDI, marra iryazen d temɣarin, inni umi inhezz wuř nsen, maḥend ad wcen s řxaḍar i marra řxedmet nni yumur SIDI, ḥima ad tᵉttwagg s tsexxart n Musa. 
Xenni inna Musa i ayt n Israil: “Xzarem, SIDI iřaɣa-dd i Baṣaliyil, mmis n Uri, mmis n Ḥur, zi řaǧ n Yahuda, s yisem nnes. 
Iccur i-t Arruḥ n AREBBI s tiɣit d řeɛqeř d tussna u s marra min ittxeṣṣan n tzemmar n ṣṣnayeɛ 
i uxemmem n ɛřam kuř ireqqamen, ḥima ad ten yegg s wureɣ d nnuqart d nnḥas, 
u i uneqqac n iẓra iɣřan d usarsi nsen, u i uneqqac n ukeccuḍ u ḥima ad igg marra ireqqamen s lfenn. 
Igga Arebbi deg wuř nnes tawengit i useřmed, deg wuř nnes u deg wuř n Ahuliyab, mmis n Axisamak, zi řaǧ n Dan. 
Iccur i-ten s tiɣit n wuř, maḥend ad ggen marra řxedmet: řxedmet n taneqqact d warcam d umudi s ufiřu adeḥmi d urjuwani d uzeggʷaɣ iḥedqen d řeqṭen azdad uřa d řxedmet n uxeyyaḍ.” Nitni ggin kuř řxedmet u ttsaqaren arcamen s lfenn. 
