﻿Uffuɣ.
31.
Issiweř SIDI ak-d Musa, inna: 
“Xzar, Necc řaɣiɣ-dd x Baṣaliyil, mmis n Uri, mmis n Ḥur, zi teqbič n Yahuda s yisem nnes. 
Ccureɣ t s Arruḥ n AREBBI, s tiɣit, s řeɛqeř, s tussna u s marra min ittxeṣṣan n tzemmar n ṣṣnayeɛ, 
ḥima ad ixemmem ireqqamen s lfenn, maḥend ad ten tteggen s wureɣ d nnuqart d nnḥas, 
u ḥima ad neqcen iẓra iɣřan maḥend ad ten ggen di tcuyar nsen, u ḥima ad neqcen akeccuḍ, ḥima ammu i ɣa ggen marra řxedmet. 
Aqa Necc ggiɣ akides Ahuliyab, mmis n Axisamak, zi řaǧ n Dan. Deg wuř n marra inni ɣar iǧa wuř d amiɣis, ggiɣ tiɣit. Nitni ad ggen marra min xef weṣṣiɣ: 
Aqiḍun n Umsagar, Ttabut n Cchadet, taqebbart n weṣřaḥ nni xas iǧan, u marra řeqcuɛ n Uqiḍun: 
tazewḍa ak-d marra řeqcuɛ nnes, d řqendiř iṣfan s marra řeqcuɛ nnes d uɛalṭar n řebxur, 
aɛalṭar n wecmaḍ ak-d marra řeqcuɛ nnes d tbanyut s uḍar nnes, 
arruḍ n tsexxart d warruḍ iqeddsen n Harun, akehhan, d warruḍ n warraw nnes, maḥend ad sexxaren am ukehhan, 
d zzect i wedhan, d řebxur ittfuḥen i Zzawect Iqeddsen. Ɛlaḥsab marra minzi cek umureɣ ad ggen marra aya.” 
Issiweř SIDI ak-d Musa, inna: 
“Cek, siweř ak-d ayt n Israil, ini: ‘Ad teḥḍam ussan n ssebt inu, minzi ssebt d řeɛřamet jar ayi d kenniw, i marra jjiřat nwem, ḥima ad tessnem belli Necc d SIDI, wenni kenniw issqeddsen. 
Ḥḍam ass n ssebt, minzi iqeddes i iǧa i kenniw! Wenni t ɣa issfesden, ad t nɣen nican, minzi man wen i dayes ɣa iggin ca n řxedmet, ad ittwaqḍeɛ zi řwesṭ n řgens nnes.    
Setta n wussan ad tegged řxedmet uca deg wass wiss sebɛa ad yiři d ssebt, arraḥet tmun, tqeddes i teǧa i SIDI! Kuř ijj, wenni iggin ca n řxedmet deg wass n ssebt, ad t nɣen nican. 
Ayt n Israil ad ḥḍan ass n ssebt, ad ḥḍan ssebt di marra jjiřat nsen am ijj n Řɛahd i řebda. 
Ad tiři d ict n řeɛřamet jar ayi d ayt n Israil, minzi di setta n wussan igga SIDI ajenna d temmurt u deg wass wiss sebɛa yareyyeḥ, yarra nnefs.” 
Řami ikemmeř SIDI awař i kides issiwřen x wedrar n Sina, iwca i Musa tnayen n teřwiḥin n Cchadet. Tuɣa tiřwiḥin nni zeg weẓru, ttwarint s uḍaḍ n AREBBI. 
