﻿Uffuɣ.
23.
“War ssuffuɣ řexbar issxarriqen. War ttic afus nnec i uɛeffan, maḥend ad tiřid d acehhad n ddeǧ. 
War areddef azyen ameqqran di řɣar u war dd-ttarri di ddeɛwet ař ɣa tmeyyřed teggʷejed x řḥeqq awarni i waṭṭas, ad tfarɣed řḥeqq. 
Di ddeɛwet nnes war ttriḥ ca ak-d řmeskin. 
Mařa teřqid afunas niɣ aɣyuř iweddar n řeɛdu nnec, ittxeṣṣa ad as t tarred nican. 
Mařa teẓrid aɣyuř n wenni tcarrhed iwḍa s ddqeř nnes, ittxeṣṣa cek ad teḥḍid ixef nnec ad tejjed tamesřact i netta waha, maca cek d netta jmiɛ ad tfekkem aɣyuř qaɛ. 
War sfarraɣ tasɣart n umezřuḍ i din ɣarek di ddeɛwet nnes. 
Beɛɛed x tmesřact iɣeccen. War neqq afurri niɣ amsegged, minzi Necc war ttbarriɣ aɛeffan. 
War kessi tarzeft, minzi tarzeft tessdarɣař tiṭṭawin yarezmen u tessfarraɣ awařen n imseggden. 
War tzeyyarem x ubarrani. Aqa kenniw tessnem nnefs n ubarrani, minzi tuɣa kenniw d ibarraniyyen di temmurt n Miṣra. 
Setta n iseggʷusa ad tzarɛed tammurt nnec uca ad tessmuned řɣiǧet nnes. 
Deg useggʷas wiss sebɛa ad tt tejjed ad tareyyḥed uca ad as tarxud, ḥima ad zzayes ccen imezřaḍ n řgens nnec. Uca min ɣa jjen nitni ad zzayes ccen řmař n řexřa. Ammu i ɣa tegged ɛawed s umarjeɛ n uḍiř nnec d zzitun nnec. 
Di setta n wussan ad tegged řxedmet nnec u deg wass wiss sebɛa ad tareyyḥed, maḥend ad yareyyeḥ ufunas nnec d weɣyuř nnec u ad yarr nnefs mmis n tayya nnec d ubarrani.” 
Di marra min d awem nniɣ, ḥḍam t. War ttidarem isem n irebbiten nneɣni. War ttesřan isem nnes zeg uqemmum nnec. 
Třata n twařawin deg useggʷas ad ayi tɛeyydem ijj n řɛid. 
Řɛid n Weɣrum břa Antun ad t teḥḍam. Sebɛa n wussan ad tecced aɣrum břa antun, am mammec kenniw umureɣ Necc, di řweqt ittwaggen deg uyur Abib, minzi dayes i dd-teffɣed zi Miṣra. War dd-ttusim s ifassen xwan zzat i wudem inu. 
Ḥḍam ɛawed Řɛid n Tmeyra, Řɛid n Tmenzut n řxedmet nnec i tzarɛed deg iyyar, u Řɛid n Usmuni n ṣṣabet deg uneggar n useggʷas, xmi ɣa tessmuned řɣiǧet n řxedmet nnec zeg iyyar. 
Třata n twařawin deg useggʷas ad ḍharen marra iryazen n řgens nnec i wudem n Sidi, SIDI. 
War ttqeddam idammen n tɣarṣt inu ak-d min ixemmaren, u tadunt n tɣarṣt n řɛid inu war ttnusi ǧiřet tekmeř ař ṣṣbeḥ. 
Tamezwarut n tmenzut zeg wudem n temmurt nnec ad tt tawyed ɣar Taddart n SIDI, AREBBI nnec. War snenni iɣayḍ d ameẓyan s uɣi n yemmas. 
Xzar, ad ssekkeɣ ijj n lmalak zzat i wudem nnec, ḥima ad cek iḥḍa deg webrid uca ad cek yawi ɣar wemcan nni sswejdeɣ. 
Ḥḍa arendad i wudem nnes uca seř i wawař nnes, war xas ssarzig ca řeɛmar, minzi netta war ittekkes iɛeddiyen nwem, minzi Isem inu aqa-t dayes. 
Maca mařa s tidett ad tesřed i wawař nnes, ad tegged marra min d ac ɣa iniɣ, ad iřiɣ d řeɛdu i řɛedyan nnec uca ad ḥṣareɣ inni cek iḥeṣṣaren. 
Minzi lmalak inu ad yiři zzatek, ad cek ssidfeɣ di temmurt n Imuriyyen d Iḥittiyyen d Ifiriziyyen d ayt n Kenɛan d Iḥiwiyyen d Iyabusiyyen, u Necc ad ten teḥḥiɣ. 
War ttbendiq i irebbiten nsen niɣ ad ten tɛebded niɣ ad tegged am tteggen nitni, maca ad ten tᵉteḥḥid qaɛ uca ad tarẓed marra imayḍuten nsen iqeddsen. 
Ad tɛebdem SIDI, AREBBI nwem, u Netta ad ibarek aɣrum nnec d waman nnec. Necc ad kkseɣ řehřacat zi řwesṭ nnec. 
War ttiři temɣart nni umi iwḍa uɛeddis niɣ war ittirwen di temmurt nnec. Necc ad kemmřeɣ řqedd n wussan nnec. 
Ad ssekkeɣ anexřiɛ zzat i uɣembub nnec, ad ssxarewḍeɣ marra řgens i ɣa tafed deg webrid nnec uca ad arreɣ marra řɛedyan nnec ad xak arewřen. 
Necc ad ssekkeɣ irezzan zzat i uɣembub nnec, inni ɣa yaẓẓřen x Iḥiwiyyen d ayt n Kenɛan d Iḥittiyyen zzat i wudem nnec. 
War xasen ttaẓẓřeɣ zi zzat nwem deg ijj n useggʷas, maḥend war tᵉttɣimi temmurt d řexřa u řmař n řexřa war xak ttmarnin aṭṭas. 
S cway cway ad xasen aẓẓřeɣ zi zzat necc, ař ɣa temmarenyed deg waṭṭas uca ad tzemmared ad teksid tammurt d řwart. 
Necc ad ggeɣ iymiren zi Řebḥar n Telga ař řebḥar n Ifilisṭiniyyen u zi řexřa ař iɣzar n Lfuraṭ, minzi ad arreɣ imezdaɣ n temmurt deg ufus nnec uca ad cek arreɣ ad xasen taẓẓřed zi zzat nnec. 
War kidsen ttegg řɛahd niɣ ak-d irebbiten nsen. 
War iɛeddeř ad zedɣen di temmurt nnec, ḥima war cek ttarrin ad akidi texḍid. Mařa tɛebded i irebbiten nsen, ad ac yiři man aya d řfex i cek.” 
