﻿Uffuɣ.
13.
Issiweř SIDI ak-d Musa, inna: 
“Sqeddes ayi kuř amenzu, wenni zi jar ayt n Israil yarezmen řemřawet d amezwaru, am zeg iwdan am zi řebhayem. Netta aqa inu.” 
Inna Musa i řgens: “Idarem ass-a min di teffɣem zi Miṣra, zi taddart n tesmuɣi, minzi SIDI issuffeɣ-dd kenniw zzayes s ufus ijehden. Deg wass-a war tᵉttettem walu min di iǧa wentun. 
Ass-a ad teffɣem, deg uyur n Abib. 
Mařa SIDI issidef i cek ɣar temmurt n ayt n Kenɛan d Iḥittiyyen d Imuriyyen d Iḥiwiyyen d Iyabusiyyen, x tenni ijjuǧ i řejdud nwem ad ac tt iwc, tammurt ifeyyḍen s uɣi d tamment, xenni ad teḥḍam aɛbad-a n řidaret deg uyur-a. 
Sebɛa n wussan ad tecced aɣrum břa antun uca deg wass wiss sebɛa ad din yiři ijj n Řɛid i SIDI. 
Sebɛa n wussan ad ittwacc weɣrum břa antun uca war ɣarek ittwiffi min ixemmren. Di marra jjwayeh nnec war ittwifi wentun ɣarek. 
Deg wass nni ad tḥajid i mmic, ad as tinid: Man aya di ṭṭweɛ n min d ayi igga SIDI umi dd-ffɣeɣ zi Miṣra. 
Ad ac yiři am yijj n uceyyar x ufus nnec u i řidaret jar tiṭṭawin nnec, maḥend Ccariɛa n SIDI ad tiři deg uqemmum nnec, minzi s ufus ijehden issuffeɣ SIDI i kenniw zi Miṣra. 
S uya i ɣa teḥḍid tawsiyyet-a di řweqt nnes i d as ittwaggen, zeg useggʷas ɣar useggʷas. 
Ad yiři xmi cek ɣa issidef SIDI di temmurt n ayt n Kenɛan, am mammec i d ac ijjuǧ uřa i řejdud nnec, uca iwca ac tt, 
xenni ad tesseɛdud ɣar SIDI kuř amenzu i yarezmen řemřawet d amezwaru uřa d kuř amenzu n řebhayem i yarezmen řemřawet d amezwaru: iwetman ad iřin i SIDI. 
Maca kuř amenzu i yarezmen řemřawřet n weɣyuř d amezwaru, ad t tefdid s yijj zeg wuǧi. Mařa war t tefdid, ad as tarẓed iri. Kuř amenzu n bnadem zeg iḥenjiren nnec ad t tefdid. 
Uca ad imsar, xmi cek ɣa isseqsa mmic tiwecca, ad yini: ‘Manawya?’, ad as tinid: ‘Aqa issuffuɣ aneɣ-dd SIDI zi Miṣra s ufus ijehden, zi taddart n tesmuɣi. 
Řami d aneɣ ibedd firɛun deg webrid i wuffuɣ nneɣ, imsar aqa SIDI inɣa marra imenza di temmurt n Miṣra, zeg umenzu n bnadem ař amenzu n řebhimet. X uya qeddmeɣ kuř amenzu i yarezmen řemřawet d amezwaru d taɣraṣt i SIDI, maca kuř amenzu jar iḥenjiren inu, ad t fdiɣ. 
Ad yiři d aceyyar x ufus nnec d ijj n ufiřu n useggem jar tiṭṭawin nnec, minzi SIDI aqa issuffeɣ aneɣ-dd zi Miṣra s ufus ijehden.’” 
Umi ijja firɛun řgens ad iraḥ, war ten indih AREBBI ɣar webrid n temmurt n Ifilisṭiniyyen, waxxa nettat tudes, minzi AREBBI inna: “Maḥend war ittendemmi řgens xmi ɣa iẓar řbaruḍ uca ad dd-idweř ɣar Miṣra.” 
Indeh AREBBI řgens, maḥend ad ikk x webrid n řexřa ɣar Řebḥar n Telga. Uca geɛɛden ayt n Israil zi Miṣra wejden i umenɣi. 
Iksi Musa akides iɣsan n Yusuf, minzi netta issjuǧ ayt n Israil s ict n tẓaǧit, inna: “S tidett ad ɣarwem dd-yarzef AREBBI, uca ad tessgeɛɛdem iɣsan inu ssa akidwem!” 
Uca fesyen iqiḍan nsen, ggʷejen x Sukkut uca wtin iqiḍan nsen di Itam, ɣar ṭṭarf n řexřa. 
SIDI izwar i tiṭṭawin nsen deg uẓiř deg ijj n uqellij n useynu, maḥend ad ten igewwed deg webrid, u di ǧiřet deg ijj n uqellij n tmessi, ḥima ad ɣarsen igg tafawt, ḥima ad taf zemmaren ad uyuren ass d ǧiřet. 
Deg wass war dd-ikkis aqellij n useynu zzat i uɣembub n řgens uřa di ǧiřet war dd-ikkis aqellij n tmessi. 
