﻿Uffuɣ.
12.
Issiweř SIDI ak-d Musa d Harun di temmurt n Miṣra, inna: 
“Ayur-a ad awem yiři d azeǧif n iyuren. Ad awem yiři wa i kenniw d amezwaru n iyuren n useggʷas. 
Siweř ɣar marra tamesmunt n Israil, ini: ‘Deg wass wiss ɛecra ad iksi kuř ijj i yixef nnes ijj n yezmar x marra řaǧ n taddart i dd-iqqarṣen zeg ibabaten, ijj n yezmar x ict n taddart. 
Maca mařa raǧ n taddart tuɣa imẓi i yezmar, xenni ittxeṣṣa ad iksi ak-d wajjar nnes yudsen ɣar taddart nnes ɛlaḥsab řqedd n iwdan. Zi jjihet n yezmar ad tewtem řeḥsab i min ɣa yecc kuř ijjen. 
Ad yiři d izmar icnan qaɛ, awtem n ijj n useggʷas. Ad t teksim zeg iḥuřiyyen niɣ zeg iɣayḍen. 
Ad t txemmřem ař ass arbeɛṭac zeg uyur-a uca ad as iɣarṣ marra agraw n tmesmunt n Israil jar beddu n wezyen n wass ař dd-tewḍa tmeddit. 
Ad ksin ca zeg idammen uca ad t ggen x tnayen n řeḍruf i iǧan ɣar uɣezdis n tewwart u x tnebdat sennej i tewwart n tudrin mani t ɣa ccen. 
Ad ccen aysum di ǧiřet nni, aysum icennfen ɣar tmessi ak-d weɣrum břa antun. Ad t ccen s řebzar yarzeg. 
War t ttᵉttem ca d aziza niɣ yenwan deg waman, maca mɣir mařa ittwacennef di tmessi, ak-d uzeǧif nnes d iḍaren nnes d wadan nnes. 
War zzayes ttejjim walu ɣar ṣṣbeḥ, maca min zzayes ɣa iqqimen ɣar ṣṣbeḥ, ittxeṣṣa kenniw ad t tcemḍem di tmessi. 
Ammu i d awem ittxeṣṣa ad t teccem: tajɛinna nwem ad tiři tebyes, sandaliyat nwem deg iḍaren nwem u taɣɣarct nwem deg ufus nwem uca ad t teccem deɣya. Aqa-t d Taɣarṣt n Useɛdu n SIDI. 
Minzi di ǧiřet-a, Necc ad ɛduɣ x temmurt n Miṣra uca ad wteɣ kuř amenzu di temmurt n Miṣra, ammu deg iwdan uřa di řmař, uca ad ssiwḍeɣ řeḥkamat inu x marra irebbiten n Miṣra, Necc d SIDI! 
Uca idammen ad awem iřin d ict n řeɛřamet x tudrin mani tzeddɣem kenniw. Mařa ẓriɣ idammen, ad xawem ɛduɣ. War tᵉttiři jjriḥect ineqqen jar awem, xmi ɣa wteɣ tammurt n Miṣra. 
Ass-a ad awem yiři d ijj n wass i řidaret uca ad zzayes tɛeyydem i SIDI. Aqa-tt d ict n tewṣeyyet i řebda i marra jjiřat nwem, ḥima ad zzayes tɛeyydem. 
Sebɛa n wussan ad teccem aɣrum břa antun. Nican deg wass amezwaru ad tessuffɣem antun zi tudrin nwem, minzi man wen i ɣa iccen ca s wentun, zeg wass amezwaru ař ass wiss sebɛa, bnadem nni ad ittwaqess zi Israil. 
Deg wass amezwaru ad yiři ijj n umuni iqeddsen uca ɛawed deg wass wiss sebɛa ad din yiři ijj n umuni iqeddsen. Uřa d ict n řxedmet war tᵉttwagg ca deg wussan nni. Mɣir min ɣa yecc kuř ijj, d man aya waha iɛeddeř ad zzaywem ittwassewjed. 
Ad teḥḍam Řɛid n Weɣrum břa Antun, minzi deg wass nni aqa ssuffɣeɣ-dd kenniw zi temmurt n Miṣra. Ad teḥḍam ass-a di marra jjiřat nwem, aqa-tt d ict n tewṣeyyet i řebda. 
Deg uyur amezwaru, deg wass wiss arbeɛṭac n uyur, di ǧiřet, ad teccem aɣrum břa antun ař ǧiřet n wass waḥit u-ɛicrin zeg uyur. 
Sebɛa n wussan war ittwiffi wentun di tudrin nwem, minzi man wen i ɣa iccen zi min iǧan s wentun, ma d abarrani niɣ d mmis n temmurt, bnadem nni ad ittwaqess zi tmesmunt n Israil. 
War ttᵉttem walu zi min iǧan s wentun. Di marra tizeddaɣ nwem ad teccem aɣrum břa antun.’” 
Iřaɣa Musa i marra imɣaren n Israil, inna asen: “Ṭṭfem, ksim ijjen zeg wuǧi i yixef nwem, i řaǧat nwem u ɣarṣem t i Tɣarṣt n Useɛdu. 
Ṭṭfem ict n tqebbiḍt n tɛelǧet, sɣeḍsem tt deg idammen nni iǧan di ṭṭebṣi, ɣemsen xenni zeg idammen i iǧan di ṭṭebṣi x tnebdat sennej i tewwart u x tnayen n řeḍruf ɣar uɣezdis n tewwart. Ař ṣṣbeḥ war itteffeɣ uřa d ijjen zzaywem zi tewwart n taddart nnes. 
SIDI ad iẓwa x temmurt, maḥend ad iwwet Imiṣriyyen, maca xmi ɣa iẓar idammen x tnebdat n nnej u x tnayen n řeḍruf ɣar uɣezdis n tewwart, xenni ad iɛdu SIDI tawwart nni, war ittejji amteḥḥay ad yadef ɣar tudrin nwem, ḥima ad iwwet. 
Ḥḍam awař-a i nniɣ, aqa d tewṣeyyet i cek u i iḥenjiren nnec i řebda. 
Ad yiři, xmi ɣa tadfem ɣar temmurt tenni d awem ɣa yewc SIDI, am mammec inna Netta, ad teḥḍam aɛbad-a n řidaret. 
Uca x minni d awem ɣa inin iḥenjiren nwem: ‘Min ixs ad yini weɛbad-a n řidaret i kenniw?’, 
xenni ad tinim: ‘Aqa d Taɣarṣt n Useɛdu i SIDI wenni iɛdun x tudrin n ayt n Israil di Miṣra, umi iwta Imiṣriyyen uca ifekk tudrin nneɣ.’” Řexdenni yuḍar řgens uca bendqen nitni. 
Ruḥen ayt n Israil uca ggin am mammec ten yumur SIDI i Musa d Harun u ammu i tt ggin. 
Tuɣa ɣar wezyen n ǧiřet umi iwta SIDI marra imenza di temmurt n Miṣra s řmewt, zeg umenzu n firɛun, wenni iqqimen x řɛarc nnes, ař amenzu n umeḥbus i iǧan di řeḥbes, uřa d marra imenza n řebhayem.    
Ikkar firɛun di ǧiřet nni, netta d marra imsexxaren nnes d marra Imiṣriyyen uca tuɣa din ict n tɣuyyit temɣar minzi war tuɣi uřa d ict n taddart mani war iǧi umettin. 
Uca iřaɣa-dd i Musa d Harun s ǧiřet, inna: “Kkarem, teffɣem zi řwesṭ n řgens inu, kenniw jmiɛ ak-d ayt n Israil, ruḥem, tɛebdem SIDI, am mammec tennam kenniw. 
Awyem uǧi nwem d ifunasen d tfunasin nwem, am mammec tennam. Ruḥem, maca ttzawgeɣ kenniw, barkem ayi necc ɛawed!” 
Zeyyaren Imiṣriyyen aṭṭas x řgens, maḥend nitni ad ffɣen s uqeǧeq zi temmurt, minzi Imiṣriyyen nnan: “Aqa neccin marra d imettan!” 
Uca yiwi řgens arecti nnes qbeř ma ɣa inḍu uca tibeqyin nnḍen tent jar warruḍ nsen x ṭɣarḍin nsen. 
Ayt n Israil ggin ɛlaḥsab awař i d asen inna Musa, ttaren řeqcuɛ n nnuqart d wureɣ d warruḍ zeg Imiṣriyyen. 
SIDI iwca řgens arḍa di tiṭṭawin n Imiṣriyyen, wcin asen min ttaren, u ammu i keccḍen nitni Imiṣriyyen. 
Fesyen ayt n Israil iqiḍan nsen, uyuren zi Raɛamsis ɣar Sukkut, tuɣa aten ɛřaḥař di setta-myat-ařef x iḍaren, ttwaḥesben iryazen waha, břa iḥenjiren. 
Igeɛɛed akidsen ijj n ubarru d ameqqran n ɛřam kuř iwdan, xenni ɛawed uǧi d ifunasen d tfunasin, aqa-tt d ict n tḥimart temɣar aṭṭas. 
S warecti i kidsen dd-iwyen zi Miṣra ggʷin tifḍirin břa antun, minzi tuɣa ɛad war ismim, minzi uẓẓřen xasen-dd zi Miṣra u war zemmaren ad bedden maḥend ad areyyḥen u war sswejden macca i webrid i yixef nsen. 
Tuɣa řmijař n tzeddiɣt n ayt n Israil di Miṣra, řmijar i din izedɣen, arebɛa-mya u-třatin n iseggʷusa. 
Ɣar uneggar n arebɛa-mya u-třatin n iseggʷusa, deg wass nni simant nnes, ffɣen marra řɛeskar n SIDI zi temmurt n Miṣra. 
Tanita aqa-tt d ict n ǧiret ittxeṣṣa ad tᵉttwaḥḍa i řewqar i SIDI, maɣar Netta indeh i-ten zi temmurt n Miṣra. Ǧiřet-a tanita, aqa-tt i SIDI. Ittxeṣṣa ad tᵉttwaḥda zi marra ayt n Israil, di marra jjiřat nsen. 
Inna SIDI i Musa d Harun: “D ta d tawṣeyyet x Tɣarṣt n Useɛdu: war zzayes ittett mmis n ubarrani, 
maca kuř ismeɣ immesɣen zeg ijj n weryaz s nnuqart, izemmar ad zzayes yecc, mařa txetned as. 
Amɛezzeb d ucewwař war zzayes ttᵉtten ca. 
Ad ittwacc di taddart d ict u war itteffeɣ walu zeg weysum nni ɣar barra n taddart uca war zzayes ittareẓẓi uřa d ijj n yiɣes. 
Marra tamesmunt n Israil ad tegg amenni. 
Mařa ca n ubarrani innewjew-dd ɣarek uca ixs ad issewjed Taɣarṣt n Useɛdu i SIDI, ittxeṣṣa ad ittwaxten kuř aryaz nni ɣares iǧan. Řexdenni ad dd-iqarreb, ad tt issewjed, uca ad yiři am wenni dd-ixeřqen di temmurt. Maca uřa d ijj zeg inni war ixtinen war izemmar ad zzayes yecc. 
Ad din yiři ijj n uzerf i wenni dd-ixeřqen di temmurt u i ubarran i izeddɣen jar awem am ubarrani.” 
Uca marra ayt n Israil ggin am mammec d asen yumur Musa d Harun, ammu i tt ggin. 
Uca imsar deg wass nni simant nnes issuffuɣ SIDI ayt n Israil zi temmurt n Miṣra am ttwasettfen nitni ɛlaḥsab iseddiyyen n řɛeskar nsen. 
