﻿Uffuɣ.
9.
Řexdenni inna SIDI i Musa: “Adef ɣar firɛun, ini as: ‘SIDI, AREBBI n Iɛibraniyyen iqqar ammu: Ejj ad iraḥ řgens inu, maḥend ad ayi iɛbed. 
Minzi mařa tugid ad ten tejjed ad raḥen uca ad ten tᵉṭṭfed ɛad ktar, 
xzar, afus n SIDI ad yiři x řmař nnec nni iǧan deg iyyar, x iysan d yeɣyař d yiřeɣman d ifunasen d tfunasin uřa x wuǧi s yijj n ṭṭaɛun iqesḥen aṭṭas. 
Ad ifarz SIDI jar řebhayem n ayt n Israil d řebhayem n Imiṣriyyen, ḥima war ittmetti walu zi marra min iǧan n ayt n Israil.’” 
Uca ineyyec SIDI ict n řweqt umi inna: “Tiwecca ad yegg SIDI man aya di temmurt.” 
Tiwecca nnes igga SIDI ddeqq nni uca mmuten marra řebhayem n Miṣra, maca zi řebhayem n ayt n Israil war temmut uřa d ict zzaysent. 
Uca issekk firɛun ijjen, uca aqa da, war temmut uřa d ict zi řebhayem n ayt n Israil. Maca uř n firɛun idweř iqseḥ uca war yejji ad iffeɣ řgens. 
Řexdenni inna SIDI i Musa d Harun: “Ɛemmar uru n ifassen nwem s iɣɣeḍ zi tefqunt uca ejj Musa ad t izzuzar deg ujenna qibač i tiṭṭawin n firɛun. 
Ad idweř iɣɣeḍ d taɛejjajt ifsusen x marra tammurt n Miṣra uca taɛejjact ad tedweř d tiḥebba s řewɛi x bnadem u x řmař di marra tammurt n Miṣra.” 
Uca ksin iɣɣeḍ zi tefqunt am tuɣa bedden zzat i firɛun uca izzuzar i-t Musa deg ujenna uca idweř d tiḥebba s řewɛi am deg iwdan am di řmař, 
ařami tarwa n tseḥḥart war zemmaren ad qqimen bedden zzat i Musa di ssibbet n tḥebba, minzi tiḥebba ḥekment iseḥḥaren d marra Imiṣriyyen. 
Maca SIDI isseqseḥ uř n firɛun, ařami war d asen iseǧ ca, am mammec tuɣa inna SIDI i Musa. 
Řexdenni inna SIDI i Musa: “Tiwecca kkar zic, tbedded zzat i wudem n firɛun uca ini as: ‘Ammu i iqqar SIDI, AREBBI n Iɛibraniyyen: Ejj ad iraḥ řgens inu, maḥend ad ayi iɛbed. 
Minzi twařa-ya Necc ad cek řeqfeɣ deg wuř s marra jjrayeḥ inu uca uřa d imsexxaren nnec d řgens nnec, ḥima ad tessned belli war iǧi ḥed am Necc di marra tammurt. 
Minzi ɛad řexxu tuɣa zemmareɣ ad sswiẓẓḍeɣ afus inu, ḥima ad cek wteɣ uřa d řgens nnec s ṭṭaɛun uca tuɣa izemmar ad tᵉttwateḥḥid zi temmurt. 
Maca s tidett Necc ssbeddeɣ cek ḥima ad ac ssecneɣ jjehd inu u ḥima ad ittwacenneɛ Isem inu di marra tammurt. 
Ma tᵉttegged ɛad tiɛinkrifin ḍidd i řgens inu, ḥima war ten tejjid ad raḥen? 
Xzar, tiwecca ɣar tsaɛɛet-a Necc ad arreɣ tabrurri iddeqřen ad tewwet, tabrurri i war tuɣi ɛemmarṣ di Miṣra zeg wass i di tᵉttwabna ař i řexxu. 
Xenni sekk řexxu imsexxaren nnek, maḥend ad ssidfen řebhayem d marra min ɣarek deg iyyar ɣar daxeř. Kuř bnadem niɣ d řmař nni i ɣa ittwafen deg iyyar, war t ssidfen ɣar daxeř n taddart, ad xas dd-tewḍa tebrurri uca nitni ad mmten.’” 
Wenni iggʷeden awař n SIDI zeg imsexxaren n firɛun, ijja imsexxaren nsen d řebhayem nsen arewřen ɣar daxeř di tudrin. 
Maca wenni war ittiqqen awař n SIDI s wuř nnes, aqa ijja imsexxaren nnes d řebhayem nnes deg iyyar. 
Xenni inna SIDI i Musa: “Swiẓẓeḍ afus nnec ɣar ujenna uca ad tiři tebrurri x marra tammurt n Miṣra, x iwdan, x řmař u x marra afsu deg iyyaren di temmurt n Miṣra.” 
Xenni isswiẓẓeḍ Musa taɣɣarct nnes ɣar ujenna uca SIDI igga ajjaj d tebrurri uca tesswiẓẓeḍ tmessi ɣar temmurt. Ammu i igga SIDI maḥend ad tewwet tebrurri x temmurt n Miṣra. 
Tuɣa din tabrurri d tmessi ixeǧḍen ak-d tebrurri. Tuɣa tejhed aṭṭas, war tt tuɣi ɛemmarṣ di marra tammurt n Miṣra zeg wami tuɣa tedweř d ijj n řgens. 
Uca tewta tebrurri x marra tammurt n Miṣra, x marra min tuɣa deg iyyar, x iwdan d řmař. Tewta tebrurri ɛawed x marra afsu deg iyyar uca ttwarẓent marra tcejjura n řexřa. 
Mɣir di tammurt n Jucan, mani ǧan ayt n Israil, war tewti tebrurri. 
Řexdenni issekk firɛun ad řaɣan i Musa d Harun uca inna asen: “Necc xḍiɣ twařa-ya. SIDI, aqa-t d Amsegged uca necc d řgens inu d iɛeffanen! 
Ẓaǧem s řaǧaɣ i SIDI, minzi cfa, aqa ajjajen n AREBBI d aṭṭas uřa d tabrurri. Necc ad kenniw jjeɣ ad traḥem, war kenniw ttᵉṭṭfeɣ ca ɛad danita.” 
Xenni inna as Musa: “Meřmi ɣa ffɣeɣ zi tendint ad sswiẓẓḍeɣ ifassen inu ɣar SIDI uca ad bedden wajjajen, war tᵉttiři ɛad tebrurri, maḥend ad tessned belli tammurt aqa-tt n SIDI. 
Maca xak d x imsexxaren nnec, aqa ssneɣ mazal war teggʷedem ca zi SIDI AREBBI.” 
Tiffest d imendi tuɣa ttwařeqfen, minzi imendi tuɣa-t s tidrin d tiffest tnewwar. 
Maca irden d karṣana war ttwařeqfen ca, minzi tuɣa aten war dd-ffiɣen ɛad. 
Xenni yuyur Musa zi firɛun, iffeɣ zi tendint uca iksi ifassen nnes ɣar SIDI. Řexdenni bedden wajjajen d tebrurri uřa d ibuda n wenẓar x temmurt. 
Umi iẓra firɛun belli anẓar d tebrurri d wajjajen bedden, ixḍa ɛad ktar uca isseqseḥ uř nnes, netta d imsexxaren nnes. 
Uř n firɛun yarni di řeqsaḥet, war ijji ad iraḥ ayt n Israil, am mammec tuɣa inna SIDI s tsexxart n Musa. 
