﻿Amezwaru.
48.
Awarni man aya imsar, ittwanna i Yusuf: “Xzar, aqa babac iḥřec!” Xenni iksi akides tnayen n iḥenjiren nnes Manassa d Ifrayim. 
Xebbaren Yaɛqub, nnan: “Xzar, aqa mmic Yusuf ad ɣarek dd-yas!” Xenni igga Israil uř deg ixef nnes uca ikkar iqqim x qama. 
Xenni inna Yaɛqub i Yusuf: “Arebbi, Amzemmar x kuřci, aqa iban ayi-dd di Luz, di temmurt n Kenɛan, u aqa Netta ibark ayi. 
U aqa Netta inna ayi: “Xzar, ad cek arreɣ ad tegged řɣiǧet uca ad cek kettareɣ, ad cek ggeɣ d ijj n wegraw n řegnus, ad ac wceɣ tammurt-a d agřa i řebda u i zzariɛet nnec awarni ac. 
Uca řexxu, aqa tnayen n iḥenjiren nnec, Ifrayim d Manassa, inni d ac dd-ittwaxeřqen di temmurt n Miṣra qbeř i ɣarek dd-usiɣ di temmurt n Miṣra, aqa aten inu, am Rubin d Cimɛun i iǧan inu. 
Maca inni d ac dd-ittwaxeřqen awarni asen, ad iřin nnec. Ad ttwasemman x yisem n aytmatsen di řwart nsen. 
Umi dd-usiɣ zi Fadan-Aram, temmut Raḥil zzati di temmurt n Kenɛan deg webrid, řami tuɣa ɛad war tiggʷij x Ifrata. Neḍřeɣ tt din deg webrid ɣar Ifrata!”, aqa-tt d Bayt-Laḥm. 
Iẓra Israil iḥenjiren n Yusuf, inna: “Min ɛnan ina?” 
Yarra-dd Yusuf x babas: “D iḥenjiren inu i d ayi iwca AREBBI danita.” Inna as: “Sqarrbem ten-dd ɣari uca ad ten barkeɣ!” 
Tuɣa tiṭṭawin n Israil uẓɣent s tewsar, war iqqim ittwařa. Issqarreb as ten-dd, xenni issudem i-ten, idarreɛ asen. 
Inna Israil i Yusuf: “War d ayi ittɣiř ad ẓareɣ ɛad udem nnec. Xzar, AREBBI igga ayi ad ẓareɣ ɛad tarwa nnec!” 
Xenni issḍar i-ten Yusuf x ifadden nnes uca ibendeq s wudem nnes ɣar temmurt. 
Uca iksi i-ten Yusuf s tnayen idsen, Ifrayim s ufusi nnes arendad n uzeřmaḍ n Israil u Manassa s uzeřmaḍ nnes arendad n ufusi n Israil uca issqarreb as ten-dd. 
Isswiẓẓeḍ Israil yefus nnes, issars i-t x uzeǧif n Ifrayim, waxxa tuɣa-t d amaẓuẓ, d azeřmaḍ nnes x uzeǧif n Manassa. Issars ammu ifassen nnes mammec nneɣni neɛmada, waxxa Manassa tuɣa-t d amenzu. 
Israil ibark Yusuf, inna: “D AREBBI, wenni umi řejdud inu, Ibrahim d Isḥaq, uyuren zzates, AREBBI, wenni iǧan d Ameksaw inu zeg wami ǧiɣ ař ass-a,    
lmalak nni d ayi ifdin zi marra tuɛeffna, iři netta ad ibark iḥenjiren-a u iři ad ittwařaɣa isem inu daysen uřa d isem n řejdud inu, Ibrahim d Isḥaq. Iři ad mmarenyen ař ɣa dewřen d ijj n ubarru am iseřman deg waman di řwesṭ n temmurt!”    
Umi iẓra Yusuf, belli babas igga afus afusi nnes x uzeǧif n Ifrayim, tuɣa-tt d ict n řeɛřamet war teḥḥři ɣares di tiṭṭawin nnes uca iṭṭef afus n babas, ḥima ad t ibeddeř zeg uzeǧif n Ifrayim ɣar uzeǧif n Manassa. 
Inna Yusuf i babas: “War ttegg ca ammu, a baba, minzi d wa d amenzu, egg afusi nnec x uzeǧif nnes.” 
Maca babas war ixs ca, inna: “Ssneɣ, a mmi, ssneɣ. Ɛawed netta ad idweř d ijj n řgens, ad imɣar ɛawed, maca umas amaẓuẓ ad yiři ktar zzayes, zzariɛet nnes ad tedweř d tacurret n řegnus.” 
Uca ammu i ten ibarek deg wass nni, inna: “Dayek, deg yisem nnek, a Yusuf ad ibarek řgens Israil, ad inin: ‘Ad kenniw yarr AREBBI am Ifrayim d Manassa!’” Uca yarra Ifrayim ad ibedd zzat i Manassa. 
Awarni as inna Israil i Yusuf: “Xzar, ad mmteɣ, maca AREBBI ad yiři akidwem, ad kenniw issmuṭṭiy ɣar temmurt n řejdud nwem. 
Aqa wciɣ ac ict n tesɣart n idurar x min wciɣ i yaytmac, tenni ksiɣ necc zeg ifassen n Imuriyyen s ssif d řqews inu.” 
