﻿Amezwaru.
46.
Ifsi Israil iqiḍan nnes ssenni, yuyur s marra min ɣares uca yiweḍ ɣar Bi’r-Sebɛa. Iqeddem din tiɣarṣa i AREBBI n babas Isḥaq. 
Uca issiweř AREBBI ak-d Israil di iweḥḥan di ǧiřet, inna: “Yaɛqub, Yaɛqub!” uca inna netta: “Aqa ayi da!” 
Xenni inna: “Necc d Arebbi, AREBBI n babac. War tteggʷed, maḥend ad tehwid ɣar Miṣra, minzi Necc ad cek ggeɣ din d ijj n řgens imɣar. 
Ad kidek hwiɣ ɣar Miṣra uca Necc ad cek ssgeɛɛdeɣ ɛawed u Yusuf ad xak issars ifassen nnes x tiṭṭawin nnec.” 
Ikkar Yaɛqub, iffeɣ zi Bi’r-Sebɛa. Ksin ayt n Israil babatsen Yaɛqub d iḥenjiren nsen d temɣarin nsen deg ikarruten nni dd-issekk firɛun maḥend ad t yawi. 
Ksin řebhayem nsen d wagřa i yarebḥen di temmurt n Kenɛan uca iwḍen ɣar Miṣra, Yaɛqub d marra iḥenjiren nnes akides: 
iḥenjiren nnes d iḥenjiren n iḥenjiren nnes jmiɛ akides, uřa d yessis d yessitsen n iḥenjiren nnes, aqa yiwi akides marra tarwa nnes ɣar Miṣra. 
Ina d ismawen n ayt n Israil, inni yudfen ɣar Miṣra: Yaɛqub d iḥenjiren nnes. Amenzu n Yaɛqub: Rubin. 
Tarwa n Rubin: Ḥanuk d Fallu d Ḥaṣrun d Karmi. 
Tarwa n Cimɛun: Yamuyil d Yamin d Uhad d Yakin d Ṣuḥar d Cawul, mmis n temɣart Takenɛanit. 
Tarwa n Lawi: Jarcun d Qahat d Marari. 
Tarwa n Yahuda: Ɛir d Unan d Cayla d Fariṣ d Zaraḥ. Maca Ɛir d Unan mmuten di temmurt n Kenɛan. Tarwa n Fariṣ tuɣa aten Ḥaṣrun d Ḥamul. 
Tarwa n Issakar: Tulaɛ d Fawwa d Yub d Cimrun. 
Tarwa n Zabulun: Sarad d Ilun d Yaḥliyil. 
Ina tuɣa aten d iḥenjiren n Liya inni d as dd-turuw i Yaɛqub di Fadan-Aram, uca ɛawed yeǧis Dina. Marra řeɛmur n iḥenjiren nnes d tḥenjirin tuɣa aten di třata u-třatin. 
Tarwa n Jad: Ṣifyun d Ḥajji d Cuni d Aṣbun d Ɛiri d Arudi d Arwili. 
Iḥenjiren n Acir: Yimna d Yiswi d Bariɛa d učmatsen Caraḥ. D iḥenjiren n Bariɛa: Ḥabir d Malkiyil. 
Ina tuɣa aten d iḥenjiren n Zilpa tenni iwca Laban i yeǧis Liya. Nettat turuw-dd ina i Yaɛqub, ina seṭṭac d arruḥ. 
Tarwa n Raḥil, tamɣart n Yaɛqub: Yusuf d Binyamin. 
Ttwaxeřqen-dd i Yusuf di temmurt n Miṣra Manassa d Ifrayim, inni d as dd-turuw Asnat, yeǧis n Fuṭi-Faraɛ, akehhan n Un. 
Tarwa n Binyamin: Bilaɛ d Bakir d Acbil d Jira d Naɛman d Iḥi d Ruc d Muffim d Ḥuffim d Ard. 
Ina tuɣa aten d iḥenjiren n Raḥil, inni dd-ittwawarwen i Yaɛqub, marra arbeɛṭac d arruḥ. 
Tarwa n Dan: mɣir Ḥucim. 
Tarwa n Naftali: Yaḥaṣwil d Juni d Yiṣru d Cillim. 
Ina tuɣa aten d iḥenjiren n Bilha, tenni i d as iwca Laban i Raḥil yeǧis. Turuw as-dd ina i Yaɛqub, ina marra tuɣa aten sebɛa d arruḥ. 
Marra řeɛmur nni dd-yusin ɣar Miṣra ak-d Yaɛqub, inni dd-iffɣen zeg uɣezdis nnes, břa timɣarin n iḥenjiren n Yaɛqub, ina marra tuɣa aten di setta u-settin řeɛmur. 
Tarwa n Yusuf inni d as dd-ittwaxeřqen di Miṣra, aqa tnayen n řeɛmur. Marra řeɛmur n taddart n Yaɛqub nni dd-yusin ɣar Miṣra, tuɣa aten di sebɛin. 
Uca netta issekk Yahuda zzates ɣar Yusuf, ḥima ad isscen abrid zzates ɣar Jucan uca iwḍen ɣar temmurt n Jucan. 
Indeh Yusuf ɛawed akarru nnes uca igeɛɛed ɣar Jucan, maḥend ad iřqa Israil, babas. Umi d as immeř ixef nnes, ingez as x yiri, iqqim ittru x yiri nnes aṭṭas. 
Inna Israil i Yusuf: “Řexxu zemmareɣ necc ad mmteɣ, řexxu umi ẓriɣ aɣembub nnec, zeɛma aqa ɛad teddared!” 
Xenni inna Yusuf i yaytmas u i aytbab n taddart n babas: “Ad geɛɛdeɣ ad xebbareɣ firɛun, ad iniɣ: ‘Aytma d taddart n baba, inni iǧan di temmurt n Kenɛan, aqa usin-dd ɣari. 
Iryazen d imeksawen n wuǧi, tuɣa ceɣřen ixef nsen ak d řebhayem. Aqa iwyen-dd uǧi nsen d ifunasen d tfunasin nsen d marra min ɣarsen.’ 
Mařa imsar ad awem dd-iřaɣa firɛun uca ad awem yini: ‘Min teɛna řxedmet i tᵉtteggem?’, 
ad tinim: ‘Imsexxaren nnec d iryazen inni iceɣřen ak-d řebhayem zi temẓi nsen ař i řexxu, neccin uřa d řejdud nneɣ!’, ḥima ad ɣarwem yiři ttesriḥ maḥend ad tzedɣem di temmurt n Jucan, minzi kuř ameksaw n wuǧi, aqa-t d jjɛifect i Imiṣriyyen.” 
