﻿Amezwaru.
40.
Imsar awarni man aya belli awarrad n ujeǧid n Miṣra d uxebbaz dennben ḍidd i siditsen, ajeǧid n Miṣra. 
Iffugem firɛun x tnayen n imsexxaren icennɛen nnes, x umeqqran n iwarraden u x umeqqran n ixebbazen. 
Igga i-ten deg uḥeṭṭu di taddart n řqebṭan n iɛessasen n arrimet, di taddart n tɛessast, mani iḥebbes Yusuf. 
Řqebṭan n iɛessasen n arrimet igga Yusuf d ameḥḍay nsen, uca netta tuɣa ittsexxar xasen. Ammu tuɣa aten ussan d iziraren di řeḥbes. 
Urjin tarjit s tnayen idsen nsen, kuř ijjen zzaysen yurja di ǧiřet nni tarjit nnes s řmeɛna nnes, am uwarrad am uxebbaz n ujeǧid n Miṣra, inni tuɣa ittwaḥebbsen di taddart n tɛessast. 
Uca yusa-dd ɣarsen Yusuf x ṣṣbeḥ, ixzar daysen uca iẓra i-ten ttqellqen. 
Řexdenni isseqsa netta imsexxaren icennɛen n firɛun, inni tuɣa akides di řeḥbes di taddart n sidis, inna: “Maɣar barecnen udmawen nwem ass-a qaɛ ammu?” 
Nitni nnan: “Aqa nurja tarjit, war da wi tt ɣa ifekken.” Inna asen Yusuf: “Ma war ǧin ca ifessaren zi AREBBI? Iwa, ɛawdem ayi tent řexxu!” 
Xenni iɛawed umeqqran n iwarraden tarjit nnes i Yusuf, inna as: “Necc di tarjit inu ẓriɣ tazayart zzati tbedd. 
Tazayart nni ɣares třata n tseḍwin. Xmi tessendiy, ittgeɛɛad nnuwwar nnes u ɣar izekkunen nnes iban-dd řḥebb n uḍiř yiweḍ. 
Uca řkas n firɛun tuɣa-t ɣari deg ufus inu uca ksiɣ aḍiř nni uca ɛessareɣ t di řkas n firɛun uca sseɛduɣ řkas ɣar ufus n firɛun.” 
Inna as Yusuf: “D wa d afessar nnes: třata n tiseḍwin, aqa d třata n wussan. 
Ɛad třata n wussan xenni ad ac issgeɛɛed firɛun azeǧif nnec uca ad cek yarr ɣar tsexxart nnec, ad tesseɛdud řkas i firɛun deg ufus nnes, am mammec tuɣa tasɣart nnec zic řami cek tuɣa d awarrad nnes. 
Maca ɛqeř xafi xmi d ac dd ɣa yas řxar, ttzawageɣ cek ad kidi tegged s tmexsiwt icewwaren uca ejj firɛun ad xafi iɛqeř uca fekk ayi-dd zi taddart-a. 
Minzi ucaren ayi zi temmurt n Iɛibraniyyen u da war ggiɣ x min xef dayi i ɣa ggen deg weḥfur n imeḥbas.” 
Řami iẓra umeqqran n ixebbazen belli ifessar as mliḥ, inna i Yusuf: “Uřa d necc ẓriɣ di tarjit inu třata n tsuǧatin s weɣrum d acemřař x uzeǧif inu. 
Di tsuǧet n sennej tuɣa dayes aṭṭas n macca i firɛun i igga uxebbaz u ijḍaḍ ttᵉtten zi tsuǧet i iǧan x uzeǧif inu.” 
Yarra-dd xas Yusuf, inna: “D wa d afessar nnes. Třata n tsuǧatin d třata n wussan. 
Ɛad třata n wussan xenni ad xak issgeɛɛed firɛun azeǧif nnec jmiɛ akik uca ad cek yayeř x ict n tcejjart u ijḍaḍ ad ccen aysum nnec.” 
Deg wass wiss třata, ass n wexřaq n firɛun, imsar belli issewjed ict n zzardet i marra imsexxaren nnes uca issgeɛɛed azeǧif n umeqqran n iwarraden u azeǧif n umeqqran n ixebbazen tuɣa-t jar imsexxaren nnes. 
Uca netta yarra ameqqran n iwarraden ɣar řxedmet nnes n uwarrad, ařami wanita iwca ɛawed řkas deg ufus n firɛun. 
Maca ameqqran n ixebbazen yuyeř i-t, am mammec d as ifessar Yusuf. 
Maca ameqqran n iwarraden war ifekkar ca ɛad di Yusuf, ittu t. 
