﻿Amezwaru.
38.
Di řweqt d ict ihwa Yahuda, iffeɣ x aytmas, uca iwta iqiḍan nnes ɣar yijj n weryaz d Adullamiti wenni umi qqaren Ḥira. 
Uca iẓra din Yahuda yeǧis n yijj n weryaz d Akenɛani wenni umi qqaren Cuɛa. Uca Yahuda yiwi yeǧis n Cuɛa d tamɣart, uca yudef xas. 
Nettat teksi s ddeyset uca turuw-dd aḥenjir uca Yahuda iřaɣa as Ɛir. 
Uca teksi ɛawed s ddeyset, turuw-dd aḥenjir uca třaɣa as Unan. 
Uca turuw-dd ɛawed aḥenjir uca třaɣa as Cayla. Netta tuɣa-t di Kazib umi d as t-i-dd-turuw. 
Yahuda iksi tamɣart i Ɛir, amenzu nnes. Tamɣart-a qqarent as Tamar. 
Ɛir, amenzu n Yahuda, tuɣa-t d aɛeffan di tiṭṭawin n SIDI uca inɣa i-t SIDI. 
Xenni inna Yahuda i Unan: “Adef x temɣart n umac, mřec akides deg wemcan n umac, tejjed-dd zzariɛet i umac.” 
Maca Unan issen belli zzariɛet war tᵉttiři nnes. Uca ammu imsar, umi yudef x temɣart n umas, inɣeř zzariɛet nnes di temmurt, ḥima war ittic zzariɛet i umas. 
Min igga tuɣa d aɛeffan di tiṭṭawin n SIDI uca inɣa i-t uřa d netta. 
Xenni inna Yahuda i Tamar, tasřit nnes: “Qqim am tajjač di taddart n babam, ař ɣa imɣar mmi Cayla!”, minzi inna: “Aqa war ittmetti uřa d wa am yaytmas.” Uca truḥ Tamar, tezdeɣ di taddart n babas. 
Ɛdun wussan aṭṭas, xenni temmut yeǧis n Cuɛa, tamɣart n Yahuda. Yahuda yarezzu ad ittwaɛezza uca igeɛɛed ɣar tḥimart n wuǧi nnes ɣar Timnata, netta d Ḥira, ameddukkeř nnes zi Adullam. 
Ɛeřmen t i Tamar, nnan: “Xzar, aḍeggʷař nnem igeɛɛed ɣar Timnata, ad iřs uǧi nnes.” 
Xenni tekkes xas arruḍ n tajjač, třeḥḥef s tkenbuct, tesřeḥhef ixef nnes zzayes, uca truḥ ad teqqim ɣar wadaf n Ɛaynayim, wenni iǧan deg webrid ɣar Timnata, minzi teẓra Cayla imɣar, u nettat tuɣa war d as temmewc d tamɣart. 
Uca iẓra i-tt Yahuda, iḥesb i-tt d lfasda, minzi tuɣa-tt třeḥḥef i uɣembub nnes. 
Uca imeyyeř ɣares ɣar webrid, inna as: “Ejj ayi ad xam adfeɣ!”, minzi netta tuɣa war issin, belli nettat d tasřit nnes. Nettat tenna: “Min d ayi ɣa tewced, ḥima ad xafi tadfed?” 
Yarra-dd: “Necc ad am-dd ssekkeɣ ijj n iɣayḍ d ameẓyan zeg iɣayḍen, zeg wuǧi.” Tenna as: “Mɣir ewc ayi ijj n warhan ař d ayi t-i-dd tᵉssekked.” 
Inna: “Man aḍman i d am i ɣa wceɣ?” Nettat tenna: “Taxadent nnec n ucemmiɛ d ttesbiḥ nnec d taɣɣarct i ɣarek deg ufus.” Uca iwca as ten, yudef xas uca teksi zzayes ddeyset. 
Uca tekkar, truḥ, tekkes xas takenbuct nnes uca tyarḍ arruḍ nnes n tajjač. 
Uca issekk Yahuda iɣayḍ d ameẓyan zeg iɣayḍen x ufus n umeddukkeř nnes Adullami, ḥima ad iṭṭef ɛawed aḍman zeg ufus n temɣart, maca war tt yufi. 
Isseqsa iryazen x wemcan nnes, inna: “ Mani teǧa temɣart n farq-ccɣeř nni tuɣa iqqimen x webrid ɣar Ɛanayim?” Nitni arrin-dd xas: “War da tuɣi qaɛ ca n temɣart n farq-ccɣeř ɣar zzawect.” 
Xenni iɛqeb-dd ɣar Yahuda, inna: “War tt ufiɣ ca, uřa d iryazen n wemcan nni nnan: ‘War da tuɣi qaɛ ca n temɣart n farq-ccɣeř ɣar zzawect.’” 
Uca inna Yahuda: “Ejj i-tt ad tᵉṭṭef aḍman ɣares, ḥima war nettiři d řɛar. Xzar, necc aqa ssekkeɣ iɣayḍ-a d ameẓyan, maca cek war tt tufid.” 
Ɛřaḥař awarni třata n iyuren temsar, aqa xebbaren Yahuda, nnan: “Tamar, tasřit nnec, aqa tessefsed ixef nnes uca řexxu nettat aqa-tt s ddeyset s farq-ccɣeř nnes.” Xenni inna Yahuda: “Suffɣem tt-i-dd, ad tecmeḍ!” 
Umi tt-i-dd-yiwyen ɣar barra, tessekk-dd ijjen ɣar uḍeggʷař nnes, maḥend ad yini: “Zeg weryaz n řeḥwayej-a, aqa ksiɣ s ddeyset.” Tenna ɛad: “Arzu xenni wi iřan taxadent-a n ucemmiɛ d ttesbiḥin-a d taɣɣarct-a.” 
Yahuda iɛeqř i-tent, inna: “Aqa-tt d nican xafi, minzi war tt wciɣ d tamɣart i Cayla mmi.” War iqqim issen i-tt ɛad. 
Di řweqt umi dd-tiweḍ ad dd-taruw, aqa da acniwen deg uɛeddis nnes. 
Imsar umi dd-turuw, issuffeɣ-dd ijjen afus uca teksi t řqabřa uca tcedd i-t ɣar ufus nnes s ufiřu d azeggʷaɣ, tenna: “Wa i dd-iffɣen d amezwar.” 
Řami dd yarra afus nnes, iban-dd umas, uca tenna: “Mammec teggid tazzit. Ad tiřid d bu-ittareẓẓan!” Uca semman t Fariṣ.    
Awarni man aya iffeɣ-dd umas, wenni ɣar iǧa ufiřu azeggʷaɣ deg ufus nnes uca isemma t Zaraḥ. 
