﻿Amezwaru.
29.
Iksi Yaɛqub deg iḍaren nnes, iruḥ ɣar temmurt n ayt n ccarq. 
Ixzar uca iẓra ijj n wanu deg iyyar u tuɣa din třata n tḥimriwin n wuǧi jnint zzates, minzi zeg wanu nni warrden nitni tiḥimriwin. Tuɣa din ijj n weẓru x uqemmum n wanu. 
Ssmunen din marra tiḥimriwin. Xas uca kksen aẓru x uqemmum n wanu uca warden uǧi. Awarni as arrin aẓru ɛawed x uqemmum n wanu. 
Inna asen Yaɛqub: “Aytma inu, manis kenniw?” Nitni arrin-dd: “Zi Ḥaran i neǧa.” 
Netta inna asen: “Ma tessnem Laban, mmis n Naḥur?” Nitni arrin-dd: “Wah, nessen i-t.” 
Inna asen netta: “Mammec iǧa?” Arrin-dd: “Aqa-t mliḥ, aqa da yeǧis Raḥil tusa-dd ak-d wuǧi.” 
Inna as: “Aqa da aziř ɛad imɣar, war yeǧi bu řweqt ḥima ad nendeh řebhayem. Wardem uǧi uca ruḥem, maḥend ad ten tarewsem.” 
Nitni arrin-dd: “War nzemmar ad t negg ař dd ɣa munent marra tiḥimriwin. Xenni ad sseḥřuǧden aẓru x uqemmum n wanu, ḥima ad nwared uǧi.” 
Řami tuɣa ɛad issawař akidsen, tusa-dd Raḥil s wuǧi n babas, minzi nettat tuɣa-tt d tameksawt. 
Řami iẓra Yaɛqub Raḥil, yeǧis n Laban, umas n yemmas, ak-d wuǧi n Laban, umas n yemmas, ixecc-dd Yaɛqub uca isseḥřuǧed aẓru x uqemmum n wanu, iward uǧi n Laban, umas n yemmas. 
Issudem Yaɛqub Raḥil, issgeɛɛed tmijja nnes uca isɣuy. 
Inna Yaɛqub i Raḥil aqa netta zi řaǧ n babas i iǧa, uřa d mmis n Rifqa. Uca nettat tuzzeř, txebbar babas. 
Umi isřa Laban řexbar x Yaɛqub, mmis n učmas, yuzzeř ad t iřqa uca idarreɛ as, issudem i-t, indeh i-t ɣar taddart nnes. Uca netta iɛawed marra timesřayin-a i Laban. 
Inna as Laban: “D tidett cek d iɣes inu d aysum inu i teǧid.” Uca iqqim ɣares řqedd n ijj n uyur ikmeř. 
Řexdenni inna Laban i Yaɛqub: “Umi cek d uma i teǧid, ma ad ɣari txedmed baṭeř? Ini ayi min i ɣa tiři řmunet nnec?” 
Laban ɣares tnayen n yessis. Isem n tmenzut d Liya u isem n tmaẓuẓt, Raḥil. 
Tiṭṭawin n Liya tuɣa kecɛent, maca Raḥil tuɣa dayes aẓři n waddud u n řxezrat. 
Yaɛqub ixs Raḥil. Inna: “Necc ad ɣarek xedmeɣ sebɛa n iseggʷusa x Raḥil yeǧis tmaẓuẓt.” 
Laban yarra-dd: “Xar ad ac tt wceɣ i cek niɣ ad tt wceɣ i weryaz nneɣni. Qqim akidi.” 
Ammu i ixdem Yaɛqub x Raḥil sebɛa n iseggʷusa maca ḍharen as-dd iseggʷusa nni amecnaw ca n wussan, minzi tuɣa ittexs i-tt. 
Inna Yaɛqub i Laban: “Ewc ayi řexxu tamɣart inu, minzi aqa kemmřen wussan n řmijař inu, ařami xas i ɣa yadfeɣ.” 
Xenni issmun Laban marra iryazen n wemcan nni, igga urar. 
Ɣar tmeddit iksi yeǧis Liya uca issiweḍ i-tt ɣares uca yudef xas Yaɛqub. 
Iwca Laban tayya nnes Zilpa i yeǧis Liya d tayya. 
Tiwecca nnes iẓra Yaɛqub belli d Liya. Xenni inna i Laban: “Min d ayi teggid? Ma war d ac xdimeɣ x Raḥil? Maɣar d ayi tcemted?” 
Laban inna: “War ittiři uya di temmurt nneɣ ad nessizzar tamaẓuẓt x tmenzut. 
Kemmeř ssimana-ya n wurar n ta, xenni ad ac newc ɛawed tin x řxedmet i ɣa tegged ssa tsawent akidi ɛad sebɛa n iseggʷusa nneɣni.” 
Igga Yaɛqub amenni, ikemmeř ssimana-ya n wurar. Xenni iwca as yeǧis Raḥil d tamɣart 
uca iwca Laban tayya nnes Bilha i yeǧis Raḥil maḥend ad tiři d tayya nnes. 
Yudef Yaɛqub ɛawed x Raḥil uca ixs Raḥil ɛad ktar x Liya. Uca isexxar as ɛawed sebɛa n iseggʷusa nneɣni. 
Umi iẓra SIDI belli Liya tuɣa tᵉttwasseḥqar, yarzem řemřawet nnes, maca Raḥil tuɣa war dd-tᵉttiruw ca. 
Teksi Liya s ddeyset uca turuw-dd aḥenjir, igga as Rubin, minzi tenna: “Aqa SIDI ixzar ɣar řemḥayem inu. Řexxu ad ayi ixs weryaz inu.” 
Teksi ɛawed s ddeyset, turuw-dd aḥenjir, tenna: “Umi isřa SIDI belli necc ttwasseḥqareɣ, iwca ayi ɛawed wa.” Uca tegga as Cimɛun. 
Teksi ɛawed s ddeyset, turuw-dd aḥenjir, tenna: “Řexxu twařa-ya ad imun weryaz inu akidi, minzi urweɣ as-dd třata n iḥenjiren.” X uya netta igga as Lawi. 
Teksi twařa nneɣni s ddeyset, turuw-dd aḥenjir uca tenna: “Twařa-ya ad qadiɣ SIDI.” X uya tegga as Yahuda. Awarni man aya tessbedd tarwa. 
