﻿Amezwaru.
28.
Iřaɣa Isḥaq i Yaɛqub, ibarek i-t uca issekk i-t, inna as: “War ttawi tamɣart zi yessis n Kenɛan. 
Kkar, ruḥ ɣar Fadan-Aram, ɣar taddart n Bituwil, babas n yemmac, uca awi-dd ssenni tamɣart i cek zeg yessis n Laban, umas n yemmac. 
Arebbi, Amzemmar x kuřci, ad cek ibarek u ad ac iwc řɣiǧet uca ad cek ikettar ař ɣa tdewřed d ijj n wegraw n řegnus. 
Iři Netta ad ac iwc lbaraka n Ibrahim, i cek u i zzariɛet nnec akidek, ḥima ad twarted tammurt nni di tzeddɣed am ubarrani, tenni iwca AREBBI i Ibrahim.” 
Xenni issekk Isḥaq Yaɛqub. Uca netta iruḥ ɣar Faddan-Aram, ɣar Laban, mmis n Bituwil, Aramiyu, umas n Rifqa, yemmas n Yaɛqub d Ɛisu. 
Umi iẓra Ɛisu belli Isḥaq ibarek Yaɛqub uca issekk i-t-i-dd ɣar Faddan-Aram ḥima ad yawi i yixef nnes tamɣart ssenni, u řami t ibarek, yumur i-t, inna as: “War kessi tamɣart zeg yessis n Kenɛan!”, 
uca iẓra ɛawed belli Yaɛqub iṭaɛ babas d yemmas, iruḥ ɣar Faddan-Aram, 
xenni itwařa Ɛisu belli yessis n Kenɛan d tiɛeffanin di tiṭṭawin n babas Isḥaq. 
Xenni iruḥ Ɛisu ɣar Ismaɛil uca yiwi Maḥalat d tamɣart i yixef nnes, yarni tt-i-dd ɣar temɣarin nneɣni. Nettat tuɣa-tt d yeǧis n Ismaɛil, mmis n Ibrahim, učmas n Nabayut. 
Uca iffeɣ Yaɛqub zi Bi’r-Sebɛa, iruḥ ɣar Ḥaran. 
Yiweḍ ɣar ijj n wemcan mani yensa, minzi tuɣa tafuct teɣri. Iksi zeg yeẓra n wemcan nni, issars i-ten sadu uzeǧif nnes uca iwḍa iṭṭeṣ deg wemcan nni. 
Yurja, aqa ijj n ddruj ibedd x temmurt uca ittḥada ixef n ddruj ajenna, u xzar, lmalakat n AREBBI ttařyent hekkwant zzayes. 
U xzar, SIDI ibedd xas, inna: “Necc d SIDI, AREBBI n babac Ibrahim, d AREBBI n Isḥaq. Tammurt i xef tᵉṭṭṣed ad ac tt wceɣ i cek u i zzariɛet nnec. 
Ad tiři zzariɛet nnec am ucař n temmurt uca ad tiriwed ɣar řɣarb d ccarq, ɣar ccamal d ljanub. Dayek u di zzariɛet nnec ad ttwabarkent marra řaǧat n temmurt. 
Aqa ayi Necc akidek u Necc ad cek ḥḍiɣ qaɛ mani i ɣa traḥed, ad cek arreɣ ɣar temmurt-a, minzi Necc war cek ttejjiɣ ař ɣa kemmřeɣ min d ac nniɣ.” 
Řami dd-ifaq Yaɛqub zeg yiḍeṣ nnes, inna: “S tidett, SIDI aqa-t deg wemcan-a u necc war ssineɣ!” 
Tuɣa iggʷed aṭṭas, inna: “Mecḥař issaggʷad wemcan-a! Aqa ta mɣir d Taddart n AREBBI u tanita d tawwart n ujenna!” 
Ikkar Yaɛqub uca iksi aẓru nni tuɣa issars sadu uzeǧif nnes, igga i-t am yijj n weẓru n řidaret uca ifarreɣ zzect x uzeǧif n weẓru. 
Igga amcan nni Bayt-Il, maca zeg umezwaru tuɣa isem n wemcan nni Luz. 
Uca iwaɛd Yaɛqub, inna: “Mařa AREBBI aqa-t akidi uca ad ayi iḥḍa deg webrid i ɣa uyureɣ, ad ayi iwc aɣrum ḥima ad cceɣ, d warruḍ ḥima ad arḍeɣ 
u mařa dewřeɣ ɣar taddart n baba di řaman, xenni SIDI ad yiři d AREBBI i necc. 
Uc aẓru-ya i ggiɣ d aẓru n řidaret, ad yiři d Taddart n AREBBI u zi marra min d ayi ɣa tewced, ad ac wceɣ řeɛcur!” 
