﻿Amezwaru.
26.
Tuɣa iǧa řaẓ di temmurt, ijj n řaẓ nneɣni x umezwar nni tuɣa iǧan deg wussan n Ibrahim. S uya iruḥ Isḥaq ɣar Abimalik, ajeǧid n Ifilisṭiniyyen, ɣar jjwayeh n Jirar. 
Dinni iban as-dd SIDI, inna: “War hekkwi ca ɣar Miṣra. Zdeɣ di temmurt i d ac ɣa iniɣ. 
Zdeɣ di temmurt-a am ubarrani u Necc ad kik iřiɣ, ad cek barkeɣ, minzi i cek u i zzariɛet nnec umi ɣa wceɣ marra timmura-ya uca ad kemmřeɣ tjaǧit i jjuǧeɣ i Ibrahim babac. 
Ad kettareɣ zzariɛet nnec am yitran n ujenna uca ad wceɣ i zzariɛet nnec marra timmura-ya. Marra řegnus n ddunect ad ttwabarken di zzariɛet nnec, 
minzi isřa Ibrahim i wawař inu uca iḥḍa min d as wciɣ maḥend ad iḥḍa: řumurat inu, tiweṣṣa inu d izerfan inu.” 
Ammu i iqqim Isḥaq izeddeɣ di Jirar. 
Řami t sseqsan iryazen n wemcan nni x temɣart nnes, inna asen: “Nettat d učma!”, minzi iggʷed ad yini: “D tamɣart inu!”. Maɣar inna deg yixef nnes: “Mařa war nniɣ amenni ad ayi nɣen iryazen n wemcan-a di ṭṭweɛ n Rifqa, minzi aqa dayes aẓri.” 
Řami din izdeɣ aṭṭas n wussan, imsar belli Abimalik, ajeǧid n Ifilisṭiniyyen, ixzar-dd zi řkazi, iẓra Isḥaq ittɛatab Rifqa, tamɣart nnes. 
Uca iřaɣa Abimalik x Isḥaq, inna as: “Xzar, ta s tidett d tamɣart nnec! Mammec teggid tennid aneɣ d učma?” Isḥaq inna as: “S minzi nniɣ i yixef inu: ‘Aqa tiři ad ayi nɣen x ssibbet nnes.’” 
Abimalik inna: “Maɣar d aneɣ teggid aya? X drus ad yiři iṭṭeṣ ca n ijj zi řgens ak-d temɣart nnec uca ad tiři teggid ddenb x yiři nneɣ.” 
Yumur Abimalik marra řgens, inna: “Wenni i ɣa iḥadan aryaz-a niɣ tamɣart nnes, ad t nɣen nican!” 
Izarɛ Isḥaq di temmurt nni uca iksi aseggʷas nni mya n imuren n zzyada, minzi ibark i-t SIDI. 
Temmarni ccenɛet n weryaz nni uca netta iqqim imeqqar, ařami tedweř ccenɛet nnes d tameqqrant aṭṭas. 
Tuɣa ɣares uǧi u ɣares ɛawed ifunasen d tfunasin d waṭṭas n isemɣan, ařami zzayes usmen Ifilisṭiniyyen. 
Marra anuten nni ɣzan imsexxaren deg wussan n Ibrahim babas, netyen ten Ifilisṭiniyyen uca ccuren ten s ucař. 
Xenni inna Abimalik i Isḥaq: “Beɛɛed xaneɣ, minzi tdewřed tjehded xaneɣ s waṭṭas.” 
Isḥaq iruḥ ssenni, iwta iqiḍan nnes di teɣzurt n Jirar uca izdeɣ dinni. 
Uca idweř Isḥaq iɣza anuten n waman inni tuɣa ɣzin deg wussan n Ibrahim babas, inni netyen Ifilisṭiniyyen awarni i řmewt n Ibrahim. Isemma ten s ismawen inni d asen iřaɣa babas. 
Uca imsexxaren n Isḥaq ɣzan di teɣzurt nni uca ufin din řɛunṣar n waman ddaren. 
Xenni qacḥen imeksawen n Jirar ak-d imeksawen n Isḥaq, nnan: “Aman nneɣ!” S uyenni řaɣan isem n řɛunṣar nni ‘Ɛisiq’, minzi tuɣa ttqacaḥen xas. 
Xenni ɣzan ijj n řɛunṣar nneɣni uca mmennɣen xas ɛawed. S uyenni d as igga isem n ‘Sitna’. 
Uca ibeɛɛed ssenni, iɣza ijj n řɛunṣar nneɣni, war xas qicḥen ca uca ggin as isem nnes ‘Raḥubut’, inna: “Řexxu SIDI iwca aneɣ ttasiɛ uca ad ɣarneɣ tiři řɣiǧet di temmurt.” 
Uca igeɛɛed ssenni ɣar Bi’r-Sebɛa. 
Iban as-dd SIDI di ǧiret nni, inna as: “Necc d AREBBI n Ibrahim babac! War tteggʷed ca, aqa Necc akidek u Necc ad cek barkeɣ, ad kettareɣ zzariɛet nnec di ṭṭweɛ n umsexxar inu Ibrahim.” 
Xenni ibna din ijj n uɛalṭar min xef igga taɣarṣt, uca iřaɣa Isem n SIDI. Iwta din aqiḍun nnes uca ɣzin din imsexxaren n Isḥaq ijj n wanu. 
Abimalik yusa-dd ɣares zi Jirar, ak-d Aḥuzzat, ameddukkeř nnes, d Fikul, akumandar n řɛeskar nnes. 
Inna asen Isḥaq: “Maɣar ɣari dd-tusim, waxxa kenniw tcarrhem ayi uca tessuffɣem ayi xawem?” 
Nitni nnan: “Aqa neẓra belli SIDI akidek. S uya nenna, ad din tiři řexxu ict n tjaǧit jaraneɣ, jaraneɣ d cek, uca ejj aneɣ ad kik negg ijj n řɛahd, 
ḥima cek war d aneɣ tᵉttegged řɣar, am mammec uřa d neccin war cek nḥidi ca uca aqa nemṣurref akidek mliḥ uca nessekk i cek di řaman. Aqa cek řexxu d amimun n SIDI!” 
Xenni igga asen ict n zzardet uca ccin, swin. 
Kkaren zic uca jjuǧen ijjen i wenneɣni. Xas uca issqebbeḍ i-ten Isḥaq uca ruḥen nitni zi ɣares di řehna. 
Deg wass nni d ijj usin-dd imsexxaren n Isḥaq, xebbaren t x wanu i iɣzan uca nnan as: “D aman i nufa.” 
Isemma anu-ya Sebɛa. X uya i iǧa yisem n tendint nni Bi’r-Sebɛa, ař ass-a. 
Umi tuɣa ɣar Ɛisu arebɛin n iseggʷusa, yiwi Yudit, yeǧis n Biri, Aḥitti, d tamɣart, uřa d Basmat, yeǧis n Ilun, Aḥitti. 
Tuɣa atent d tarzugi n wuř i Isḥaq d Rifqa. 
