﻿Amezwaru.
24.
Ibrahim tuɣa iwsar u imɣar deg wussan uca SIDI ibarek Ibrahim di kuřci. 
Xenni inna Ibrahim i umsexxar nnes awessar nni iǧan x taddart nnes, awkiř n marra min ɣares: “Egg řexxu afus nnec sadu tmeṣṣaḍt inu, 
ad ac ssjjaǧeɣ s SIDI, AREBBI n ijenwan d AREBBI n temmurt, belli war dd-tᵉttiwyed tamɣart i mmi zi tḥenjirin n ayt n Kenɛan mani zeddɣeɣ necc jar asen, 
maca ad traḥed ɣar temmurt i zi dd-usiɣ, ɣar raǧ inu, maḥend ad dd-tawyed tamɣart i mmi Isḥaq.” 
Inna as umsexxar: “Balak war tᵉttexs temɣart ad ayi dd-teḍfar ɣar temmurt-a. Ma ittxeṣṣa ad arreɣ mmic ɣar temmurt nni manis dd-tusid?” 
Inna as Ibrahim: “Ḥḍat, war dd-ttarri ca mmi dinni! 
SIDI, AREBBI n ijenwan wenni d ayi iṭṭfen zi taddart n baba u zi temmurt n raǧ inu, wenni ɣari issiwřen, ijjuǧ ayi umi d ayi inna: ‘I zzariɛet nnec ad wceɣ tammurt-a!’, d Netta i ɣa issekken lmalak nnes zzat i wudem nnec, maḥend ad tawyed ssenni tamɣart i mmi. 
Mařa tamɣart war tᵉttexs ad cek dd-teḍfar, ad tiřid třellid zi tjaǧit-a, mɣir war dd-ttarri din mmi.” 
Issars umsexxar afus nnes sadu tmeṣṣaḍt n sidis Ibrahim ijjuǧ as x man aya. 
Iksi umsexxar ɛecra n iřeɣman zeg iřeɣman n sidis, iruḥ. Tuɣa ɣares ɛřam kuř agřa iɣřan n sidis. Ikkar uca iṭṭef abrid ɣar temmurt n Aram-Nahrayn, aqa-tt d Misuputamya, ɣar tendint n Naḥur. 
Ɣar uxecci n tmeddit ijja iřeɣman ad jjnen barra i tendint zzat i řɛunṣar n waman, ɣar tsaɛɛet i di dd-ffɣent temɣarin, maḥend ad ayment aman. 
Xenni inna: “SIDI, AREBBI n sidi inu Ibrahim, ttzawageɣ Cek ad ayi tɛawned ass-a uca scen tamexsiwt nnec icewwaren i sidi inu Ibrahim. 
Aqa ayi ɣar řɛunṣar n waman d tḥenjirin n yeryazen n tendint ad dd-ffɣent maḥend ad ayment aman. 
Ejj tabřiɣt nni umi ɣa iniɣ: ‘Sehwa-dd aqbuc nnem, mařa texsed, ad sweɣ!’, uca xenni ad tini: ‘Su, ad wardeɣ uřa d iřeɣman nnec!’, aqa d nettat i teggid i umsexxar nnec Isḥaq, u s uya ad ssneɣ aqa tessecned tamexsiwt nnec icewwaren i sidi inu.” 
Uca ɛad qbeř i ɣa ikemmer awař, iẓra Rifqa, tenni i dd-yurwen i Bituwil, mmis n Milka, tamɣart n Naḥur umas n Ibrahim, teffeɣ-dd zi tendint s weqbuc nnes x teɣruḍt. 
Tabřiɣt tuɣa dayes aẓri imɣar, d taɛzarect, war tt issin weryaz. Nettat tehwa-dd ɣar řɛunṣar, teccur aqbuc nnes uca tgeɛɛed ɛawed. 
Yuzzeř ɣares umsexxar nni, inna: “Ttzawgeɣ cem ad ayi tewced ad sweɣ cwayt n waman zeg weqbuc nnem!” 
Nettat tenna: “Su, a sidi inu!” Tqeǧeq tessehwa aqbuc nnes x ufus nnes, tewca as ad isu. 
Řami d as tewca iswa mliḥ, tenna: “Ad aymeɣ aman ɛawed i iřeɣman nnec, ař ɣarsen i ɣa yiři s zzyada.” 
Tqeǧeq tᵉssexwa aqbuc di tarya, tuzzeř ɛawed ɣar řɛunṣar, ḥima ad tayem aman, uca tuyem asen-dd aman i iřeɣman nnes marra. 
Waxxa itebhet dayes weryaz, isqar, ḥima ad issen ma SIDI issehwen xas abrid nnes niɣ lla. 
Umi jjiwnen iřeɣman tisessi, iksi weryaz deg ijj n umur ict n txadent n wureɣ, tenni iweznen azyen ciqlu, d tnayen n tmeqyasin i ifassen nnes, tinni iweznen ɛecra ciqlu n wureɣ, 
inna: “Ini ayi, umi teggid d yeǧis? Ma aqa din amcan di taddart n babam mani nzemmar ad nessens?” 
Nettat tenna as: “Necc d yeǧis n Bituwil, mmis n Milka, wenni i-tt-i-dd-yurwen i Naḥur.” 
Uca tarni tenna as: “Aqa ɛawed ɣarneɣ aṭṭas n uřum d iɣeǧ, u ɣarneɣ ɛawed amcan i tmensiwt.” 
Uca yuḍar weryaz uca ibendeq i SIDI, 
inna: “Ad ittwabarek SIDI, AREBBI n sidi inu Ibrahim, wenni war ikkisen tamexsiwt nnes icewwaren d řaman nnes zi sidi inu. Indeh ayi SIDI deg webrid ɣar taddart n wawmaten n sidi inu.” 
Tuzzeř tebřiɣt, tɛawed timesřayin-a i yemmas di taddart. 
Uca Rifqa tuɣa ɣares umas, qqaren as Laban, uca Laban yuzzeř ɣar weryaz nni tuɣa din di barra ɣar řɛunṣar. 
Tuɣa iẓra taxadent d tnayen n tmeqyasin deg ifassen n učmas uca isřa i wawařen i tuɣa teqqar učmas Rifqa, tenna: “Ammu i kidi issiweř weryaz nni.” Uca yuyur ɣar weryaz. Xzar, ibedd diha zzat i iřeɣman, ɣar řɛunṣar. 
Inna: “Araḥ-dd, a cek d amimun n SIDI! Mayemmi teqqimed di barra, necc aqa sswejdeɣ taddart d wemcan i iřeɣman.” 
Iruḥ weryaz akides ɣar taddart u netta iḍřeq i iseɣwan n iřeɣman. Netta iwca asen řum d macca, uca iksi aman, ḥima ad issird iḍaren nnes uřa d iḍaren n iryazen nni kides iǧan. 
Issars zzates min ɣa yecc. Uca netta inna: “War ttᵉtteɣ qbeř i ɣa iniɣ tabrat inu.” Netta inna as: “Siweř!” 
Xenni inna: “Necc d amsexxar n Ibrahim. 
SIDI ibark sidi inu aṭṭas s waṭṭas uca ccan nnes imɣar aṭṭas. Aqa iwca as uǧi d ifunasen d tfunasin, nnuqart d wureɣ, isemɣan d tiyya, iřeɣman d yeɣyař. 
D Sara, tamɣart n sidi inu, turuw-dd aḥenjir i sidi inu awarni umi tewsar u netta iwca as marra min ɣares. 
Uca sidi inu ijja ayi jjuǧeɣ, inna: ‘War dd-ttawi tamɣart i mmi zi tḥenjirin n ayt n Kenɛan inni mani zedɣeɣ di temmurt nsen. 
Uct xak mařa war ttriḥed ɣar taddart n baba, ɣar raǧ inu uca ad dd-tawyed tamɣart i mmi ssenni.’ 
Xenni necc nniɣ i sidi inu: ‘Balak tamɣart war d ayi dd-tḍeffar.’ 
Uca netta inna ayi: ‘SIDI i umi uyureɣ zzat i wudem nnes, aqa Netta ad dd-issekk lmalak nnes akidek uca ad xak issehwen abrid nnec ař dd ɣa tawyed i mmi ict n temɣart zi řaǧ inu u zi taddart n baba. 
Ad tiřid tfekked zi tjaǧit i d ayi tejjuǧed, xmi ɣa traḥed ɣar řaǧ inu u nitni war d ac tt tticen, xenni ad cek ssuffɣeɣ zi tjaǧit nnec i tuɣa tejjuǧed.’ 
Ass-a usiɣ-dd ɣar řɛunṣar uca nniɣ: ‘A SIDI, AREBBI n sidi inu Ibrahim, ttzawageɣ ad tᵉsshewned řexxu abrid i di ggureɣ. 
Aqa ayi da zzat i řɛunṣar n waman. Ejj ad tiři ammu, aqa taɛzarect, tenni dd ɣa iffɣen, maḥend ad tayem aman u i tenni umi ɣa iniɣ: Ewc ayi ad sweɣ cwayt n waman zeg uqbuc nnem! 
uca xenni nettat ad ayi tini: Su cek u necc ad aymeɣ ɛawed i iřeɣman nnec!, d ta ad tiři d tamɣart nni d issewjed SIDI i mmis n sidi inu.’ 
Uca qbeř i ɣa kemmřeɣ taẓaǧit-a deg wuř inu, xzar, Rifqa teffeɣ-dd s uqbuc nnes x teɣruḍt nnes, tehwa ɣar řɛunṣar uca tuyem-dd aman. Nniɣ as: ‘Ttzawgeɣ cem ad ayi tewced ad sweɣ!’ 
Deɣya tessehwa aqbuc nnes, tenna: ‘Su u necc ad ssesweɣ ɛawed iřeɣman nnec!’ Swiɣ uca nettat tewca ɛawed i iřeɣman ad swen. 
Sseqsiɣ tt, nniɣ: ‘Umi teggid d yeǧis?’ Nettat tarra: ‘Necc d yeǧis n Bituwil, mmis n Naḥur wenni d as dd-yurwen Milka.’ Xenni ggiɣ as taxadent di tinzart nnes d tmeqyasin deg ifassen nnes. 
Xas uca uḍareɣ, bendqeɣ i SIDI uca barkeɣ SIDI, AREBBI n sidi inu Ibrahim, wenni d ayi inedhen nican deg webrid, ḥima ad dd-awyeɣ iǧis n umas n sidi inu d temɣart i mmis. 
Xenni řexxu, mařa kenniw texsem ad tessecnem tamexsiwt icewwaren d řaman i sidi inu, ini ayi t, mařa lla, ini ayi t ɛawed, xenni ad kkeɣ yefus niɣ uzeřmaḍ.” 
Xenni Laban d Bituwil arrin-dd, nnan: “Zi SIDI i dd-iffeɣ uya, war nzemmar ad dayek nini řɣar niɣ řxar. 
Xzar, Rifqa qibač nnec, ksi tt uca truḥed. Ad tiři nettat d tamɣart n mmis n sidi nnec, am mammec inna SIDI!” 
Umi isřa umsexxar n Ibrahim awařen nsen, ibendeq ɣar temmurt zzat i SIDI. 
Uca issuffeɣ-dd umsexxar řeqcuɛ n nnuqart d řeqcuɛ n wureɣ d warruḍen, iwca i-ten i Rifqa. Ɛawed iwca tirzifin iɣřan i umas d yemmas. 
Ccin, swin, netta d yeryazen inni kis dd-yusin. Ssensen din uca faqen ɣar ṣṣbeḥ. Xenni inna: “Samḥem ayi ad raḥeɣ řexxu ɣar sidi inu!” 
Arrin-dd umas d yemmas: “Ejj tabřiɣt akidneɣ waxxa mɣir ɛecra n wussan, awarni as ad tuyured.” 
Maca netta inna asen: “War dayi tᵉṭṭifem ɛad umi SIDI issehwen abrid inu! Mɣir ejj ayi ad raḥeɣ ɣar sidi inu.” 
Nitni arrin-dd řexdenni: “Ejj aneɣ ad nřaɣa i tebřiɣt, ad nseř i min ɣa tini zeg uqemmum nnes.” 
Řaɣan i Rifqa uca nnan as: “Ma ad traḥed cem ak-d weryaz-a?” Uca nettat tarra-dd: “Wah, ad raḥeɣ.” 
Xenni ssqebbḍen nitni Rifqa, učmatsen, ak-d tmeṭṭaḍt nnes, uca ssqebbḍen ɛawed amsexxar n Ibrahim d iryazen nnes. 
Uca barken Rifqa, nnan as: “A učmatneɣ, ad tawḍed ad temɣared d řuřuf n ɛecra n řuřuf uca zzariɛet nnem ad tᵉṭṭef tawwart n yinni tt icarrhen!” 
Tekkar Rifqa d temsexxarin nnes timeẓyanin, nyint x iřeɣman, ḍfarent aryaz. Ammu i dd-yiwi umsexxar Rifqa uca iruḥ. 
Aqa iffeɣ-dd Isḥaq zeg wanu n Laḥay-Ru’i. Tuɣa izeddeɣ di Temmurt n Ljanub. 
Iffeɣ-dd Isḥaq maḥend ad iẓẓaǧ deg iyyar. Tuɣa-tt ɣar uweṭṭu n tmeddit. Netta issgeɛɛed tamuɣři nnes, iqceɛ, u xzar, iřeɣman ttqarraben-dd! 
Rifqa ɛawed tessgeɛɛed tiṭṭawin nnes, teẓra Isḥaq. Nettat tejja ixef nnes ad tḍar deɣya x weřɣem 
uca tenna i umsexxar: “Min iɛna weryaz nni dd-yusin deg iyyar ɣarneɣ?” Uca inna umsexxar: “Wa d sidi inu!” Xenni teksi takenbuct uca třeḥḥef. 
Uca iɛawed umsexxar i Isḥaq marra min igga. 
Igewwed i-tt Isḥaq ɣar uqiḍun n yemmas Sara, yiwi Rifqa uca nettat tedweř d tamɣart nnes u netta tuɣa ittexs i-tt. Ammu i ifewwej Isḥaq awarni řmewt n yemmas. 
