﻿Amezwaru.
15.
Awarni man aya yusa-dd wawař n SIDI ɣar Abram deg ijj n řewḥiy. Inna as “War tteggʷed ca, Abram, Necc d aseřqi i cek, řmunet nnec temɣar aṭṭas d Necc.” 
Uca inna Abram: “Sidi inu, SIDI, min d ayi ɣa tewced, maɣar necc ad raḥeɣ ammu břa mmi u Aliɛazir zi Dimacq ad yiři amecnaw mmi x wagřa n taddart inu?” 
Inna Abram ɛawed: “Xzar, war d ayi tewcid zzariɛet, s uyenni, wenni iǧan am mmi n taddart inu, ad yiři d awrit inu!” 
Uca xzar, awař n SIDI yusa-dd ɣares, inna: “War cek iwarret ca wa, maca wenni i ɣa iffɣen zzayek ad yiři d awrit nnec.” 
Issuffeɣ i-t ɣar barra, inna: “Xzar ɣar ujenna, tḥesbed itran, mařa tzemmared ad ten tḥesbed!” Uca inna as: “Ammu i ɣa tiři zzariɛet nnec!” 
Uca netta yumen di SIDI uca iḥseb as t-i-dd d tasegda.    
Inna as ɛawed: “Necc d SIDI, wenni cek dd-yiwyen zi Ur n Ikaldaniyyen, ḥima ad ac wceɣ tammurt-a d řwart.” 
Xenni netta inna: “A Sidi inu, SIDI, s minzi i ɣa ssneɣ, belli ad tt warteɣ?” 
Inna as Netta: “Awi ayi-dd ict n tɛejmit n třata n iseggʷusa d ijj n iɣayḍ n třata iseggʷusa d ijj n icarri n třata iseggʷusa d ict n tejlilleḥt d ijj n wedbir d ameẓyan.” 
Netta yiwi-dd ɣares marra man aya, ibḍa ten x wezyen u igga kuř azyen qibač i wenneɣni, maca war ibḍi ca ijḍaḍ. 
Hwan-dd ijḍaḍ ittkeccaḍen x imurḍas, maca Abram yuẓẓeř xasen. 
Ɣar uɣeǧay n tfuct, imsar aqa yusa as-dd i Abram ijj n yiḍeṣ yuǧeɣ, uca xzar, tiggʷudi d taǧest iḥedqen wḍan-dd xas. 
Xenni inna i Abram: “Ssen s tidett aqa zzariɛet nnec ad tiři d tabarranect deg ict n temmurt i war iǧin nnes uca ad asen xedmen am isemɣan u nitni ad xasen ggen aɣiř arebɛa-mya n iseggʷusa. 
Maca řgens umi ɣa xedmen am isemɣan, ad xasen ḥekmeɣ ɛawed, uca awarni man aya ad ffɣen s wagřa imɣar. 
Ad tᵉttwassmuned ɣar řejdud nnec s řehna uca ad cek neḍřen am umeccaybu iweqqar. 
Jjiř wiss arebɛa ad dd-iɛqeb danita, minzi řqedd n řmuɛṣiyyet n Imuriyyen ɛad war ikemmeř.” 
Řami teɣři tfuct uca tedweř d taǧest, tuɣa din afarran iddexxnen u iɛdu ijj n weṣfeḍ n tmessi jar izeynan nni. 
Deg wass nni nnit igga SIDI ijj n Řɛahd ak-d Abram, inna: “I zzariɛet nnec umi wciɣ tammurt-a zeg iɣzar n Miṣra ař iɣzar ameqqran, iɣzar n Lfuraṭ: 
tammurt n Iqiniyyen, Iqeniziyyen, Iqadmiyyen, 
Iḥittiyyen, Ifirziyyen, Irafawiyyen, 
Imuriyyen, ayt n Kenɛan, Igirgaciyyen d Iyibusiyyen.” 
