﻿Amezwaru.
10.
Ttwarwen asen-dd iḥenjiren awarni i sseḥřet.   * 
Ayt n Yafat tuɣa aten d Jumar, Majuj, Maday, Yawan, Tubal, Macik d Tiras.    
Iḥenjiren n Jumar, tuɣa aten d Ackanaz, Rifat d Tujarma. 
Iḥenjiren n Yawan tuɣa aten d Ilica, Tarcic d Ikittiyyen d Idudaniyyen. 
Zzaysen i ttwabḍant tegzirin n řegnus di temmura nsen, kuř ijjen ɛlaḥsab iřes nnes uca marra ɛlaḥsab řaǧ nsen u di řegnus nsen. 
Ayt n Ḥam tuɣa aten d Kuc, Miṣrayim, Fuṭ d Kenɛan. 
Iḥenjiren n Kuc tuɣa aten d Seba, Ḥawila, Sabta, Raɛama d Sabtaka. Iḥenjiren n Raɛama tuɣa aten d Caba d Dadan. 
Kuc ijja-dd Nimrud. Wanita ibda ad yiři d jjiheř di temmurt. 
Wa tuɣa d anegmar d ameqqran zzat i wudem n SIDI. X uya qqaren: ‘Anegmar ameqqran am Nimrud zzat i wudem n SIDI.’ 
Amezwar n tgeldit nnes tuɣa atent d tineddam n Babil d Irix d Akkad d Kalna di temmurt n Cinɛar. 
Zi temmurt nni dd-iffeɣ ɣar Accur uca ibna din Ninwa, Riḥubut-Ɛir d Kalaḥ 
d Risin jar Ninwa d Kalaḥ, nettat d tandint tameqqrant. 
Miṣrayim ijja-dd Iludiyyen, Iɛanamiyyen, Ilahabiyyen, Inaftuḥiyyen, 
Ifatrusiyyen, Ikasluḥiyyen, inni zi dd-iqqarṣen Ifilisṭiniyyen, uřa d Ikafturiyyen. 
Kenɛan ijja-dd Ṣidun, amenzu nnes, d Ḥit 
d Uyabusi d Umuri d Ujirjaci 
d Uḥiwi d Uɛarqi d Usini 
d Urwadi d Uṣamari d Uḥamati. Awarni as mbezzɛent marra řaǧat n Kenɛan. 
Tuɣa aymir n ayt n Kenɛan zi Ṣidun ɣar Xirar ař Ɣazza u ssenni ɣar Sadum d Ɛamurra d Adma d Ṣabuyim ař Lacaɛ. 
Ina d ayt n Ḥam ɛlaḥsab řaǧat nsen, ɛlaḥsab iřsawen nsen, di timmura nsen u ak-d řegnus nsen. 
I Cam, wenni d jedd n marra ayt n Ɛabir, umas n Yafat, ameqqran, ttwarwen as-dd ɛawed iḥenjiren. 
Iḥenjiren n Cam tuɣa aten d Ɛilam, Accur, Arfakcad, Lud d Aram. 
Iḥenjiren n Aram tuɣa aten d Ɛuṣ d Ḥul d Jatir d Mac. 
Arfakcad ijja-dd Calaḥ u Calaḥ ijja-dd Ɛabir. 
Ttwarwen-dd i Ɛabir tnayen n iḥenjiren. Ijjen qqaren as Falaj, minzi deg wussan nnes tᵉttwafeǧeq temmurt, u qqaren as i umas Yuqṭan. 
Yuqṭan ijja-dd Almudad, Calaf, Haḍarmawt, Yaraḥ, 
Haduram, Uzal, Diqla, 
Ɛubal, Abimayil, Caba, 
Ufir, Ḥawila d Yubab. Marra ina tuɣa aten d iḥenjiren n Yuqṭan. 
Tammurt mani tuɣa zeddɣen tuɣa-tt zi Mica ař Safar, adrar n ccarq. 
Ina d ayt n Cam ɛlaḥsab řaǧat nsen u ɛlaḥsab iřsawen nsen, di temmura nsen u ak-d řegnus nsen. 
Tina d řaǧat n iḥenjiren n Nuḥ, ɛlaḥsab mammec dd-xeřqen, ak-d řegnus nsen. Zzaysen i zi ttwabḍan řegnus di temmurt awarni i sseḥřet. * 
