﻿Amezwaru.
2.
Ammu i ttwakemmřen ijenwan d temmurt d qaɛ řɛeskar nsen. 
Deg wass wiss sebɛa ikemmeř AREBBI řxedmet nnes i igga uca yareyyeḥ deg wass wiss sebɛa zi marra řxedmet nnes i igga. 
Ibarek AREBBI ass wiss sebɛa uca issqeddes i-t, minzi dayes i yareyyeḥ zi marra řxedmet nnes, řxedmet i dd-ixřeq AREBBI maḥend ad tt igg amenni. Ina d imezruyen n wexřaq n ujenna d temmurt řami dd-ttwaxeřqen. 
Deg wass i igga SIDI AREBBI tammurt d ijenwan 
- qbeř tuɣi din marra cbarq di temmurt u qbeř dd-iɣmi wefsu n yeyyar, minzi SIDI AREBBI war ijji anẓar ad iwwet ɛad x temmurt - uca war tuɣi din Adam ɛad ḥima ad ixdem tammurt, 
tgeɛɛed-dd tayyut zi temmurt, tessu marra udem n temmurt. 
Uca ikewwen SIDI AREBBI Adam zi tɛejjajt n ucař uca isuḍ řeɛwin n tudart deg wenzaren nnes. Ammu i idweř Adam d ijj n nnefs iddar. 
Xenni iẓẓu SIDI AREBBI jjennet di Ɛadn, jjihet n ccarq, uca issars din Adam i igga. 
Uca isseɣmi-dd SIDI AREBBI zi temmurt kuř tacejjart, tecna i řxeẓrat u tmiẓidt i macca, uca isseɣmi-dd řa d tacejjart n tudart di řwesṭ n jjennet uřa d tacejjart n tussna n řxar d řɣar. 
Iffeɣ-dd ijj n iɣzar zi Ɛadn, ḥima ad issuw jjennet u ssenni immsebḍa x arebɛa n izeǧifen i iggin tiseǧyawin. 
Isem n yeɣzar amezwaru d Ficun. Netta i innḍen i marra tammurt n Ḥawila mani iǧa wureɣ. 
Ureɣ n temmurt nni iṣbeḥ. Aqa din aserɣaɣ acemřař qqaren as ‘bᵉdula’, d weẓru n ‘uniks’. 
Isem n iɣzar wiss tnayen d Jiḥun i tuɣa innḍen i marra tammurt n Kuc. 
Isem n iɣzar wiss třata d Ḥiddaqil. Netta ittazzeř ɣar ccarq n Accur. U iɣzar wiss arebɛa d Lfuraṭ. 
Iksi SIDI AREBBI Adam uca issars i-t di jjennet n Ɛadn, ḥima ad tt ixdem u ad tt iḥḍa. 
SIDI AREBBI iweṣṣa Adam, inna: “Zi marra ticejjura n jjennet ad tecced macca, 
maca zi tcejjart n tussna n řxar d řɣar war ttᵉtted ca zzayes, minzi deg wass i zzayes ɣa tecced, řmewt i ɣa temmted!” 
Inna SIDI AREBBI: “War iɛeddeř ad yiři Adam weḥḥdes. Ad as ggeɣ wi t ɣa iɛawnen, am netta qibač nnes.” 
Tuɣa SIDI AREBBI igga zeg ucař marra řmař n řexřa u marra ijḍaḍ n ujenna, uca indeh i-ten ɣar Adam, ḥima ad iẓar mammec i ten ɣa isemma. Mammec i ɣa isemma Adam kuř nnefs iddaren d wa d isem nnes. 
Igga Adam ismawen i marra řebhayem d yejḍaḍ n ujenna u i marra řmař n řexřa, maca i Adam war yufi wi t ɣa iɛawnen d wi ɣa yiřin am netta qibač nnes. 
Issehwa-dd SIDI AREBBI ijj n yiḍeṣ yuǧeɣ x Adam uca iṭṭeṣ. Xenni iksi icten zi tɣezdisin nnes uca iqqen amcan yarezmen nni s weysum. 
Yarra SIDI AREBBI taɣezdist tenni i iksi zi Adam d tamɣart uca yiwyi tt-i-dd ɣar Adam. 
Xenni inna Adam: “Twařa-ya tanita aqa-tt d iɣes zeg iɣsan inu d aysum zeg weysum inu. Tanita ad tᵉttwasemma ‘taryazt’, ixs ad yini ‘tamɣart’, minzi nettat tᵉttwaksi-dd zeg weryaz.” 
X uya ad ismeḥ weryaz di babas d yemmas, ad iqqen ɣar temɣart nnes uca ad iřin d ict n ddat.    
Tuɣa-ten s tnayen idsen d iɛaryanen, Adam d temɣart nnes, maca tuɣa war din ca n řeḥya jar asen. 
