﻿أَسَارْڭبْ.
14.
ؤُشَا ژْرِيغْ، أَقَا إِزْمَارْ إِبدّْ-د خْ وذْرَارْ ن صِيهْيُونْ، ؤُشَا أَكِيذسْ مْيَا ؤُ-أَربْعَا ؤُ-ربْعِينْ-أَڒفْ، إِنِّي خْ ثنْيَارْثْ نْسنْ يُورَا إِسمْ نّسْ ذ يِيسمْ ن بَابَاسْ. 
سْڒِيغْ إِشْثْ ن ثْمِيجَّا ثُوسَا-د زڭْ ؤُجنَّا، أَمْ ڒْحسّْ ن وَاطَّاسْ ن وَامَانْ ؤُ أَمْ ڒْحسّْ ن وَاجَّاجْ أَمقّْرَانْ، ؤُشَا ڒْحسّْ إِ سْڒِيغْ ثُوغَا أَمْ يِيجّْ ن بُو-لهَارْپَا إِتِّيرَارنْ ذِي لهَارْپَا نّسْ. 
أَقَا نِيثْنِيغنّْجنْ مِينْ إِدْجَانْ أَمْ يِيجّْ ن يزْڒِي ن ؤُصبّحْ ذ جْذِيذْ قَاعْ زَّاثْ إِ ڒْعَارْشْ ؤُ زَّاثْ إِ أَربْعَا ن إِمُودَّارنْ ذ إِمْغَارنْ، ؤُشَا ؤُڒَا ذ إِجّْ وَارْ إِزمَّارْ أَذْ إِڒْمذْ إِزْڒِي أَيَا ن ؤُصبّحْ مْغِيرْ مْيَا ؤُ-أَربْعَا ؤُ-ربْعِينْ-أَڒفْ، إِنِّي إِتّْوَافْذِينْ زِي ثمُّورْثْ. 
إِنَا ذ إِنِّي وَارْ إِسّفْسذنْ إِخفْ نْسنْ أَكْ-ذ ثمْغَارِينْ، مِينْزِي نِيثْنِي ذ إِعزْرِييّنْ إِمزْذَاڭنْ. نِيثْنِي ضفَّارنْ إِزْمَارْ مَانِي مَا إِكَّا. أَقَا إِنَا إِتّْوَافْذِينْ زڭْ إِوْذَانْ أَمْ صَّابثْ ثَامزْوَارُوثْ إِ أَربِّي ؤُ إِ يزْمَارْ. 
أَقَا وَارْ إِتّْوِيفِّي شَا ڒْغشّْ ذڭْ ؤُقمُّومْ نْسنْ، أَقَا وَارْ ذَايْسنْ بُو ڒْعِيبْ. 
ؤُشَا ژْرِيغْ إِجّْ ن لْمَالَاكْ نّغْنِي ثُوغَا إِطَّاوْ ذِي ڒْوسْطْ ن ؤُجنَّا، غَارسْ ڒخْبَارْ أَصبْحَانْ إِ ڒبْذَا حِيمَا أَذْ زَّايسْ إِبَارّحْ إِ يِينِّي إِزدّْغنْ ذِي ثمُّورْثْ، إِ كُوڒْ ڒْڭنْسْ ذ شّعْبْ ذ ثقْبِيتْشْ ذ يِيڒسْ، 
ؤُشَا إِنَّا س جّهْذْ: ”ڭّْوذمْ أَربِّي، وْشمْ أَسْ-د أَعُودْجِي، أَقَا ثَاسَاعّثْ ن لْحِيسَابْ نّسْ ثِيوضْ-د. سجْذمْ إِ ونِّي إِڭِّينْ أَجنَّا ذ ثمُّورْثْ ذ ڒبْحَارْ ذ ثَاڒَاوِينْ ن وَامَانْ.“ 
ؤُشَا ونّغْنِي، ونِّي ذ وِيسّْ ثْنَاينْ، إِضْفَارْ إِ-ث، إِنَّا: ”أَقَا ثوْضَا، أَقَا ثوْضَا ثنْذِينْثْ ثَامقّْرَانْثْ بَابِيلْ، إِ يجِّينْ أَذْ سْونْ مَارَّا ڒڭْنُوسْ زِي بِينُو ن ثفْقحْثْ ن فَارْقْ-شّْغڒْ نّسْ.“ 
ؤُشَا ونّغْنِي، إِجّْ ن لْمَالَاكْ وِيسّْ ثْڒَاثَا، إِضْفَارْ إِ-ثنْ ؤُشَا إِڒَاغَا س جّهْذْ: ”ونِّي إِعبْذنْ ڒْوحْشْ ذ ڒخْيَاڒْ نّسْ ذ ونِّي إِكْسِينْ ڒْمَارْكَا خْ ثنْيَارْثْ نّسْ نِيغْ ذڭْ ؤُفُوسْ نّسْ، 
ذ نتَّا أَذْ إِسُو عَاوذْ زِي بِينُو ن ثفْقحْثْ ن سِيذِي، ونِّي إِسّْوجْذنْ بْڒَا أَخدْجضْ ذِي ڒْكَاسْ ن وغْضَابْ نّسْ، ؤُشَا أَذْ إِتّْوَاعدّبْ س ثْمسِّي ذ ڒشْبَاريّثْ قِيبَاتْشْ إِ ثِيطَّاوِينْ ن لْمَالَاكَاثْ إِقدّْسنْ ؤُ قِيبَاتْشْ إِ ثِيطَّاوِينْ ن يزْمَارْ. 
ؤُشَا دّخَّانْ ن ؤُعدّبْ نْسنْ أَذْ إِقِّيمْ إِڭعّذْ إِ ڒبْذَا قَاعْ. وَارْ ذِينْ بُو أَرَّاحثْ أَسّْ ذ دْجِيڒثْ إِ ونِّي إِسجّْذنْ إِ ڒْوحْشْ ذ ڒخْيَاڒْ نّسْ ؤُ إِ ونِّي إِكْسِينْ ڒْمَارْكَا ن يِيسمْ نّسْ. 
أَقَا ذَا إِتّْبَانْ-د صّْبَارْ ن إِمْقدَّاسنْ، إِنِّي إِتّطّْفنْ ذِي ثْوصَّا ن أَربِّي ؤُ حطَّانْ لْ-إِيمَانْ ن يَاسُوع.“ 
ؤُشَا سْڒِيغْ إِشْثْ ن ثْمِيجَّا ثتّْڒَاغَا-د زڭْ ؤُجنَّا، ثقَّارْ: ”أَرِي: سّعْذْ ن إِمتِّيننْ إِنِّي إِ غَا مّْثنْ ذِي سِيذِيثْنغْ، زِي ڒخُّو ثْسَاونْثْ!“ ”وَاهْ، إِنَّا أَرُّوحْ، مَاغَارْ أَذْ أَريّْحنْ زِي ڒخْذَايمْ نْسنْ!“، أَقَا ڒخْذَايمْ نْسنْ أَذْ ثنْ ضْفَارنْثْ. 
ؤُشَا ژْرِيغْ، أَقَا إِجّْ ن ؤُسيْنُو ذ أَشمْڒَاڒْ، ؤُشَا خْ ؤُسيْنُو إِقِّيمْ خَاسْ ونِّي يَارْوسنْ ذڭْ إِجّْ ن مِّيسْ ن بْنَاذمْ، غَارسْ تَّاجْ ن وُورغْ خْ ؤُزدْجِيفْ نّسْ ؤُ أَمْجَارْ إِقْضعْ ذڭْ ؤُفُوسْ نّسْ. 
ؤُشَا إِجّْ ن لْمَالَاكْ نّغْنِي إِفّغْ-د زِي زَّاوشْثْ ثَامقّْرَانْثْ ؤُشَا إِڒَاغَا س جّهْذْ خْ ونِّي إِقِّيمنْ خْ ؤُسيْنُو: ”سكّْ-د أَمْجَارْ نّشْ، مْجَارْ! أَقَا ثَاسَاعّثْ ن ثْميْرَا ثِيوضْ-د!“ 
ؤُشَا ونِّي إِقِّيمنْ خْ ؤُسيْنُو، إِسّكّْ-د أَمْجَارْ نّسْ غَارْ ثمُّورْثْ ؤُشَا ثتّْوَامْجَارْ ثمُّورْثْ. 
ؤُشَا إِجّْ ن لْمَالَاكْ نّغْنِي إِفّغْ-د زِي زَّاوشْثْ ثَامقّْرَانْثْ إِ إِدْجَانْ ذڭْ ؤُجنَّا، ؤُشَا ؤُڒَا ذ نتَّا غَارسْ إِجّْ ن ومْجَارْ إِقْضعْ. 
ؤُشَا إِجّْ ن لْمَالَاكْ نّغْنِي ونِّي غَارْ ثدْجَا صُّولْطَا خْ ثْمسِّي، إِفّغْ-د زڭْ ؤُعَالْطَارْ، ؤُشَا إِڒَاغَا-د س جّهْذْ خْ ونِّي غَارْ إِدْجَا ومْجَارْ إِقْضعْ، إِنَّا: ”سكّْ-د أَمْجَارْ نّشْ إِقضْعنْ، ڒْْقضْ إِزكُّوننْ ن ثْزَايَارِينْ ن ثمُّورْثْ، مِينْزِي أَضِيڒْ نّسْ أَقَا يِيوضْ.“ 
ؤُشَا لْمَالَاكْ إِسّكّْ-د أَمْجَارْ نّسْ غَارْ ثمُّورْثْ، إِڒْقضْ أَضِيڒْ نْ ثْزَايَارْثْ ن ثمُّورْثْ، إِنْضَارْ إِ-ث ذِي ثْسِيرْثْ ثَامقّْرَانْثْ ن وغْضَابْ ن أَربِّي. 
حَارْينْ ذِي ثْسِيرْثْ ن ؤُضِيڒْ أَڒْ بَارَّا ن ثنْذِينْثْ ؤُشَا رُوشّنْ-د إِذَامّنْ زِي ثْسِيرْثْ أَڒَامِي إِوْضنْ غَارْ سْڒِيمَاثْ ن ييْسَانْ، ڒْقدّْ ن أَڒفْ ؤُ-مِيثَاينْ ن ’إِسْثَاذِييّنْ‘، إِخْسْ أَذْ يِينِي عْڒَاحَاڒْ مِيثَاينْ ؤُ-عِيشْرِينْ كِيلُومِيثْرْ.    
