﻿إِفِيلِيبِّيينْ.
4.
س ؤُيَا، أَ أَيْثْمَا إِعِيزّنْ ذ إِغْڒَانْ، أَقَا كنِّيوْ ذ ڒفْرَاحثْ إِنُو ذ تَّاجْ إِنُو، بدّمْ خنِّي أَمُّو نِيشَانْ ذِي سِيذِيثْنغْ، أَ إِمْعِيزّنْ إِنُو! 
نشّْ تّْزَاوَاڭغْ زڭْ ؤُوُوذِييَا ذ سِينْثِيشِي، مَاحنْذْ أَذْ إِمُونْ أَرَّايْ نْسنْثْ ذِي سِيذِيثْنغْ. 
تّْزَاوَاڭغْ عَاوذْ زَّايكْ، أَ أَمْعَاشَارْ أَمْثِيقِّي إِنُو، مَاحنْذْ أَذْ ثوْشذْ أَفُوسْ إِ ثِينِّي إِ إِخدّْمنْ أَكِيذِي خْ سِّيبّثْ ن ثْبَارّحْثْ ن لْ-إِنْجِيلْ، ؤُڒَا أَكْ-ذ كْلِيمِينْسْ ذ إِمْسخَّارنْ إِنُو نّغْنِي، إِنِّي إِسْمَاونْ نْسنْ يُورَانْ ذڭْ وذْلِيسْ إِتّْوَانْضنْ ن ثُوذَارْثْ. 
فَارْحمْ ڒبْذَا ذِي سِيذِيثْنغْ، نشّْ قَّارغْ عَاوذْ: فَارْحمْ! 
أَذْ يِيڒِي ؤُوَاضعْ نْومْ إِتّْوَاسّنْ غَارْ إِوْذَانْ مَارَّا. سِيذِيثْنغْ أَقَا يُوذسْ. 
وَارْ كسِّيمْ شَا س ومْنُوسْ خْ وَالُو، مَاشَا أَذْ يِيڒِي مَارَّا مِينْ ثتَّارمْ ڒبْذَا إِتّْوَاسّنْ غَارْ أَربِّي س ثْژَادْجِيثْ ذ ثْكسِّيثْ ن ڒْمعْرُوفْ أَكْ-ذ ؤُقَاذِي. 
ؤُشَا ڒهْنَا ن أَربِّي إِ إِعْذُونْ مَارَّا ڒفْهَامثْ أَذْ إِحْضَا ؤُڒَاونْ ذ إِخَارِّيصنْ نْومْ ذِي يَاسُوع لْمَاسِيحْ. 
غَارْ ؤُنڭَّارْ، أَ أَيْثْمَا، مَارَّا مِينْ إِدْجَانْ ذ ثِيذتّْ، مَارَّا مِينْ إِقُّورنْ، مَارَّا مِينْ إِسڭّْذنْ، مَارَّا مِينْ إِزْذِيڭنْ، مَارَّا مِينْ إِعِيزّنْ، مَارَّا مِينْ غَارْ إِدْجَا ڒْحسّْ أَصبْحَانْ، ؤُ مَارَّا مِينْ غَا إِسْذَاهدْجنْ شَّانْ ذ ؤُسمْغَارْ، خَارْصمْ ذَايسْ. 
مِينْ ثغْرِيمْ ؤُ ثْقبْڒمْ، مِينْ ثسْڒِيمْ ؤُ ثژْرِيمْ زَّايِي، ڭّمْ ث، ؤُشَا أَربِّي ن ڒهْنَا أَذْ كِيومْ يِيڒِي! 
أَقَا فَارْحغْ أَطَّاسْ ذِي سِيذِيثْنغْ ؤُمِي ذَايْومْ إِدْجَا ومْنُوسْ مَاحنْذْ أَذْ أَيِي ثثْهِيلَّامْ، أَمْ مَامّشْ ذَايْومْ ث ثُوغَا قْبڒْ، مَاشَا وَارْ ذ أَسْ ثُوفِيمْ مَامّشْ أَذْ ثڭّمْ. 
وَارْ ت نِّيغْ، مِينْزِي نشّْ حْوَاجغْ شَا، مِينْزِي ڒمْذغْ أَذْ قنْعغْ مَامّشْ مَا د-ثُوسَا. 
نشّْ أَقَا سّْنغْ ؤُمِي قَّارنْ دّدْجْ، ؤُشَا أَقَا سّْنغْ ؤُمِي قَّارنْ أَفيّضْ. مَانِي مَا ؤُ ذِي مَارَّا أَقَا ڒمْذغْ، أَمْ ذِي ثْيَاوَانْثْ، أَمْ ذِي ڒَاژْ أَمْ ذڭْ ؤُفيّضْ ؤُڒَا ذِي ڒغْبنْ. 
قدّغْ قَاعْ زِي لْمَاسِيحْ ونِّي ذ أَيِي إِوْشِينْ جّهْذْ. 
وَاخَّا أَمنِّي مْلِيحْ ڒَامِي ذ أَيِي ثوْشِيمْ أَفُوسْ ذِي ڒمْحَايمْ إِنُو. 
ثسّْنمْ عَاوذْ سِيمَانْثْ نْومْ، أَ إِفِيلِيبِّييّنْ، بلِّي غَارْ ؤُمزْوَارُو ن ثْبَارّحْثْ ن ڒخْبَارْ أَصبْحَانْ، ؤُمِي د-فّْغغْ زِي مَاكِيذُونِييَا، ؤُڒَا ذ إِشْثْ ن ثْمسْمُونْثْ وَارْ ثڭِّي أَكِيذِي ڒحْسَابْ خْ مِينْ وْشِينْ ذ مِينْ كْسِينْ، مْغِيرْ ثنِّي نْومْ وَاهَا. 
مِينْزِي عَاوذْ ذِي ثِيسَّالُونِيكَا ثسّكّمْ أَيِي-د مِينْ ذ أَيِي إِتّْخصَّانْ، إِجّْ ن ؤُمُورْ ؤُ إِجّْ ن ؤُمُورْ نّغْنِي. 
وَارْ أَرزُّوغْ أَذْ ذَايِي ثوْشمْ شَا، مَاشَا أَرزُّوغْ أَذْ ثْوسّعْ ڒْغِيدْجثْ نْومْ. 
نشّْ طّْفغْ كُوڒْشِي ؤُ غَارِي كُوڒْشِي س زّْيَاذَا، أَقَا جِّيوْنغْ. نشّْ كْسِيغْ مَارَّا مِينْ ذ أَيِي د-ثسّكّمْ س ؤُفُوسْ ن إِبَافْرُوذِيثُوسْ: إِشْثْ ن ڒفْوَاحثْ إِتّْفُوحنْ ذ إِشْثْ ن ثْغَارْصْثْ يَارْضَانْ قِيبَاتْشْ إِ أَربِّي. 
مَاشَا أَربِّي إِنُو أَذْ إِسّْيِيونْ مَارَّا مِينْ ثحْذَاجمْ عْلَاحْسَابْ أَڭْڒَا نّسْ ذڭْ ؤُعُودْجِي إِ إِدْجَانْ ن يَاسُوع لْمَاسِيحْ. 
أَقَا إِ أَربِّي، بَابَاثْنغْ، أَذْ غَارسْ يِيڒِي ؤُعُودْجِي ذ شَّانْ إِ ڒبْذَا قَاعْ. أَمِينْ. 
سدْجْممْ خْ كُوڒْ إِمْقدَّاسنْ ذِي يَاسُوع لْمَاسِيحْ س ڒهْنَا. أَوْمَاثنْ إِنِّي أَكِيذِي، تّْسدْجَامنْ خَاومْ س ڒهْنَا. 
أَقَا مَارَّا إِمْقدَّاسنْ تّْسدْجَامنْ خَاومْ س ڒهْنَا، أَمزْوَارُو إِنِّي إِدْجَانْ زِي ثَادَّارْثْ ن قَايْصَارْ. 
أَرْضَا ن سِيذِيثْنغْ يَاسُوع لْمَاسِيحْ أَذْ يِيڒِي أَكِيذْومْ مَارَّا. أَمِينْ. 
