﻿2 إِكُورِينْثِييّنْ.
13.
أَقَا ثَا ذ ثْوَاڒَا وِيسّْ ثْڒَاثَا أَذْ غَارْومْ د-أَسغْ. ”خْ ؤُقمُّومْ ن ثْنَاينْ نِيغْ ثْڒَاثَا ن ڒشْهُوذْ أَذْ إِتّْوَاضْمنْ مَارَّا وَاوَاڒْ!“ 
نِّيغْ ت قْبڒْ ؤُشَا أَذْ أَومْ ت إِنِيغْ قْبڒْ عَاوذْ، أَخْمِي ت نِّيغْ ڒَامِي ذ أَيِي ثُوغَا أَكِيذْومْ وِيسّْ مَارْثَاينْ، ؤُشَا عَاوذْ ڒخُّو، ؤُمِي غَابغْ، تَّارِيغْ ت إِ يِينِّي إِخْضَانْ ؤُ إِ مَارَّا إِنّغْنِي، أَقَا، مَاڒَا ؤُسِيغْ-د ثْوَاڒَا نّغْنِيثْ، وَارْ أَرحّْمغْ شَا. 
مِينْزِي كنِّيوْ ثَارزُّومْ لْبُورْهَانْ بلِّي أَقَا لْمَاسِيحْ إِ ذ أَيِي إِسَّاوَاڒنْ، ونِّي وَارْ إِضْعِيفنْ ذَايْومْ، مَاشَا أَقَا إِجْهذْ ذَايْومْ. 
وَاخَّا نتَّا إِتّْوَاصلّبْ ذِي ثُوضْعفْثْ، أَقَا إِدَّارْ س جّهْذْ ن أَربِّي. ؤُڒَا ذ نشِّينْ أَقَا نضْعفْ أَكِيذسْ، مَاشَا أَذْ كِيسْ ندَّارْ زِي جّهْذْ ن أَربِّي إِ ذَايْومْ إِدْجَانْ. 
قدْجْبمْ إِخفْ نْومْ، مَا أَقَا كنِّيوْ ثتّْبدَّامْ ذِي لْ-إِيمَانْ، أَرْزُومْ ڒعْمُورْ نْومْ. نِيغْ وَارْ ثسِّينمْ شَا بلِّي يَاسُوع لْمَاسِيحْ أَقَا-ث ذَايْومْ، ؤُ مَاڒَا وَارْ إِدْجِي أَمنِّي، أَقَا كنِّيوْ ثمّنْضَارمْ؟ 
مَاشَا سِّيثِيمغْ أَذْ ثسّْنمْ، بلِّي وَارْ نمّنْضَارْ. 
تّتَّارغْ أَربِّي، مَاحنْذْ وَارْ ذَايْومْ ثتّْوِيفْ ؤُڒَا ذ إِشْثْ ن ڒْحَاجّثْ ذ ثَاعفَّانْثْ، حِيمَا أَذْ د-ثْبَانْ ثْقدْجبْثْ نّغْ ؤُشَا كنِّيوْ ثتّڭّمْ مِينْ إِدْجَانْ ذ أَصبْحَانْ، وَاخَّا نشِّينْ نْبَانْ أَخْمِي نمّنْضَارْ. 
مِينْزِي نشِّينْ وَارْ نْزمَّارْ وَالُو ضِيدّْ إِ ثِيذتّْ، مَاشَا إِ ثِيذتّْ وَاهْ. 
مِينْزِي نشِّينْ نْفَارّحْ، ڒَامِي نضْعفْ ؤُ كنِّيوْ ثْجهْذمْ. ؤُشَا نتّْژَادْجْ عَاوذْ أَذْ ثِيڒِيمْ ثْكمّْڒمْ. 
س ؤُينِّي تَّارِيغْ أَومْ-د مَانْ أَيَا أَمْ غَابغْ، مَاحنْذْ، خْمِي د غَا يَاسغْ، إِتّْخصَّا وَارْ تّقْسِيحغْ شَا عْلَاحْسَابْ صُّولْطَا إِ ذ أَيِي إِوْشَا سِيذِي إِنُو إِ ڒبْنِي، وَارْ إِدْجِي إِ وَاردّدْجْ. 
زِي سَّا ذ ثْسَاونْثْ، أَ أَيْثْمَا، إِڒِيمْ ثْفَارّْحمْ ذ ثْكمّْڒمْ، إِڒِيمْ ثتّْفوّْجمْ، خَارّْصمْ س يِيجّْ ن ؤُخَارّصْ، ؤُشَا جّمْ أَذْ ذِينْ ثِيڒِي ڒْهُوذْنثْ جَارْ أَومْ، خنِّي أَذْ كِيومْ يِيڒِي أَربِّي ن ثَايْرِي ذ ڒهْنَا. 
سدْجْممْ إِجّنْ خْ ونّغْنِي س ڒهْنَا س ؤُسُوذمْ إِقدّْسنْ. 
مَارَّا إِمْقدَّاسنْ تّْسدْجَامنْ خَاومْ س ڒهْنَا. 
ڒهْنَا ن سِيذِيثْنغْ يَاسُوع لْمَاسِيحْ ذ ثَايْرِي ن أَربِّي ذ ثْمُونْثْ ن أَرُّوحْ إِقدّْسنْ أَذْ إِڒِينْ أَكِيذْومْ مَارَّا. أَمِينْ. 
