﻿إِرُومَانِييّنْ.
10.
أَ أَيْثْمَا، أَمژْرِي ن وُوڒْ إِنُو ؤُ ثَاژَادْجِيثْ ثنِّي ژُودْجغْ غَارْ أَربِّي ذِي طّْوعْ ن إِسْرَائِيل، أَقَا-ت حِيمَا أَذْ غَارْسنْ ثِيڒِي ثُوذَارْثْ. 
أَقَا شهّْذغْ خَاسنْ أَقَا نِيثْنِي غَارْسنْ شْضَارثْ إِ أَربِّي، مَاشَا بْڒَا ثُوسّْنَا. 
مَاغَارْ وَارْ سِّيننْ ثَاسڭْذَا ن أَربِّي، مَاشَا أَرزُّونْ أَذْ طّْفنْ ذِي ثْسڭْذَا ن إِخفْ نْسنْ. س ؤُيَا وَارْ سّْوَاضْعنْ إِخفْ نْسنْ إِ ثْسڭْذَا ن أَربِّي. 
مِينْزِي أَكمّڒْ ن شَّارِيعَا نتَّا ذ لْمَاسِيحْ إِ ثْسڭْذَا إِ كُوڒْ إِجّنْ إِ إِتَّامْننْ. 
مِينْزِي مُوسَا يُورَا زِي جِّيهثْ ن ثْسڭْذَا ذِي شَّارِيعَا: ”ونِّي إِتّڭّنْ مَانْ أَيَا، أَذْ زَّايسْ إِدَّارْ.“ 
مَاشَا ثَاسڭْذَا ثنِّي زِي لْ-إِيمَانْ ثقَّارْ أَمُّو: ”وَارْ ثقَّارْ ذڭْ وُوڒْ نّشْ: ’وِي غَا إِڭَاعّْذنْ غَارْ ؤُجنَّا ؤُشَا أَذْ إِسّهْوَا لْمَاسِيحْ؟“ 
نِيغْ: ”وِي د-إِهْوَانْ ذڭْ وحْفُورْ ن ڒَاخَارْثْ، ؤُشَا إِسّْڭعّذْ لْمَاسِيحْ زِي ثَادَّارْثْ ن إِمتِّيننْ؟“ 
مَاشَا مِينْ إِخْسْ أَذْ يِينِي مَانْ أَيَا خنِّي؟ ”ثَامْوَارِّيثْ ثُوذسْ إِ شكْ، أَقَا-ث ذڭْ ؤُقمُّومْ نّشْ ؤُڒَا ذڭْ وُوڒْ نّشْ. وَا ذ أَوَاڒْ ن لْ-إِيمَانْ إِ زِي نتّْبَارّحْ.“ 
مَاڒَا ثْشهْذذْ إِ سِيذِيثْنغْ يَاسُوع س ؤُقمُّومْ نّشْ ؤُشَا أَذْ ثَامْنذْ س وُوڒْ نّشْ بلِّي أَربِّي إِسّْنكَّارْ إِ-ث زِي ثَادَّارْثْ ن إِمتِّيننْ، أَذْ ثدَّارذْ. 
مِينْزِي ؤُڒْ إِ ذَايسْ إِتَّامنْ أَذْ إِتّْوَاسڭّذْ، ؤُشَا أَقمُّومْ إِ زَّايسْ إِشهّْذنْ، أَذْ إِدَّارْ. 
مِينْزِي ثِيرَا إِقدّْسنْ قَّارنْثْ: ”مَارَّا وِي زَّايسْ إِ غَا يَامْننْ، وَارْ إِتّْسضْحِي شَا.“ 
مِينْزِي نتَّا وَارْ إِتّڭّْ بُو ڒْفَارْزْ جَارْ وُوذَاينْ ذ إِرَامِييّنْ، مِينْزِي نتَّا ذ إِجّنْ، سِيذِي نْسنْ مَارَّا نِّي إِتّنْفيَّاضْ ڒْخَارْ خْ مَارَّا إِنِّي خَاسْ د-إِتّْڒَاغَانْ. 
”مِينْزِي كُوڒْ إِجّن ونِّي إِ غَا إِڒَاغَانْ س يِيسمْ ن سِيذِي، أَذْ إِدَّارْ.“ 
مَامّشْ إِ غَا ڒَاغَانْ خْ ونِّي ذِي وَارْ ؤُمِيننْ شَا؟ نِيغْ مَامّشْ غَا يَامْننْ ذڭْ ونِّي مِيخفْ وَارْ سْڒِينْ، نِيغْ مَامّشْ غَا سْڒنْ، مَاڒَا ؤُڒَا ذ إِجّْ وَارْ زَّايسْ إِبَارّحْ شَا؟ 
مَامّشْ إِ غَا بَارّْحنْ مَاڒَا وَارْ د-تّْوَاسّكّنْ؟ أَمْ مَامّشْ ثُورَا: ”مشْحَاڒْ ضَارْفنْ إِضَارنْ ن يِينِّي إِتّْبَارّْحنْ س ڒهْنَا، ن يِينِّي إِتّْبَارّْحنْ س ثبْرَاثِينْ ثِيصبْحَانِينْ.“ 
مَاشَا وَارْ إِدْجِي مَارَّا طَّاعنْ إِ ؤُبَارّحْ ن ڒخْبَارْ أَصبْحَانْ ن لْ-إِنْجِيلْ، مِينْزِي إِشَاعْيَا إِقَّارْ: ”أَ سِيذِي إِنُو، وِي غَا يَامْننْ ذِي ثبْرَاثْ نّغْ؟“ 
أَقَا لْ-إِيمَانْ زڭْ ؤُسْحسِّي ؤُشَا أَسْحسِّي زڭْ وَاوَاڒْ ن أَربِّي. 
مَاشَا أَذْ إِنِيغْ: ”مَا زعْمَا نِيثْنِي وَارْ سْڒِينْ؟“، ”خْزَارْ، ڒْحسّْ نْسنْ إِفّغْ-د غَارْ مَارَّا ثَامُّورْثْ، ؤُشَا أَوَاڒنْ نْسنْ غَارْ ثْنڭُّورَا ن دُّونشْثْ.“ 
مَاشَا أَذْ إِنِيغْ: ”مَا إِسْرَائِيل وَارْ ثفْهِيمْ شَا مَانْ أَيَا؟“ غَارْ ؤُمزْوَارْ مُوسَا إِنَّا: ”أَذْ ذَايْومْ ڭّغْ ثُوسْمِي زڭْ إِجّْ ن ڒْڭنْسْ إِ وَارْ إِدْجِينْ شَا ذ ڒْڭنْسْ، ؤُشَا س يِيجّْ ن ڒْڭنْسْ إِ وَارْ إِتّطِّيعنْ أَذْ ذَايْومْ ڭّغْ أَخيّقْ.“ 
ؤُشَا إِشَاعْيَا إِزْعمْ أَذْ يِينِي: ”أَقَا بَانغْ-د إِ يِينِّي وَارْ خَافِي يَارزُّونْ، أَقَا ؤُفِينْ أَيِي إِنِّي وَارْ خَافِي إِسّقْسَانْ.“ 
مَاشَا زِي جِّيهثْ ن إِسْرَائِيل إِقَّارْ: ”أَسّْ إِكْمڒْ سّْوِيژّْضغْ إِفَاسّنْ إِنُو إِ إِجّْ ن ڒْڭنْسْ إِتّْعكّْسنْ، إِعصَّانْ.“ 
