﻿لُوكَا.
6.
إِمْسَارْ ذِي سّبْثْ أَقَا يَاسُوع يُويُورْ ذڭْ إِيَّارنْ ن زَّارِيعثْ ن إِمنْذِي. ثُوغَا إِمحْضَارنْ نّسْ ڒقّْضنْ ثِيذْرِينْ، تّْحكَّانْ ثنْثْ س إِفَاسّنْ نْسنْ، تّتّنْ ثنْثْ. 
شَا ن إِفَارِيسِييّنْ نَّانْ أَسنْ: ”مَايمِّي ثتّڭّمْ مِينْ وَارْ إِحدْجْڒنْ أَذْ إِتّْوَاڭّْ ذِي سّبْثْ؟“ 
يَارَّا-د يَاسُوع، إِنَّا أَسنْ: ”مَا وَارْ ثغْرِيمْ مِينْ إِڭَّا ذَاوُوذْ ؤُمِي إِدْجُوژْ نتَّا ذ يِينِّي أَكِيذسْ؟ 
مَامّشْ يُوذفْ غَارْ ثَادَّارْثْ ن أَربِّي، إِكْسِي أَغْرُومْ ن وسْشَانْ إِ إِدْجَانْ خْ ثْزوْضَا ن سِيذِي إِ وَارْ إِحدْجْڒنْ مَاشَّا نّسْ مْغِيرْ إِ إِكهَّاننْ وَاهَا، ؤُشَا إِشَّا زَّايسْ ؤُ إِوْشَا عَاوذْ إِ يِينِّي ثُوغَا إِدْجَانْ أَكِيذسْ؟“ 
خنِّي إِنَّا أَسنْ: ”أَقَا مِّيسْ ن بْنَاذمْ ذ بَابْ ن سّبْثْ.“ 
ذڭْ إِجّْ ن وَاسّْ ن سّبْثْ نّغْنِي يُوذفْ يشُّو غَارْ ثمْزِيذَا، إِبْذَا إِسّْغَارَا. ثُوغَا ذِينْ إِجّْ ن بْنَاذمْ ونِّي ؤُمِي أَفُوسْ نّسْ إِقُوشّحْ. 
حْضَانْ ث إِمْسڒْمَاذنْ ن إِذْلِيسنْ ذ إِفَارِيسِييّنْ، مَا أَذْ إِسّْڭنْفَا ذِي سّبْثْ، حِيمَا أَذْ خَاسْ أَفنْ شَا ن تُّوهْمثْ. 
مَاشَا نتَّا يَارْڭبْ خْ إِخَارِّيصنْ نْسنْ ؤُشَا إِنَّا إِ بْنَاذمْ ونِّي ؤُمِي إِقُوشّحْ ؤُفُوسْ نّسْ: ”كَّارْ، بدّْ ذِي ڒْوسْطْ ن ثمْزِيذَا.“ ؤُمِي إِكَّارْ ؤُ ثُوغَا إِبدّْ ذِينْ، 
إِنَّا أَسنْ يَاسُوع: ”أَذْ كنِّيوْ سّقْسِيغْ خْ مِينْ إِحدْجْڒنْ أَذْ إِتّْوَاڭّْ ذِي سّبْثْ. مَا إِحدْجڒْ إِ بْنَاذمْ مَاحنْذْ أَذْ إِڭّْ ڒْخَارْ نِيغْ ڒْغَارْ، أَذْ إِسّنْجمْ إِجّْ ن ڒعْمَارْ نِيغْ أَذْ ث يَاردّدْجْ؟“ 
ثُوغَا إِخزَّارْ غَارْ مَارَّا إِنِّي ذ أَسْ د-إِنّْضنْ، إِنَّا أَسْ إِ بْنَاذمْ نِّي: ”سْوِيژّضْ أَفُوسْ نّشْ!“ إِسّْوِيژّضْ نتَّا أَفُوسْ نّسْ ؤُشَا إِذْوڒْ ؤُفُوسْ نّسْ إِصحّْ أَمْ ونّغْنِي. 
مَاشَا نِيثْنِي ذوْڒنْ شُّورنْ س زّْعَافْ ؤُشَا سِّيوْڒنْ جَارْ أَسنْ خْ مِينْ غَا ڭّنْ إِ يَاسُوع. 
إِمْسَارْ ذڭْ وُوسَّانْ نِّي، أَقَا إِفّغْ يَاسُوع غَارْ إِجّْ ن وذْرَارْ، حِيمَا أَذْ إِژَّادْجْ ؤُشَا إِسّعْذُو ذِينْ دْجِيڒثْ ثكْمڒْ، إِتّْژَادْجْ إِ أَربِّي. 
ؤُمِي ثُوغَا ذ أَزِيڒْ، إِڒَاغَا-د إِ إِمحْضَارنْ نّسْ، ؤُشَا إِخْضَارْ زَّايْسنْ ثنْعَاشْ، إِسمَّا ثنْ رُّوسُولْ.    
شِيمْعُونْ، ونِّي إِتّْكنَّانْ بُوطْرُوسْ، ’أَژْرُو‘، ذ أَنْذْرَاوُوسْ ؤُمَاسْ، ذ يَاعْقُوبْ ذ يُوحَانَّا، ذ فِيلِيبُّوسْ ذ بَارْ-ثُولُومَاوُوسْ 
ذ مَاتَّا ذ ثُومَا ذ يَاعْقُوبْ، مِّيسْ ن حَالْفَا، ذ شِيمْعُونْ ونِّي ؤُمِي تّْكنَّانْ ’أَمْعسَّابْ‘، 
يَاهُوذَا، مِّيسْ ن يَاعْقُوبْ، ذ يَاهُوذَا إِسْخَارِييُوطِي ونِّي إِدْجَانْ ذ أَغدَّارْ. 
إِهْوَا-د يَاسُوع أَكِيذْسنْ ؤُشَا إِبدّْ ذِي ڒوْضَا. ثُوغَا أَكِيذسْ إِجّْ ن ؤُبَارُّو ن إِمحْضَارنْ نّسْ ذ إِجّْ ن ؤُبَارُّو ن إِوْذَانْ زِي مَارَّا يَاهُوذِييَّا ذ ؤُرْشَالِيمْ ؤُ زِي ثْمَا ن ڒبْحَارْ غَارْ صُورْ ذ صَايْذُونْ. 
نِيثْنِي ؤُسِينْ-د حِيمَا أَذْ أَسْ سْڒنْ ؤُ أَذْ تّْوَاسّْڭنْفَانْ زِي ڒهْڒَاشْ نْسنْ، ثُوغَا أَكِيذْسنْ ؤُڒَا ذ إِنِّي إِتّْوَاغزَّانْ زِي ڒَارْيَاحْ إِمنْڭَاسْ، ؤُشَا تّْوَاسّْڭنْفَانْ. 
مَارَّا ڒْغَاشِي ثُوغَا إِتّخْسْ أَذْ ث إِحَاذَا، مِينْزِي ثُوغَا إِتّفّغْ-د زَّايسْ جّهْذْ نِّي إِسّْڭنْفَانْ كُوڒْشِي. 
إِسّْڭعّذْ ثِيطَّاوِينْ نّسْ غَارْ إِمحْضَارنْ نّسْ، إِنَّا: ”سّعْذْ نْومْ، كنِّيوْ، أَ إِمزْڒَاضْ، مِينْزِي ثَاڭلْذِيثْ ن أَربِّي إِ كنِّيوْ. 
سّعْذْ نْومْ، كنِّيوْ، إِنِّي إِدْجُوژنْ ڒخُّو، مِينْزِي كنِّيوْ أَذْ ثتّْوَاسّْجِيوْنمْ. سّعْذْ نْومْ، كنِّيوْ، إِنِّي إِتّْرُونْ ڒخُّو، مِينْزِي كنِّيوْ أَذْ ثْضحْشمْ. 
سّعْذْ نْومْ، ؤُمِي كنِّيوْ شَارّْهنْ إِوْذَانْ، تَّاژّْڒنْ خَاومْ، تّكّْوَارنْ كنِّيوْ، ؤُشَا سّْفطَّاحنْ زڭْ يِيسمْ نْومْ خْ سِّيبّثْ ن مِّيسْ ن بْنَاذمْ. 
فَارْحمْ ذڭْ وَاسّْ نِّي، نڭْزمْ س ڒفْرَاحثْ، مِينْزِي، أَقَا ڒَاجَارْ نْومْ إِمْغَارْ ذڭْ ؤُجنَّا، مِينْزِي أَمُّو ثُوغَا تّڭّنْ ڒجْذُوذْ نْسنْ ذڭْ إِنَابِييّنْ. 
مَاشَا ؤُشْثْ خَاومْ، كنِّيوْ، أَيْثْبَابْ ن وَاڭْڒَا، مِينْزِي أَقَا ثطّْفمْ أَفوّجْ نْومْ. 
ؤُشْثْ خَاومْ، كنِّيوْ، إِنِّي إِجِّيوْننْ، مِينْزِي أَذْ ثْدْجَاژمْ. ؤُشْثْ خَاومْ، كنِّيوْ إِنِّي إِضحّْشنْ ڒخُّو، مِينْزِي أَذْ ثْشضْنمْ، أَذْ ثْرُومْ. 
ؤُشْثْ خَاومْ ؤُمِي إِوْذَانْ أَذْ خَاومْ سِّيوْڒنْ مْلِيحْ، مِينْزِي أَمُّو ثُوغَا تّڭّنْ ڒجْذُوذْ نْسنْ أَكْ-ذ إِنَابِييّنْ إِسّْخَارِّيقنْ.“ 
”مَاشَا نشّْ أَذْ أَومْ إِنِيغْ، إِ يِينِّي إِتّسْڒَانْ: خْسمْ ڒْعذْيَانْ نْومْ، ثْهِيلَّامْ ذڭْ إِنِّي كنِّيوْ إِشَارّْهنْ، 
بَارْكمْ إِ يِينِّي كنِّيوْ إِنعّْڒنْ ؤُ ژَتدْجمْ خْ يِينِّي خَاومْ إِتّْعدَّانْ. 
إِ ونِّي شكْ إِوْثِينْ غَارْ ؤُمڭِّيزْ، أَرّْ أَسْ-د س ونّغْنِي، ؤُ ونِّي ذ أَشْ غَا إِكّْسنْ أَجدْجَابْ، وَارْ ث تّطّفْ أَذْ إِكْسِي ؤُڒَا ذ ثْشَامِيرْ نّشْ. 
مَارَّا ونِّي ذ أَشْ غَا إِتَّارنْ، أوْشْ أَسْ ث، ؤُ ونِّي إِ غَا إِكْسِينْ مِينْ إِدْجَانْ نّشْ، وَارْ ذ أَسْ ث تّتَّارْ. 
أَمْ مَامّشْ ثخْسذْ أَذْ أَومْ ڭّنْ إِوْذَانْ، ڭّمْ ؤُڒَا ذ كنِّيوْ ذَايْسنْ أَمنِّي. 
مَاڒَا ثخْسمْ غَارْ يِينِّي كنِّيوْ إِتّخْسنْ، مَانْ ثْشُونِي إِ غَارْومْ. أَقَا ؤُڒَا ذ إِمذْنَابْ تّخْسنْ إِنِّي إِ ثنْ إِتّخْسنْ. 
مَاڒَا ثڭّمْ ڒْخَارْ إِ يِينِّي ذ أَومْ إِتّڭّنْ ڒْخَارْ، مَانْ ثْشُونِي إِ غَارْومْ. أَقَا ؤُڒَا ذ إِمذْنَابْ تّڭّنْ أَمنِّي. 
ؤُ مَاڒَا ثَارْضْڒمْ إِ إِوْذَانْ إِ زِي ثتّْرَاجَامْ أَذْ أَومْ د-أَرّنْ، مَانْ ثْشُونِي إِ غَارْومْ؟ أَقَا ؤُڒَا ذ إِمذْنَابْ أَرْضْڒنْ إِ إِمذْنَابْ، حِيمَا أَذْ أَسنْ د-إِذْوڒْ أَمنِّي عَاوذْ. 
مَاشَا خْسمْ ڒْعذْيَانْ نْومْ، ڭّمْ ذ أَسنْ ثْشُونِي، أَرْضْڒمْ، وَارْ ثْقطّْعمْ ڒَايَاسْ إِ شَا ن يِيجّنْ. خنِّي أَذْ يِيڒِي ڒَاجَارْ نْومْ إِمْغَارْ، أَذْ ثِيڒِيمْ ذ ثَارْوَا ن ؤُمْعُودْجِي خْ كُوڒْشِي، مِينْزِي أَقَا إِتّڭّْ س تَّاسِيعْ نْ ڒْخَاضَارْ أَكْ-ذ إِعفَّاننْ ذ يِينِّي وَارْ ث إِشكَّارنْ. 
أَرحْممْ أَمْ مَامّشْ إِدْجَا بَابَاثْومْ ذ أَرْحِيمْ. 
وَارْ حكّمْ، وَارْ ثتّْوَاحَاكَاممْ. وَارْ تّْحَاسَابمْ، وَارْ ثتّْوَاحَاسْبمْ. غْفَارمْ، أَذْ أَومْ إِتّْوَاغْفَارْ. 
وْشمْ، أَذْ أَومْ إِمّوْشْ، أَذْ نْضَارنْ إِجّْ ن ڒْمُوذْ إِشْنَا، إِذقّسْ، إِتّْوَاسّنْهزّْ، إِفيّضْ ذڭْ وحْسِينْ نْومْ. مِينْزِي س ڒْمُوذْ إِ زِي غَا ثْوزْنمْ كنِّيوْ، أَذْ زَّايسْ ثتّْوَاوزْنمْ ؤُڒَا ذ كنِّيوْ.“ 
نتَّا إِنَّا أَسنْ إِجّْ ن ؤُمذْيَا: ”مَا إِزمَّارْ ؤُذَارْغَاڒْ أَذْ إِنْذهْ أَذَارْغَاڒْ؟ مَا وَارْ وطِّينْ س ثْنَاينْ إِذْسنْ ذڭْ وحْفُورْ؟ 
أَمحْضَارْ وَارْ إِدْجِي شَا حْسنْ زڭْ ؤُمْسڒْمَاذْ نّسْ، مَاشَا كُوڒْ أَمحْضَارْ نِيشَانْ أَذْ يِيڒِي أَمْ ؤُمْسڒْمَاذْ نّسْ. 
مَايمِّي ثْخزَّارذْ غَارْ ؤُخشِّيوْ، ثنِّي ذِي ثِيطّْ ن ؤُمَاشْ، مَاشَا ثَاحْنَاشْثْ، ثنِّي ذِي ثِيطّْ نّشْ، وَارْ كِيسْ ثڒْهِيذْ؟ 
مَامّشْ ثتّڭّذْ ثقَّارذْ إِ ؤُمَاشْ: ’ؤُمَا، أجّْ أَيِي أَذْ أَشْ د-سُّوفّْغغْ أَخشِّيوْ إِ ذَايكْ ذِي ثِيطّْ نّشْ!‘، ؤُ خْزَارْ، شكْ سِيمَانْثْ نّشْ وَارْ ثتّْوِيڒِيذْ شَا ثَاحْنَاشْثْ إِ غَاركْ ذِي ثِيطّْ نّشْ. شكْ، أَ أَمْنَافقْ، سُوفّغْ-د أَمزْوَارُو ثَاحْنَاشْثْ نِّي غَاركْ ذِي ثِيطّْ نّشْ، خنِّي أَذْ ثتّْوَاڒِيذْ مْلِيحْ مَاحنْذْ أَذْ ثسُّوفّْغذْ أَخشِّيوْ زِي ثِيطّْ ن ؤُمَاشْ.“ 
”وَارْ ذِينْ بُو ثْشجَّارْثْ ثَاصبْحَانْثْ إِ د-إِسّْغمَّاينْ ڒْغِيدْجثْ ثخْسَارْ، نِيغْ ثَاشجَّارْثْ إِخْسَارنْ إِ د-إِسّْغمَّاينْ ڒْغِيدْجثْ ثَاصبْحَانْثْ.    
مِينْزِي كُوڒْ ثَاشجَّارْثْ ثتّْوَاسّنْ س ڒْغِيدْجثْ نّسْ، مِينْزِي وَارْ يْرُونْ زڭْ إِسنَّاننْ ڒْبَاشُورْ، ؤُ وَارْ ڒقّْضنْ أَضِيڒْ زِي شْبَارْقْ أَكْ-ذ إِسنَّاننْ. 
بْنَاذمْ أَصبْحَانْ زِي ڒْكنْزْ ن وُوڒْ نّسْ ذ أَصبْحَانْ أَذْ إِسُّوفّغْ مِينْ إِصبْحنْ ؤُشَا بْنَاذمْ أَعفَّانْ زِي ڒْكنْزْ ن وُوڒْ نّسْ ذ أَعفَّانْ أَذْ د-إِسُّوفّغْ ثُوعفّْنَا. س مِينْ زِي إِشُّورْ وُوڒْ، زَّايسْ سَّاوَاڒنْ إِينْشِيشنْ.“ 
”مَايمِّي ذ أَيِي ثتّْڒَاغَامْ: ’أَ سِيذِي، أَ سِيذِي!‘ ؤُشَا وَارْ ثتّڭّمْ شَا مِينْ قَّارغْ؟ 
مَارَّا ونِّي غَارِي إِ د غَا يَاسنْ، أَذْ إِسڒْ إِ وَاوَاڒنْ إِنُو ؤُشَا أَذْ زَّايْسنْ إِڭّْ، نشّْ أَذْ أَومْ سّشْنغْ مِينْ ذِي يَارْوسْ نتَّا. 
نتَّا يَارْوسْ ذڭْ إِجّْ ن بْنَاذمْ إِ إِبْنَانْ إِشْثْ ن ثَادَّارْثْ. نتَّا إِغْزَا، إِحْفَارْ ؤُشَا إِسَّارْسْ ذْسَاسْ خْ سّدْجَاحْ. ؤُمِي د-ثُوسَا سّحْڒثْ، ثْقبّضْ ڒْحمْڒثْ ثَادَّارْثْ نِّي ؤُشَا وَارْ ثْزمَّارْ أَذْ ت ثسّنْهزّْ، مِينْزِي ثُوغَا ذْسَاسْ نّسْ خْ سّدْجَاحْ. 
مَاشَا ونِّي إِتّسْڒَانْ وَارْ إِتّڭّْ، يَارْوسْ ذِي بْنَاذمْ إِ إِبْنَانْ ثَادَّارْثْ نّسْ خْ ثمُّورْثْ بْڒَا ذْسَاسْ. ؤُمِي ت-إِ-د-ثْقبّضْ ڒْحمْڒثْ، ڒخْذنِّي ثوْضَا. ثُوغَا أَفَارْثكْ ن ثَادَّارْثْ نِّي ذ أَمقّْرَانْ.“ 
