﻿حِيزْقِييَالْ.
31.
ذڭْ ؤُسڭّْوَاسْ وِيسّْ حِيطَاشْ، ذڭْ ؤُيُورْ وِيسّْ ثْڒَاثَا، ذڭْ وَاسّْ أَمزْوَارُو ن ؤُيُورْ إِمْسَارْ بلِّي يُوسَا-د غَارِي وَاوَاڒْ ن سِيذِي، إِنَّا: 
”أَ مِّيسْ ن بْنَاذمْ، إِنِي إِ فِيرْعُونْ، أَجدْجِيذْ ن مِيصْرَا، ؤُ إِ مَارَّا ڒْغَاشِي نّسْ إِنْهوْڒنْ: ’وِي أَكِيذكْ إِمْقُودَّانْ س مَارَّا ڒمْغَارثْ نّشْ؟ 
خْزَارْ، ثُوغَا أَشُّورْ ذ ثَاشجَّارْثْ ن ثنْڭلْثْ خْ إِذُورَارْ ن لُوبْنَانْ أَكْ-ذ ثْسضْوِينْ إِشْنَانْ ذ ثِيفْرَايْ إِ إِتِّيشنْ ثِيڒِي مْلِيحْ ؤُ أَكْ-ذ ثِيذِّي ذ أَزِيرَارْ يُوعْڒَانْ، أَڒَامِي ثُوشّنْثْ نّسْ ثِيوضْ-د أَڒْ إِسيْنُوثنْ. 
أَمَانْ أَرِّينْ ت أَذْ إِيْمَا، أَمَانْ إِهوْڒنْ سّْڭعّْذنْ ت أَطَّاسْ. إِغزْرَانْ ن وَامَانْ نّسْ سِّيزّْڒنْ ذڭْ ونّضْ ن ثبْهِيرْثْ نّسْ ؤُشَا أَمَانْ إِهوْڒنْ أَرِّينْ إِغزْرَانْ نّسْ أَذْ رَاحنْ غَارْ مَارَّا ثِيشجُّورَا ن ييَّارْ. 
خْ ؤُيَا إِتّْوَاسُّوعْڒَا ثِيذِّي نّسْ خْ مَارَّا ثِيشجُّورَا ن ييَّارْ، ؤُ ثِيسضْوِينْ نّسْ ذوْڒنْثْ س وَاطَّاسْ ؤُ إِفثْوَانْ نّسْ زُّوڭَّارْثنْ س وَامَانْ إِفيّْضنْ، خْمِي ثُوغَا ثسّْغمِّي. 
مَارَّا إِجْضَاضْ ن ؤُجنَّا ڭِّينْ ڒْعُوشّْ نْسنْ ذِي ثْسضْوِينْ نّسْ، مَارَّا ڒْمَاڒْ ن ييَّارْ فرْخنْ سَاذُو إِفثْوَانْ نّسْ ؤُ مَارَّا ڒڭْنُوسْ مْغَارنْ ثُوغَا تّْغِيمَانْ ذِي ثِيڒِي نّسْ. 
ثُوغَا-ت ثشْنَا س ڒمْغَارثْ نّسْ ؤُ س ثُوزّڭَّارْثْ ن ثْسضْوِينْ نّسْ، مَاغَارْ أَژْوَارْ نّسْ ثُوغَا-ث أَكْ-ذ وَاطَّاسْ ن وَامَانْ. 
ثِيشجُّورَا ن ثنْڭلْثْ ذِي جّنّثْ ن أَربِّي وَارْ خَاسْ عْذُونْثْ، ثِيشجُّورَا ن ؤُمرْزِي وَارْ سكّْوِينْثْ ثْسضْوِينْ نّسْ ؤُشَا ثِيشجُّورَا ن ذُولْبْ وَارْ سكّْوِينْثْ إِفثْوَانْ نّسْ. ؤُڒَا ذ إِشْثْ ن ثْشجَّارْثْ ذِي جّنّثْ ن أَربِّي ثَارْوسْ ذَايسْ ذڭْ وَاژْرِي نّسْ.    
ڭِّيغْ ت ثشْنَا أَكْ-ذ وَاطَّاسْ ن ثْسضْوِينْ نّسْ، أَڒَامِي زَّايسْ ؤُسْمنْثْ مَارَّا ثِيشجُّورَا ن عَاذْنْ، ثِينِّي ثُوغَا ذِي جّنّثْ ن أَربِّي.‘ “ 
”س ؤُيَا، أَمُّو إِ إِقَّارْ سِيذِي إِنُو، سِيذِي: ’ؤُمِي ثسّْڭعّْذذْ إِخفْ نّمْ س ثِيذِّي نّمْ، وَاهْ نتَّاثْ ثڭَّا ثُوشّنْثْ نّسْ جَارْ إِسيْنُوثنْ ؤُ ؤُڒْ نّسْ إِسّْڭعّذْ إِخفْ نّسْ زِي سِّيبّثْ ن ڒُوعْڒَا نّسْ، 
س ؤُينِّي وْشِيغْ ت ذڭْ ؤُفُوسْ ن ونِّي ذ أَمْزمَّارْ قَاعْ جَارْ ڒڭْنُوسْ، ونِّي إِڭِّينْ س ثِيذتّْ أَمْ د-إِتّْڒِيقنْ أَكْ-ذ ثُوعفّْنَا نّسْ، ؤُشَا أَمُّو إِ ؤُژّْڒغْ خَاسْ. 
زذْمنْ ت إِبَارَّانِييّنْ، ڒڭْنُوسْ إِقسْحنْ أَطَّاسْ، زذْمنْ ث ؤُشَا جِّينْ ت. ثِيسضْوِينْ نّسْ وْضَانْثْ خْ إِذُورَارْ ؤُ ذِي مَارَّا ثِيغْزُورْثِينْ، إِفثْوَانْ نّسْ تّْوَارْژنْ ذِي مَارَّا ثِيغزْرَاثِينْ ن ثمُّورْثْ ؤُ مَارَّا ڒڭْنُوسْ ن ثمُّورْثْ هْوَانْ-د زِي سَاذُو ثِيڒِي نّسْ ؤُشَا جِّينْ ت. 
مَارَّا إِجْضَاضْ ن ؤُجنَّا زذْغنْ خْ ؤُكشُّوضْ نّسْ نِّي إِوْضَانْ ؤُشَا مَارَّا ڒْمَاڒْ ن ييَّارْ ثُوغَا أَثنْ خْ إِفثْوَانْ نّسْ. 
نشّْ ڭِّيغْ ت، حِيمَا مَارَّا ثِيشجُّورَا وَارْ ذِيكّْوِيڒنْثْ عَاذْ تّْنفّْخنْثْ س ثِيذِّي نْسنْثْ ؤُشَا أَذْ ڭّنْثْ ثُوشّنْثْ نْسنْ ذڭْ إِسيْنُوثنْ، ؤُ مَارَّا ثِيشجُّورَا نِّي إِسْوِينْ أَمَانْ س ؤُفيّضْ، وَارْ تّْبذِّينْثْ عَاذْ س يِيخفْ نْسنْثْ ذِي نّْفَاخثْ نْسنْثْ، مَاغَارْ نِيثنْثِي مَارَّا تّْوَاموْشنْثْ إِ ڒْموْثْ، غَارْ ڒَادْجَاغْ ن ثمُّورْثْ، ذِي ڒْوسْطْ ن ثَارْوَا ن بْنَاذمْ، أَكْ-ذ إِنِّي إِهكّْوَانْ ذڭْ وحْفُورْ ن ونْضڒْ.‘ “ 
”أَمُّو إِ إِقَّارْ سِيذِي إِنُو، سِيذِي: ’ذڭْ وَاسّْ نِّي ذِي ثهْوَا غَارْ ڒَاخَارْثْ، ڭِّيغْ إِجّْ وشْضَانْ. ذِي طّْوعْ نّسْ ذْڒِيغْ أَمَانْ إِهوْڒنْ ؤُشَا سّْبدّغْ إِغزْرَانْ نّسْ ؤُشَا فشْڒنْ وَامَانْ إِمْغَارنْ. ذِي طّْوعْ نّسْ سّْبَارّشْنغْ إِذُورَارْ ن لُوبْنَانْ ؤُشَا مَارَّا ثِيشجُّورَا ن ييَّارْ شضْننْثْ خَاسْ. 
س دّْرِيزْ ن ؤُوطُّو نّسْ سَّارْجِيجغْ ڒڭْنُوسْ، ؤُمِي ت سّهْوِيغْ غَارْ ڒَاخَارْثْ أَكْ-ذ إِنِّي إِهكّْوَانْ ذڭْ وحْفُورْ ن ونْضڒْ. مَارَّا ثِيشجُّورَا ن عَاذْنْ، ثِينِّي إِعِيزّنْ أَطَّاسْ ذ ثِينِّي إِشْنَانْ قَاعْ زِي لُوبْنَانْ، ثِينِّي إِسْوِينْ أَطَّاسْ ن وَامَانْ مَارَّا، أَقَا تّْوَاسّْفوّْجنْثْ س مَانْ أَيَا ذِي ڒَادْجَاغْ ن ثمُّورْثْ. 
ؤُڒَا ذ نِيثنْثِي هْوَانْثْ أَكِيذسْ غَارْ ڒَاخَارْثْ، غَارْ إِنِّي إِتّْوَانْغنْ س سِّيفْ، إِنِّي ثُوغَا أَغِيڒْ نّسْ إِجهْذنْ، إِنِّي ثُوغَا إِقِّيمنْ ذِي ثِيڒِي نّسْ ذِي ڒْوسْثْ ن ڒڭْنُوسْ. 
أَكْ وِي ثْسَاوِيذْ أَمُّو ذِي ڒْعزّْ ذ ڒمْغَارثْ جَارْ ثْشجُّورَا ن عَاذْنْ؟ وَاخَّا أَمنِّي أَذْ ثتّْوَاسّهْوِيذْ أَكْ-ذ ثْشجُّورَا نْ عَاذْنْ أَڒْ رَادْجَاغْ ن ثمُّورْثْ. أَذْ ثْبُوزّْڒذْ ذِي ڒْوسْثْ ن يِينِّي وَارْ إِتّْوَاخثْننْ، أَكْ-ذ إِنِّي إِتّْوَانْغنْ س سِّيفْ. ؤُشَا أَذْ إِنِينْ: وَا ذ فِيرْعُونْ ذ مَارَّا ڒْغَاشِي نّسْ إِنْهوْڒنْ!‘، أَمُّو إِ إِقَّارْ سِيذِي إِنُو، سِيذِي.“ 
