﻿حِيزْقِييَالْ.
28.
يُوسَا-د غَارِي وَاوَاڒْ ن سِيذِي، إِنَّا: 
”أَ مِّيسْ ن بْنَاذمْ، إِنِي إِ ڒْحَاكمْ ن صُورْ: ’أَمُّو إِ إِقَّارْ سِيذِي إِنُو، سِيذِي: مِينْزِي ثسّْڭعّْذذْ ؤُڒْ نّشْ، ثنِّيذْ: نشّْ ذ أَربِّي، نشّْ تّْغِيمِيغْ خْ ڒْكُورْسِي ن أَربِّي ذِي ڒْوسْطْ ن ڒبْحُورْ!، وَاخَّا شكْ ذ بْنَاذمْ، وَارْ ثدْجِيذْ ذ أَربِّي، أَقَا ثڭِّيذْ ؤُڒْ نّشْ خنِّي أَمْ وُوڒْ ن أَربِّي. 
خْزَارْ، شكْ ذ أَمِيغِيسْ خْ ذَانِييِيلْ، وَارْ ذِينْ إِدْجِي ؤُڒَا ذ إِجّْ ن سِّيرّْ خَاكْ إِنُّوفَّارنْ. 
س ثِيغِيثْ نّشْ ذ ڒفْهَامثْ نّشْ أَقَا ثسّْمُونذْ إِ يِيخفْ نّشْ إِڭڒْوَانْ مْغَارنْ ؤُ ثڭِّيذْ ؤُرغْ ذ نُّوقَارْثْ ذڭْ إِخَّامنْ نّشْ ن ثْخُوبَايْ. 
س ثِيغِيثْ نّشْ إِمْغَارنْ غَارْ ثْسبَّابْثْ نّشْ، ثَارْنِيذْ ذڭْ إِڭڒْوَانْ نّشْ ؤُشَا ذِي سِّيبّثْ ن إِڭڒْوَانْ نّشْ مْغَارنْ، إِسّْڭعّذْ وُوڒْ نّشْ إِخفْ نّسْ.‘ 
س ؤُيَا، أَمُّو إِ إِقَّارْ سِيذِي إِنُو، سِيذِي: ’ؤُمِي ثڭِّيذْ ؤُڒْ نّشْ أَمْ وُوڒْ ن أَربِّي، 
س ؤُيَا، خْزَارْ، نشّْ أَذْ خَاكْ د-أَوْيغْ إِبَارَّانِييّنْ، ڒڭْنُوسْ إِقسْحنْ أَطَّاسْ. نِيثْنِي أَذْ د-جبْذنْ ڒسْيُوفْ نْسنْ ضِيدّْ إِ وژْرِي ن ثِيغِيثْ نّشْ ؤُشَا أَذْ سّْفسْذنْ ثِيسِّيقْثْ نّشْ. 
نِيثْنِي أَذْ شكْ سّهْوَانْ غَارْ وحْفُورْ ن ثُورْصُوضِي ؤُشَا أَذْ ثمّْثذْ ڒْموْثْ ن يِينِّي إِتّْوَاسّْنُوقّْبنْ ذڭْ وُوڒْ ن ڒبْحُورْ. 
مَا ثْزعْمذْ س ثِيذتّْ أَذْ ثِينِيذْ زَّاثْ إِ وُوذمْ ن يِينِّي شكْ إِ غَا إِنْغنْ: ’نشّْ ذ أَربِّي‘؟ أَقَا شكْ ذ بْنَاذمْ، وَارْ إِدْجِي ذ أَربِّي ذڭْ ؤُفُوسْ ن يِينِّي إِ شكْ إِ غَا إِذدْجنْ. 
أَذْ ثمّْثذْ س ؤُفُوسْ ن إِبَارَّانِييّنْ أَمْ يِينِّي وَارْ إِتّْوَاخثْننْ، مَاغَارْ نشّْ نِّيغْ ث!، أَمُّو إِ إِقَّارْ سِيذِي إِنُو، سِيذِي.‘ “ 
يُوسَا-د غَارِي وَاوَاڒْ ن سِيذِي، إِنَّا: 
”أَ مِّيسْ ن بْنَاذمْ، سْڭعّذْ إِجّْ ن يزْڒِي ن وشْضَانْ خْ ؤُجدْجِيذْ ن صُورْ ؤُشَا إِنِي أَسْ: ’أَمُّو إِ إِقَّارْ سِيذِي إِنُو، سِيذِي: أَ شكْ، ونِّي ذ ڒْخَاثمْ ن ڒبْنِي إِفَارْزنْ، ثشُّورذْ س ثِيغِيثْ ؤُ ثْكمّْڒذْ ذڭْ وژْرِي! 
ثُوغَا شكْ ذِي عَاذْنْ، ذِي جّنّثْ ن أَربِّي. ثُوغَا ذْڒِينْ شكْ س عْڒَامْ كُوڒْ إِژْرَا إِغْڒَانْ، س ڒعْقَاقْ، ثْيَاقُوثْ ذ ذْيَامَانْثِي، س ثخْرِيسُولِيثْ، ؤُنِيكْسْ ذ يَاسْبِيسْ، س صَافِّيرْ أَزِيزَا، كَارْبُونْكلْ، سْمَارَاخْثْ ذ وُورغْ. ڒْْخذْمثْ ن إِبنْذِيرنْ نّشْ ذ ؤُبَارُّو ن ثمْغَارِينْ نّشْ ثُوغَا ذَايكْ، ذڭْ وَاسّْ نِّي ذِي د-ثتّْوَاخڒْقذْ ثُوغَا وجْذنْثْ. 
ثُوغَا شكْ ذ إِجّْ ن ؤُكِيرُوبْ ذ أَمذْهُونْ إِسّْذُورُّوينْ، أَمُّو إِ ڭِّيغْ شكْ ذِينْ. ثُوغَا شكْ خْ وذْرَارْ إِقدّْسنْ ن أَربِّي، ثڭُّورذْ ذِي ڒْوسْطْ ن إِژْرَا إِتّحْذُوذُوقنْ. 
ثُوغَا شكْ ثْكمّْڒذْ ذڭْ إِبْرِيذنْ نّشْ، زڭْ وَاسّْ نِّي ذِي د-ثتّْوَاخڒْقذْ، أَڒْ ذَايكْ ثتّْوَافْ ڒْمُوعْصِييّثْ. 
س ڒمْغَارثْ ن ثْسبَّابْثْ نّشْ، إِشُّورْ ذَاخڒْ نّشْ س ڒخْشُونثْ ؤُشَا خنِّي ثخْضِيضْ. س ؤُيَا أَذْ شكْ سِّيڭّْوجغْ خْ وذْرَارْ ن أَربِّي، أَذْ شكْ مْحِيغْ زِي ڒْوسْطْ ن إِژْرَا إِتّحْذُوذُوقنْ، أَ شكْ أَكِيرُوبْ إِسّْذُورُّوينْ! 
ؤُڒْ نّشْ إِسّْڭعّذْ إِخفْ نّسْ س وَاژْرِي نّشْ، أَقَا ثسّْعِيدْجْثذْ ثِيغِيثْ نّشْ ذِي طّْوعْ ن ثِيسِّيقْثْ نّشْ إِعفَّارنْ. نشّْ نْضَارغْ شكْ خْ ثمُّورْثْ ؤُشَا ڭِّيغْ شكْ زَّاثْ إِ وُوذمْ ن إِجدْجِيذنْ، أَڒَامِي زمَّارنْ أَذْ غَاركْ خْزَارنْ س ڒْحڭْرَا. 
زِي سِّيبّثْ ن وَاطَّاسْ ن ڒْمُوعْصِييّثْ نّشْ ذ ڒْغشّْ ن ثْسبَّابْثْ نّشْ، أَقَا ثْغسْبذْ ثِيزَاوِييِّينْ نّشْ إِقدّْسنْ. س ؤُينِّي أَرِّيغْ ثِيمسِّي ثفّغْ-د زِي ڒْوسْطْ نّشْ، ثنِّي شكْ إِشّنْ، ؤُشَا أَرِّيغْ شكْ ذ إِغّضْ خْ ثمُّورْثْ زَّاثْ إِ ثِيطَّاوِينْ ن مَارَّا إِنِّي شكْ إِتّْوَاڒَانْ. 
مَارَّا إِنِّي شكْ إِسّْننْ جَارْ ڒڭْنُوسْ، أَرجْفنْ زَّايكْ. ثْذوْڒذْ ذ إِجّْ ن ؤُمذْيَا ن وَارْجفْ ؤُ وَارْ ثتِّيڒِيذْ عَاذْ إِ ڒبْذَا.‘ “ 
يُوسَا-د غَارِي وَاوَاڒْ ن سِيذِي، إِنَّا: 
”أَ مِّيسْ ن بْنَاذمْ، أَرّْ ؤُذمْ نّشْ غَارْ صِيذُونْ ؤُشَا نَابّْ ضِيدّْ نّسْ، 
ؤُشَا إِنِي: ’أَمُّو إِ إِقَّارْ سِيذِي إِنُو، سِيذِي: خْزَارْ، نشّْ أَقَا أَيِي ضِيدّْ نّمْ، أَ ثَانْذِينْثْ ن صِيذُونْ! نشّْ أَذْ تّْوَاسّْعُودْجغْ ذِي ڒْوسْثْ نّشْ. ؤُشَا نِيثْنِي أَذْ سّْننْ بلِّي نشّْ ذ سِيذِي خْمِي إِ غَا ڭّغْ ڒحْكَامَاثْ ذِي صِيذُونْ ؤُشَا أَذْ ذَايسْ تّْوَاقدّْسغْ. 
أَذْ سّكّغْ طَّاعُونْ ذِي ڒْوسْطْ نّسْ ؤُڒَا ذ إِذَامّنْ ذڭْ إِبْرِيذنْ نّسْ ؤُ ونِّي إِتّْوَانْغنْ أَذْ إِوْضَا ذِي ڒْوسْطْ نّسْ س سِّيفْ نِّي خَاسْ إِ غَا يِيڒِينْ زڭْ ونّضْ نّسْ. خنِّي أَذْ سّْننْ، بلِّي نشّْ ذ سِيذِي، 
ؤُشَاعمَّارْصْ عَاذْ أَذْ يِيڒِي إِ ثَادَّارْثْ ن إِسْرَائِيل أَسنَّانْ إِقبْشنْ نِيغْ ثَازڭّْوَارْثْ إِتّقّْسنْ زڭْ إِنِّي ذ أَسنْ د-إِنّْضنْ، إِنِّي ثنْ إِسّحْقَارَانْ. نِيثْنِي أَذْ سّْننْ بلِّي نشّْ ذ سِيذِي، ذ سِيذِي إِ دْجِيغْ.‘ “ 
”أَمُّو إِ إِقَّارْ سِيذِي إِنُو، سِيذِي: ’خْمِي غَا سّْمُونغْ ثَادَّارْثْ ن إِسْرَائِيل زِي ڒڭْنُوسْ نِّي مَانِي تّْوَابزّْعنْ نِيثْنِي ؤُشَا نشّْ سّشْنغْ إِخفْ إِنُو ذ أَمْقدّسْ ذَايْسنْ زَّاثْ إِ ثِيطَّاوِينْ ن ڒڭْنُوسْ، خنِّي أَذْ زذْغنْ ذِي ثمُّورْثْ نِّي وْشِيغْ إِ ؤُمْسخَّارْ إِنُو يَاعْقُوبْ. 
نِيثْنِي أَذْ زذْغنْ ذِي ڒَامَانْ ؤُشَا أَذْ بْنَانْ ثُوذْرِينْ، أَذْ ڭّنْ إِمَارْجَاعنْ ن ؤُضِيڒْ ؤُ أَذْ ذَايْسنْ ژُّونْ ثِيزَايَارِينْ، وَاهْ، نِيثْنِي أَذْ ذِينْ زذْغنْ ذِي ڒَامَانْ أَوَارْنِي ڒَامِي ڭِّيغْ ڒحْكَامَاثْ خْ مَارَّا إِنِّي ثنْ إِكشّْضنْ زِي ثمُّورَا إِ ذ أَسنْ د-إِنّْضنْ. خنِّي أَذْ سّْننْ بلِّي نشّْ ذ سِيذِي، أَربِّي نْسنْ.‘ “ 
