﻿إِزْڒِي خْ إِزْڒَانْ.
6.
”مَانِي يُويُورْ لِّيفْ نّمْ، أَ شمْ إِشْنَانْ قَاعْ خْ ثمْغَارِينْ؟ مَانِي يَارَّا س ؤُزدْجِيفْ لِّيفْ نّمْ؟ نشِّينْ نخْسْ أَذْ خَاسْ نَارْزُو أَكِيذمْ!“ 
”لِّيفْ إِنُو إِهْوَا غَارْ ؤُحْوِيشْ نّسْ، غَارْ ثْبُوذَا س ڒعْطُورْ، حِيمَا أَذْ يَارْوسْ ذڭْ إِحْوِيشنْ، حِيمَا أَذْ إِسّْمُونْ ثِيلِيلِّيشِينْ. 
نشّْ زڭْ لِّيفْ إِنُو، ؤُ لِّيفْ إِنُو أَقَا-ث إِنُو، نتَّا ذ ونِّي يَاركّْوْسنْ جَارْ ثْلِيلِّيشِينْ.“ 
”شمْ ثْصبْحذْ، أَ ثَامدُّوكّتْشْ إِنُو، أَمشْنَاوْ ثِيرْصَا، ثشْنِيذْ أَمْ ؤُرْشَالِيمْ، ثسَّاڭّْوَاذذْ أَمْ يِيسذِّييّنْ ن ڒْعسْكَارْ س إِبَانْذُوثنْ نْسنْ. 
كّسْ ثِيطَّاوِينْ زَّايِي، مَاغَارْ نِيثنْثِيغضْڒنْثْ أَيِي إِفَادّنْ أَطَّاسْ. أَشُوَّافْ نّمْ أَمْ ثْحِيمَارْثْ ن إِغَايْضنْ إِ د-إِهكّْوَانْ زڭْ إِذُورَارْ ن جِيلْعَاذْ. 
ثِيغْمَاسْ نّمْ ڭِّينْثْ أَمْ ثْحِيمَارْثْ ن وُودْجِي، إِ د-إِتّْڭعَّاذنْ زڭْ ومْشَانْ ن ؤُصبّنْ. مَارَّا ثِيخسْوِينْ ؤُرْونْثْ ثَاشْنِيوْثْ، وَارْ ثقِّيمْ إِشْثْ نْبْڒَا إِحنْجِيرنْ. 
لْحنْكَاثْ نّمْ أَمْ ثْرمَّانْثْ إِبْضَانْ أَوَارْنِي إِ لّْثَامْ نّمْ. 
أَقَا ذِينْ ستِّينْ ن ثْجدْجِيذِينْ ذ ثْمنْيِينْ ن ثِييَّا، ؤُڒَا ذ ثِيعْزَارِييِّينْ بْڒَا ڒحْسَابْ. 
وحّْذسْ نتَّاثْ، ثَاذْبِيرْثْ إِنُو، ثنِّي إِكمّْڒنْ إِنُو، أَينِّي ن يسِّيسْ ن يمَّاسْ، نتَّاثْ ذ ثنِّي إِفَارْزنْ غَارْ ثنِّي إِ ذ أَسْ د-يُورْونْ. مَاڒَا زْڒِينْثْ ت ثْيسِّيثْ، أَذْ ت سّْعُودْجَانْثْ، ثِيجدْجِيذِينْ ذ ثِييَّا أَذْ ت سّمْغَارنْثْ.“ 
”مِينْ ثعْنَا ثنِّي د-إِسِّيجّنْ أَمْ ثْفَاوْثْ ن ڒفْجَارْ، ثشْنَا أَمْ ثْزِيرِي إِقفْڒنْ، ثصْفَا أَمْ ثْفُوشْثْ يَارقّنْ، ثسَّاڭّْوَاذْ أَمْ يِيسذِّييّنْ ن ڒْعسْكَارْ س إِبَانْذُوثنْ؟“ 
”نشّْ حْوِيغْ غَارْ ثحْوِيشْثْ ن ثْشجُّورَا ن ثغْيَاشْثْ حِيمَا أَذْ ژَترغْ أَغمُّويْ إِبدّنْ ذِي ثغْزُورْثْ، حِيمَا أَذْ ژَترغْ مَا ثَازَايَارْثْ ثسُّوفّغْ-د، مَا ثِيشجُّورَا ن أَرمَّانْ تّْنوَّارنْثْ. 
ثُوغَا وَارْ د-أَرِّيغْ ثَايْنِيثْ أَقَا ڭِّيغْ إِخفْ إِنُو ذڭْ إِكَارُّوثنْ ن ڒْڭنْسْ إِنُو إِڭلّْذنْ.“ 
