﻿إِزْڒِي خْ إِزْڒَانْ.
4.
”خْزَارْ، ثشْنِيذْ شمْ، ثَامدُّوكّتْشْ إِنُو، شمْ ثشْنِيذْ. أَوَارْنِي لّْثَامْ نّمْ ثِيطَّاوِينْ نّمْ ذ ثِيذْبِيرِينْ. أَشُوَّافْ نّمْ أَمْ ثْحِيمَارْثْ ن إِغَايْضنْ إِ د-إِهكّْوَانْ زڭْ إِذُورَارْ ن جِيلْعَاذْ. 
ثِيغْمَاسْ نّمْ ڭِّينْثْ أَمْ ثْحِيمَارْثْ ن وُودْجِي ڒْسِينْ ثنْثْ، إِنِّي د-إِتّْڭعَّاذنْ زڭْ ومْشَانْ ن ؤُصبّنْ، مَارَّا ثِيخسْوِينْ ؤُرْونْثْ ثَاشْنِيوِينْ، وَارْ ثقِّيمْ إِشْثْ نْبْڒَا إِحنْجِيرنْ. 
إِينْشِيشنْ نّمْ أَمْ ؤُفِيڒُو أَزڭّْوَاغْ إِحذْقنْ، إِصْبحْ ؤُقمُّومْ نّمْ. لْحنْكَاثْ نّمْ أَمْ ثْرمَّانْثْ إِبْضَانْ سَاذُو لّْثَامْ نّمْ. 
إِرِي نّمْ أَمْ صُّومْعثْ ن ذَاوُوذْ، بْنَانْ ت أَمْ ثسْفِيفِينْ ن ثْسدّْيِينْ. أَڒفْ ن ثْسدَّارِييِينْ ن ؤُعسْكَارِي ؤُيْڒنْثْ غَارسْ، مَارَّا أَمْ ثْسدَّارِييِينْ إِقسْحنْ إِقُورَارنْ ن أَيْثْ ن بُو-ثغْرُوضْثْ. 
إِذْمَارنْ نّمْ ڭِّينْ أَمْ ثْنَاينْ ن إِغَايْضنْ إِمژْيَاننْ، أَمْ وَاشْنِيونْ ن ثْغَايْضثْ ن وزْغَارْ، تّْهدَّانْ ذِي ثْلِيلِّيشِينْ. 
أَڒْ إِ غَا إِسْمضْ وَاسّْ ؤُ أَذْ أَروْڒنْثْ ثِيڒِيوِينْ، أَذْ ؤُيُورغْ غَارْ وذْرَارْ ن ؤُمِيرُّو، غَارْ ثوْرِيرْثْ ن جَّاوِي. 
شمْ مَارَّا ذ أَژْرِي، ثَامدُّوكّتْشْ إِنُو، وَارْ ذَايمْ ؤُڒَا ذ إِجّْ نْ ڒْعِيبْ. 
أَسْ-د أَكِيذِي زڭْ إِذُورَارْ ن لُوبْنَانْ، أَ ثَاسْڒِيثْ إِنُو، أَسْ-د أَكِيذِي زڭْ إِذُورَارْ ن لُوبْنَانْ، صْوذْ-د زِي ثْقِيشّثْ ن أَمَانَا، زِي ثْقِيشّثْ ن شَانِيرْ ذ هِيرْمُونْ، زِي غَارْ ڒْمَارَاڭحْ ن وَايْرَاذنْ، زڭْ إِذُورَارْ ن إِغِيڒَاسنْ. 
ثُوشَارذْ أَيِي ؤُڒْ، أَ ؤُتْشْمَا، أَ ثَاسْڒِيثْ إِنُو، وَاهْ ثُوشَارذْ أَيِي ؤُڒْ، س إِشْثْ ن ڒْْخزْرَاثْ ن ثِيطَّاوِينْ نّمْ، س إِشْثْ ن ثْسدّشْثْ ن يِيرِي نّمْ. 
مَامّشْ ثشْنَا ؤُسْحِينّبْ نّمْ، أَ ؤُتْشْمَا، أَ ثَاسْڒِيثْ إِنُو، مشْحَاڒْ ثصْبحْ ؤُسْحِينّبْ نّمْ خْ بِينُو، ڒفْوَاحثْ ن زّشْثْ نّمْ خْ مَارَّا ڒعْطُورْ. 
زڭْ إِينْشِيشنْ نّمْ، أَ ثَاسْڒِيثْ إِنُو، ثتُّوذُومْ ثَامّنْثْ ن ثغْرَاصْثْ، ثَامّنْثْ ذ ؤُغِي سَاذُو إِڒسْ نّمْ، ؤُ ڒفْوَاحثْ ن وَارُّوضْ نّمْ أَمْ ڒفْوَاحثْ ن إِذُورَارْ ن لُوبْنَانْ. 
أَ ؤُتْشْمَا، أَ ثَاسْڒِيثْ إِنُو، شمْ ذ ثَاحْوِيشْثْ إِبلّْعنْ، ذ ثَاڒَا إِقّْننْ، ذ ڒْعُونْصَارْ إِشمّْعنْ. 
ڒفْرُوعْ إِ زَّايمْ إِسّْنطِّيينْ ذ جنّثْ ن ثْرمَّانِينْ، س ڒْغِيدْجثْ إِصبْحنْ أَطَّاسْ، نّوَّاشْ ن ڒْحنِّي ذ صّنْبلْ، 
صّنْبلْ ذ زّْعفْرَانْ، س ؤُغَانِيمْ ؤُحمُّومْ إِتّْفُوحنْ أَكْ-ذ ڒْقَارْفَا، عْڒَامْ كُوڒْ ثِيشجُّورَا ن جَّاوِي، مِيرُّو ذ وشْفِيڒْ، أَكْ-ذ مَارَّا ڒعْطُورْ إِصبْحنْ قَاعْ. 
أَ ثَاڒَا ن إِحْوِيشنْ، أَنُو ن وَامَانْ إِدَّارنْ، إِنِّي د-إِتَّازّْڒنْ زڭْ إِذُورَارْ ن لُوبْنَانْ.“ 
”كَّارْ، أَ أَسمِّيضْ ن نّجْ، أَسْ-د، أَ أَسمِّيضْ ن سْوَادَّايْ، سُوضْ خْ وحْوِيشْ إِنُو، أجّْ ڒفْوَاحثْ ن ڒعْطُورْ نّسْ أَذْ ثُويُورْ. أجّْ لِّيفْ إِنُو أَذْ د-يَاسْ غَارْ وحْوِيشْ نّسْ، أَذْ إِشّْ زِي ڒْغِيدْجثْ نّسْ إِصبْحنْ!“ 
