﻿أَوَاڒنْ إِوزْننْ.
6.
مِّي إِنُو، مَاڒَا ثْذوْڒذْ ذ أَمَارْهُونْ إِ جَّارْ نّشْ، ثوْشِيذْ ثِيشْثِي نّشْ ن ؤُفُوسْ إِ يِيجّْ ن ؤُبَارَّانِي، 
مَاڒَا ثْذوْڒذْ ثقّْنذْ زڭْ وَاوَاڒنْ ن ؤُقمُّومْ نّشْ، ثتّْوَاحبّْسذْ زڭْ وَاوَاڒنْ ن ؤُقمُّومْ نّشْ، 
خنِّي أڭّْ ثَا، أَ مِّي، ؤُ فكّْ إِخفْ نّشْ، مَاغَارْ ثْذوْڒذْ غَارْ ؤُفُوسْ ن جَّارْ نّشْ: ؤُيُورْ، بنْذقْ خَاسْ ؤُ زيَّارْ خْ ونِّي شكْ يُوذْسنْ. 
وَارْ تِّيشْ شَا إِضصْ إِ ثِيطَّاوِينْ نّشْ، ؤُڒَا ذ أَنُوذمْ إِ وَابْڒِيونْ نّشْ. 
فكّْ إِخفْ نّشْ زڭْ ؤُفُوسْ نّسْ أَمْ ثْغيْضثْ ن وغْزَارْ، أَمْ يِيجّْ ن وجْضِيضْ زڭْ ؤُفُوسْ ن ؤُنڭْمَارْ. 
ؤُيُورْ غَارْ ثْكضْفثْ، شكْ، أَ أَمعْڭُوزْ، خْزَارْ مَامّشْ ثُويُورْ نتَّاثْ ؤُ ذْوڒْ ذ أَمِيغِيسْ. 
وَاخَّا نتَّاثْ وَارْ غَارسْ بُو ؤُمْڭوّذْ، نِيغْ أَوقَّافْ نِيغْ ڒْحَاكمْ، 
عَاذْ ثسّوْجَاذْ أَغْرُومْ نّسْ ذڭْ ؤُنبْذُو، ثيْرُو مَاشَّا نّسْ ذِي ڒْوقْثْ ن ثْميْرَا. 
أَڒْ مڒْمِي غَا ثقِّيمذْ ثزّْڒذْ، شكْ، أَ أَمعْڭُوزْ؟ مڒْمِي غَا ثكَّارذْ زڭْ إِضصْ نّشْ؟ 
أَرْنِي شْوَايْثْ ن يِيضصْ، أَرْنِي شْوَايْثْ ن ؤُوَارّشْ، أَرْنِي شْوَايْثْ ن ؤُبُوزّڒْ س إِفَاسّنْ إِمُوننْ، 
أَقَا ذَا أَذْ خَاكْ د-إِوْضَا زّڒْضْ أَمْ يِيجّْ ن ؤُخوَّانْ، ڒغْبنْ نّشْ أَمْ يِيجّْ ن ورْيَازْ إِ غَارْ إِدْجَا ڒسْنَاحْ. 
بْنَاذمْ إِ وَارْ إِسكّْوِينْ، أَرْيَازْ ن ڒْغشّْ، إِڭُّورْ س إِجّْ ن ؤُقمُّومْ إِشُّورنْ س مِينْ إِعوْجنْ. 
إِغمّزْ س ثِيطَّاوِينْ نّسْ، إِسَّاوَاڒْ س إِضَارنْ نّسْ، إِتّْشيَّارْ س إِضوْضَانْ نّسْ. 
ؤُڒْ نّسْ إِشُّورْ س ڒخْذَاعَاثْ، إِنكّْوَا ڒبْذَا ڒْغَارْ، إِتّْسبَّابْ إِمنْغِييّنْ. 
خْ ؤُيَا ذغْيَا أَذْ د-يَاسْ ؤُضيّعْ نّسْ، ذڭْ إِشْثْ ن ثشْثِي أَذْ إِتّْوَارْژْ أَمْ وَارْ ذِينْ إِتِّيڒِي ؤُڭنْفُو. 
ستَّا ن ثْمسْڒَايِينْ-أَ إِشَارّهْ إِ-ثنْثْ سِيذِي، وَاهْ سبْعَا أَقَا أَثنْثْ ذ نّْعِي إِ ڒعْمَارْ نّسْ: 
ثِيطَّاوِينْ ن نّْفَاخثْ، إِجّْ ن يِيڒسْ إِسّْخَارِّيقنْ، ؤُڒَا ذ إِفَاسّنْ إِسَّازَّاڒنْ إِذَامّنْ إِمزْذَاڭنْ، 
ؤُڒْ إِنكّْوَانْ ثِيمعْمَاتْشْ إِغشّنْ، إِضَارنْ نِّي إِتّْقدْجِيقنْ مَاحنْذْ أَذْ أَزّْڒنْ غَارْ مِينْ إِدْجَانْ ذ أَعفَّانْ، 
أَشهَّاذْ إِسّْخَارِّيقنْ نِّي د-إِذدْجْقنْ إِ إِخَارِّيقنْ، ؤُڒَا ونِّي إِتّْسبَّابنْ إِمنْغِييّنْ جَارْ ثَاوْمَاثْ. 
أَ مِّي، حْضَا ثَاوْصيّثْ ن بَابَاشْ، ؤُ وَارْ منْضَارْ ثَاغُورِي ن يمَّاشْ. 
قّنْ إِ-ثنْثْ ڒبْذَا خْ وُوڒْ نّشْ، شدّْ إِ-ثنْثْ غَارْ يِيرِي نّشْ. 
مَاڒَا ثڭُّورذْ، أَيَا أَذْ شكْ إِڭوّذْ، مَاڒَا ثزّْرذْ، أَيَا أَذْ شكْ إِحْضَا، مَاڒَا ثْفَاقذْ أَقَا مَانْ أَيَا أَذْ كِيذكْ إِسِّيوڒْ. 
مِينْزِي ثَاوْصيّثْ ذ ڒفْنَارْ ذ ثْغُورِي ذ ثْفَاوْثْ، إِوبَّاخْ ن تَّارْبِييّثْ أَقَا أَثنْ ذ أَبْرِيذْ ن ثُوذَارْثْ 
نِّي شكْ إِ غَا إِحْضَانْ زِي ثمْغَارْثْ ثَاعفَّانْثْ، زِي ڒهْرُوذْ إِزوّْقنْ ن يِيڒسْ ن ثمْغَارْثْ زِي بَارَّا. 
وَارْعشّقْ شَا أَژْرِي نّسْ ذڭْ وُوڒْ نّشْ، حْضَا وَارْ شكْ ثحْصِيرْ س وَابْڒِيونْ نّسْ، 
مِينْزِي زِي سِّيبّثْ ن إِشْثْ ن ثمْغَارْثْ ن فَارْقْ-شّْغڒْ، بْنَاذمْ أَذْ إِكْسِي مْغِيرْ إِشْثْ ن ثْخبَّازْثْ ن وغْرُومْ، وَاهْ، ثَامْغَارْثْ ن إِجّْ ن ورْيَازْ نّغْنِي أَقَا ثَارزُّو ڒعْمَارْ إِغْڒَانْ. 
مَا إِزمَّارْ حذْ أَذْ يَارْبُو ثِيمسِّي ذڭْ وحْسِينْ ن وَارُّوضْ نّسْ، بْڒَا مَا أَذْ يَارْغْ وَارُّوضْ نّسْ؟ 
مَا إِزمَّارْ حذْ أَذْ يُويُورْ خْ ڒفْحمْ إِتّحْذُوذُوقنْ، بْڒَا مَا أَذْ شمْضنْ إِضَارنْ نّسْ؟ 
أَمُّو ؤُڒَا ذ ونِّي إِ غَا يَاذْفنْ غَارْ ثمْغَارْثْ ن جَّارْ نّسْ، وَاهْ كُوڒْ إِجّنْ ونِّي ت إِ غَا إِهَاذَانْ، وَارْ إِتّْوِيحْسِيبْ ذ أَمزْذَاڭْ. 
أَشفَّارْ وَارْ ث سّْحقَّارنْ مَاڒَا يُوشَارْ، حِيمَا أَذْ إِسّْيِيونْ ڒعْمَارْ نّسْ مَاڒَا ذَايسْ ڒَاژْ. 
مَاشَا مَاڒَا إِتّْوَافْ، أَمُّو خَاسْ إِ غَا إِخدْجصْ سبْعَا ن ثْسقَّارْ. إِتّْخصَّا أَسْ أَذْ إِوْشْ مَارَّا مِينْ غَارسْ ذِي ثَادَّارْثْ. 
مَاشَا ونِّي إِتّڭّنْ زِّينَا أَكْ-ذ إِشْثْ ن ثمْغَارْثْ، وَارْ غَارسْ بُو وُوڒْ إِمْثنْ. ونِّي إِتّڭّنْ أَيَا، إِتَّاردّدْجْ ڒعْمَارْ نّسْ. 
ذْرُوشْثْ ذ ڒفْضِيحثْ أَذْ ثنْ يَافْ، ڒحْيَا نّسْ وَارْ إِمحِّي شَا. 
مَاغَارْ ثُوسْمِي ثتَّاوِي-د أَسْعَارْ ن ورْيَازْ، نتَّا وَارْ إِتّسّنْ أَحِينِّي ذڭْ وَاسّْ ن ونْثَاقمْ. 
وَارْ إِحسّبْ دّيّثْ إِ وصْڒحْ، وَارْ ت إِقبّڒْ، أَذْ يُوڭِي، وَاخَّا ثسّمْغَارِيذْ ذِي ثرْزفْثْ عَاذْ س وَاطَّاسْ. 
