﻿أَوَاڒنْ إِوزْننْ.
2.
مِّي إِنُو، مَاڒَا ثْقبْڒذْ أَوَاڒنْ إِنُو ؤُ أَذْ ثحْضِيذْ ثِيوصَّا إِنُو غَاركْ، 
مَاحنْذْ أَمزُّوغْ نّشْ أَذْ إِوْشْ ثَايْنِيثْ إِ ثِيغِيثْ ؤُشَا ؤُڒْ نّشْ أَذْ إِميّڒْ غَارْ ڒفْهَامثْ، 
وَاهْ، مَاڒَا ثتّْڒَاغِيذْ-د خْ ڒعْقڒْ، أَذْ ثسّْخذْمذْ ثْمِيجَّا نّشْ مَاحنْذْ أَذْ ثَافذْ ڒفْهَامثْ، 
مَاڒَا ثَارزُّوذْ خَاسْ أَمْ ثَارزُّوذْ خْ نُّوقَارْثْ، مَاڒَا خَاسْ ثَارزُّوذْ أَمْ خْ ثْخُوبَايْ إِنُّوفَّارنْ،    
خنِّي أَذْ ثْفهْمذْ إِ ثِيڭّْوُوذِي ن سِيذِي، ؤُ أَذْ ثَافذْ ثُوسّْنَا ن أَربِّي. 
مَاغَارْ سِيذِي إِتِّيشْ ثِيغِيثْ، زڭْ ؤُقمُّومْ نّسْ ثتّفّغْ-د ثُوسّْنَا ذ ڒفْهَامثْ. 
إِ يِينِّي إِڭُّورنْ نِيشَانْ إِسّوْجذْ أَسنْ ثْوِيزَا، إِ يِينِّي إِڭُّورنْ ذِي ڒكْمَارثْ أَقَا-ث ذ ثَاسدَّارْثْ إِ ؤُسڒْقِي، 
حِيمَا أَذْ قِّيمنْ تّطّْفنْ ذڭْ إِمسْرَاقْ نْ ڒْحقّْ، ؤُ نتَّا أَذْ إِسَّارْ أَبْرِيذْ ن يِينِّي ذَايْسنْ ڒَامَانْ زَّاثسْ. 
خنِّي إِ غَا ثْفهْمذْ ثَاسڭْذَا ذ ڒْحقّْ، ؤُڒَا ذ ڒصْفَايثْ، كُوڒْ ڒَاثَارْ إِصبْحنْ مَاحنْذْ أَذْ ث ثضْفَارذْ. 
مَاغَارْ ثِيغِيثْ أَذْ ثَاذفْ غَارْ وُوڒْ نّشْ، ؤُ ثُوسّْنَا أَذْ ثَارْضَا خْ ڒعْمَارْ نّشْ. 
أَحَاذُورْ أَذْ خَاكْ إِحْضَا، ڒفْهَامثْ أَذْ خَاكْ ثسَّارْ: 
... مَاحنْذْ أَذْ شكْ ثْفكّْ زڭْ وبْرِيذْ ن ؤُعفَّانْ، زڭْ ورْيَازْ نِّي إِقدْجْبنْ أَوَاڒْ نّسْ، 
زڭْ إِنِّي إِسمْحنْ ذڭْ إِمسْرَاقْ إِسڭّْمنْ، مَاحنْذْ أَذْ ؤُيُورنْ إِبْرِيذنْ ن طّْڒَامْ، 
إِنِّي إِفَارّْحنْ مَاحنْذْ أَذْ ڭّنْ ڒْغَارْ، ؤُ سّْڒِيوْڒِيونْ خْ ڒخْذَاعَاثْ ن ڒْغَارْ، 
زڭْ يِينِّي فَارْغنْ إِمسْرَاقْ نْسنْ ذ يِينِّي إِميّْڒنْ سَّا ذ سَّا ذِي ڒَاثَارَاثْ ن يِيخفْ نْسنْ، 
... مَاحنْذْ أَذْ شكْ ثْفكّْ زِي ثمْغَارْثْ ثْبَارَّانشْثْ، زِي ثمْغَارْثْ زِي بَارَّا إِ إِتّْغَارَّانْ س وَاوَاڒنْ نّسْ، 
ثنِّي إِسمْحنْ ذڭْ ؤُمدُّوكّڒْ ن ثمْژِي نّسْ، ؤُ ثتُّو ڒْعَاهْذْ ن أَربِّي نّسْ. 
مِينْزِي ثْهكّْوَا غَارْ ڒْموْثْ جْمِيعْ أَكْ-ذ ثَادَّارْثْ نّسْ، ؤُ ڒَاثَارَاثْ نّسْ هكّْوَانْثْ غَارْ ڒخْيَاڒَاثْ ن إِمتَّانْ. 
مَارَّا إِنِّي غَارسْ غَا يَاذْفنْ، وَارْ د-تّْعِيقِّيبنْعمَّارْصْ، وَارْ تَّاكّْوَاضنْعمَّارْصْ غَارْ إِمسْرَاقْ ن ثُوذَارْثْ. 
... وَاهْ، حِيمَا أَذْ ثُويُورذْ أَبْرِيذْ ن إِصبْحَاننْ، ؤُ أَذْ ثطّْفذْ ذڭْ إِمسْرَاقْ ن إِمْسڭَّاذنْ، 
مَاغَارْ إِنِّي إِڭُّورنْ نِيشَانْ أَذْ زذْغنْ ذِي ثمُّورْثْ، ؤُ إِنِّي إِڭُّورنْ س ڒكْمَارثْ أَذْ ذَايسْ قِّيمنْ. 
مَاشَا إِعفَّاننْ أَذْ تّْوَاقضْعنْ زِي ثمُّورْثْ، إِغدَّارنْ أَذْ زَّايسْ تّْوَاقڒْعنْ. 
