﻿إِزهِّيذنْ.
114.
أَڒَامِي إِفّغْ إِسْرَائِيل زِي مِيصْرَا، ثَادَّارْثْ ن يَاعْقُوبْ زڭْ إِجّْ ن ڒْڭنْسْ س يِيڒسْ ن مِيدّنْ،    
إِذْوڒْ يَاهُوذَا ذ زَّاوشْثْ نّسْ إِقدّْسنْ، إِسْرَائِيل ذ ثَامُّورْثْ ن ڒحْكَامثْ نّسْ. 
ڒبْحَارْ إِژْرَا إِ-ث ؤُشَا يَارْوڒْ، لْ-ؤُرْذُونْ إِنّقْڒبْ غَارْ ضفَّارْ. 
إِذُورَارْ نڭْزنْ أَمْ يِيشَارِّييّنْ، ثِيوْرِيرِينْ أَمْ يِيزْمَارنْ. 
مِينْ شكْ يُوغِينْ، أَ ڒبْحَارْ، أَڒَامِي ثْركّْوَاڒذْ، أَ شكْ لْ-ؤُرْذُونْ، أَڒَامِي ثنْقڒْبذْ غَارْ ضفَّارْ؟ 
أَ إِذُورَارْ، مِينْ كنِّيوْ يُوغِينْ أَڒَامِي ثْنڭّْزمْ أَمْ يِيشَارِّييّنْ، ثِيوْرِيرِينْ أَمْ يِيزْمَارنْ؟ 
أَ ثَامُّورْثْ أَرْجِيجِي زَّاثْ إِ وُوذمْ ن سِيذِي، زَّاثْ إِ وُوذمْ ن أَربِّي ن يَاعْقُوبْ، 
ونِّي يَارِّينْ ثَاصْضَارْثْ ذ ڒْحمْڒثْ ن وَامَانْ، سّدْجَاحْ ذ ڒْعُونْصَارَاثْ ن وَامَانْ. 
