﻿إِزهِّيذنْ.
99.
سِيذِي إِحكّمْ، أجّْ أَذْ أَرْجِيجنْ ڒڭْنُوسْ. نتَّا إِقِّيمْ خْ إِكِيرُوبنْ، ثَامُّورْثْ ثبْذَا أَذْ ثنْهزّْ. 
سِيذِي ذ أَمقّْرَانْ ذِي صِيهْيُونْ، نتَّا يُوعْڒَا أَطَّاسْ خْ مَارَّا ڒڭْنُوسْ. 
أجّْ إِ-ثنْ أَذْ قَاذَانْ إِسمْ نّشْ أَمقّْرَانْ إِسَّاڭّْوَاذنْ، أَذْ إِنِينْ: ”أَقَا نتَّا ذ أَمْقدَّاسْ!“ 
جّهْذْ ن ؤُجدْجِيذْ أَقَا نتَّا إِتّخْسْ ڒْحقّْ. شكْ ثڭِّيذْ أَمْشَانْ إِمْثنْ إِ ثْسڭْذَا، ثڭِّيذْ ڒْحقّْ ذ ثْسڭْذَا ذِي يَاعْقُوبْ. 
سْعُودْجمْ سِيذِي، أَربِّي نّغْ، بنْذْقمْ زَّاثْ إِ ثْنبْذَاثْ ن إِضَارنْ نّسْ. أَقَا نتَّا ذ أَمْقدّسْ! 
مُوسَا ذ هَارُونْ ثُوغَا أَثنْ زڭْ إِكهَّاننْ نّسْ، شَامْوِيلْ ثُوغَا زڭْ إِنِّي إِڒَاغَانْ إِسمْ نّسْ. نِيثْنِي ڒَاغَانْ غَارْ سِيذِي ؤُشَا نتَّا إِسْڒَا أَسنْ. 
إِسِّيوڒْ أَكِيذْسنْ زڭْ ؤُقلِّيجْ ن ؤُسيْنُو. نِيثْنِي حْضَانْ شّْهَاذَاثْ نّسْ، ؤُڒَا ذ ثِيوصَّا نّسْ نِّي ذ أَسنْ إِوْشَا. 
أَ سِيذِي، أَربِّي نّغْ، شكْ ثسْڒِيذْ أَسنْ. شكْ ذ إِجّْ ن أَربِّي إِغفَّارنْ، مَاشَا ؤُڒَا ذ ؤُمْثَاقمْ خْ ثْمڭَّا نْسنْ. 
سْعُودْجمْ سِيذِي، أَربِّي نّغْ، بنْذْقمْ أَسْ زَّاثْ إِ وذْرَارْ نّسْ إِقدّْسنْ، مَاغَارْ سِيذِي، أَربِّي نّغْ، ذ أَمْقدّسْ إِ إِدْجَا. 
