﻿إِزهِّيذنْ.
79.
أَزهّذْ ن أَسَافْ. أَ أَربِّي، ڒڭْنُوسْ ؤُذْفنْ غَارْ ڒْوَارْثْ نّشْ. نِيثْنِي سّْخمْجنْ زَّاوشْثْ نّشْ ثَامقّْرَانْثْ إِقدّْسنْ، أَرِّينْ ؤُرْشَالِيمْ ذ ڒْخِيرْبَاثْ. 
ڒْخشْبَاثْ ن إِمْسخَّارنْ نّشْ وْشِينْ ثنْثْ ذ مَاشَّا إِ إِجْضَاضْ ن ؤُجنَّا، أَيْسُومْ ن إِمْثِيقَّانْ نّشْ إِ ڒوْحُوشْ ن ثمُّورْثْ. 
إِذَامّنْ نْسنْ زدْجْعنْ ثنْ أَمْ وَامَانْ غَارْ مَارَّا إِغزْذِيسنْ ن ؤُرْشَالِيمْ، ؤُڒَا ذ إِجّْ وَارْ ثنْ إِنْضِيڒْ. 
نذْوڒْ ذ ڒفْذِيحثْ إِ جِّيرَانْ نّغْ، ذ ؤُسْثهْزِي ذ ؤُسحْقَارْ إِ مَارَّا إِنِّي ذ أَنغْ د-إِنّْضنْ. 
أَرْ مڒْمِي، أَ سِيذِي؟ مَا خنِّي أَذْ ثقِّيمذْ ثْسعَّارذْ إِ ڒبْذَا؟ مَا أَذْ ثَارغْ ثُوسْمِي نّشْ إِقدّْسنْ أَمْ ثْمسِّي إِ ڒبْذَا؟ 
فَارّغْ أَسْعَارْ نّشْ خْ ڒڭْنُوسْ إِ وَارْ شكْ إِسِّيننْ، خْ ثِيڭلْذِيوِينْ نِّي وَارْ إِتّْڒِيغِينْ خْ يِيسمْ نّشْ. 
مَاغَارْ نِيثْنِي شِّينْ يَاعْقُوبْ، أَردّْدْجنْ ثَازذِّيغْثْ نّسْ. 
وَارْ خَانغْعقّڒْ عْلَاحْسَابْ ڒْمُوعْصِييّثْ نّغْ ن زِيشْ. قدْجقْ، أجّْ أَرّحْمثْ نّشْ أَذْ كِيذْنغْ ثمْسَاڭَارْ، مَاغَارْ نضْعفْ أَطَّاسْ. 
أوْشْ أَنغْ أَفُوسْ نّشْ، أَ أَربِّي، ذِي طّْوعْ ن ؤُعُودْجِي ن يِيسمْ نّشْ، فكّْ أَنغْ ؤُ سصْڒحْ خْ دّْنُوبْ نّغْ ذِي طّْوعْ ن يِيسمْ نّشْ. 
مَايمِّي غَا إِنِينْ ڒڭْنُوسْ: ”مَانِي إِدْجَا أَربِّي نْسنْ؟“ أجّْ أَنْثَاقمْ ن إِذَامّنْ إِتّْوَاسِّيزْڒنْ ن ڒْڭنْسْ نّشْ أَذْ إِذْوڒْ إِتّْوَاسّنْ جَارْ ڒڭْنُوسْ جَارْ ثِيطَّاوِينْ نّغْ. 
أجّْ أَزهَّارْ ن ؤُمحْبُوسْ أَذْ د-يَاسْ زَّاثْ إِ وُوذمْ نّشْ، حْضَا إِحنْجِيرنْ ن ڒْموْثْ عْلَاحْسَابْ ڒمْغَارثْ ن ؤُغِيڒْ نّشْ. 
أَرّْ أَسنْ إِ جِّيرَانْ نّغْ أَبهْذڒْ نْسنْ سبْعَا ن ثْسقَّارْ غَارْ وحْسِينْ نْسنْ، أَبهْذڒْ نْسنْ إِ زِي شكْ فضْحنْ، أَ سِيذِي إِنُو. 
نشِّينْ ذ ڒْڭنْسْ نّشْ ذ وُودْجِي ن دّْمَانِي ن ثَاروْسَا نّشْ. نتّْقَاذَا شكْ إِ ڒبْذَا، زِي جِّيڒْ أَڒْ جِّيڒْ. نشِّينْ أَذْ نْبَارّحْ شَّانْ نّشْ. 
