﻿إِزهِّيذنْ.
76.
إِ ؤُمقّْرَانْ ن إِمغْنَاجنْ. أَكْ-ذ ؤُزنْزُونْ خْ إِفِيڒَانْ. أَزهّذْ ن أَسَافْ، إِزْڒِي. 
أَربِّي إِتّْوَاسّنْ ذِي يَاهُوذَا، إِسمْ نّسْ ذ أَمقّْرَانْ ذِي إِسْرَائِيل. 
أَعُوشِّي نّسْ أَقَا-ث ذِي شَالِيمْ، ثَازذِّيغْثْ نّسْ ذِي صِيهْيُونْ. 
ذِينِّي يَارْژَا فْڒِيثْشَاثْ يَارقّنْ ن ڒْقوْسْ، ثَاسدَّارْثْ ن ؤُسڒْقِي ذ سِّيفْ ؤُڒَا ذ أَمنْغِي. سِيلَاهْ. 
ثسَّاڭّْوَاذذْ ؤُ ثْجهْذذْ إِ ثدْجِيذْ خْ إِذُورَارْ نِّي إِمّژْرنْ ذِي ثْكشَّاضْثْ. 
إِنِّي إِزعَّامنْ تّْوَاكشّْضنْ. نِيثْنِي نُّوذْمنْ، طّْصنْ، ؤُڒَا ذ إِجّْ زڭْ إِرْيَازنْ إِمحْضنْ وَارْ إِزمَّارْ أَذْ إِمّْعَاڒَا. 
س ؤُودّبْ نّشْ، أَ أَربِّي ن يَاعْقُوبْ، إِغَارْقْ ؤُكَارُّو ذ ؤُيِيسْ ذڭْ يِيضصْ. 
شكْ، وَاهْ، شكْ ثسَّاڭّْوَاذذْ، وِي إِزمَّارنْ أَذْ إِقِّيمْ إِبدّْ زَّاثْ إِ وُوذمْ نّشْ، خْمِي د غَا إِكَّارْ وغْضَابْ نّشْ؟ 
زڭْ ؤُجنَّا ثڭِّيذْ أَذْ إِتّْوَاسڒْ ڒْحُوكْمْ. ثطّفْ ثڭّْوُوذِي ثَامُّورْثْ ؤُشَا ثسّغْذْ، 
ؤُمِي إِكَّارْ أَربِّي مَاحنْذْ أَذْ إِشَارّعْ، حِيمَا أَذْ إِفكّْ مَارَّا إِمْهِيننْ ن ثمُّورْثْ. سِيلَاهْ. 
مَاغَارْ أَفُوڭمْ ن إِوْذَانْ أَذْ يَاوِي أَقَاذِي إِ شكْ، مِينْ إِقِّيمنْ عَاذْ ن وسْعَارْ أَذْ ث ثْمنْعذْ. 
وْشمْ لْوُوعُوذْ ؤُ ڭّمْ زَّايْسنْ زَّاثْ إِ سِيذِي، أَربِّي نْومْ. أجّْ مَارَّا إِنِّي ذ أَسْ د-إِنّْضنْ أَذْ أَوْينْ صّْذَاقِي إِ ونِّي إِتّْخصَّا أَذْ زَّايسْ ڭّْوذنْ، 
ونِّي إِمنّْعنْ إِ ڒْحُوكَّامْ بُوحْبڒَاثْ نْسنْ، ونِّي زَّايسْ تّڭّْوْذنْ إِجدْجِيذنْ ن ثمُّورْثْ. 
