﻿إِزهِّيذنْ.
63.
أَزهّذْ ن ذَاوُوذْ، أَڒَامِي ث ثُوغَا ذِي ڒخْڒَا ن يَاهُوذَا. 
أَ أَربِّي، شكْ ذ أَربِّي إِنُو! غَارْ ثُوفُّوثْ أَرزُّوغْ خَاكْ، ڒعْمَارْ إِنُو إِتّْفَاذَا غَاركْ، أَيْسُومْ إِنُو إِتّْمژْرِي ذَايكْ، ذڭْ إِشْثْ ن ثمُّورْثْ يُوژْغنْ إِتّْفَاذَانْ بْڒَا أَمَانْ. 
أَمُّو إِ ذَايكْ خزَّارغْ ذِي زَّاوشْثْ إِقدّْسنْ، حِيمَا أَذْ ژَترغْ جّهْذْ نّشْ ذ ؤُعُودْجِي نّشْ. 
مَاغَارْ ثَامخْسِيوْثْ نّشْ إِشوَّارنْ ثحْڒَا خْ ثُوذَارْثْ، س ؤُينِّي أَذْ شكْ صبّْحنْ إِينْشِيشنْ إِنُو. 
أَمُّو إِ ذ أَشْ غَا بَارْكغْ ذِي ثُوذَارْثْ إِنُو، أَذْ سّْڭعّْذغْ إِفَاسّنْ إِنُو ذڭْ يِيسمْ نّشْ. 
ڒعْمَارْ إِنُو أَذْ إِجِّيونْ أَمْ زِي ثَاذُونْثْ ذ مِينْ إِمسْڒنْ، س إِينْشِيشنْ إِسْڒِيوْڒونْ أَذْ شكْ إِصبّحْ ؤُقمُّومْ إِنُو، 
مَاڒَا تّْخَارّْصغْ ذَايكْ ذِي ثَاسُّوثْ، تّْخمَّامغْ ذَايكْ غَارْ ؤُضُوفنْ ن وشْبَارْ ن دْجِيڒثْ. 
مِينْزِي ثُوغَا شكْ ذ أَمْعَاونْ إِنُو، ذِي ثِيڒِي ن وَافْرِيونْ نّشْ أَذْ سْڒِيوْڒوغْ. 
ڒعْمَاڒْ إِنُو إِڒصّقْ ذَايكْ أَوَارْنِي أَشْ، أَفُوسْ نّشْ أَفُوسِي إِتّطّفْ ذَايِي. 
إِنِّي إِتّخْسنْ أَذْ أَردّْدْجنْ ڒعْمَارْ إِنُو، أَذْ إِوْضنْ غَارْ إِمُوشَانْ يُودْجْغنْ قَاعْ سَاذُو ثمُّورْثْ. 
نِيثْنِي أَذْ تّْوَاسلّْمنْ إِ ثْزمَّارْ ن سِّيفْ، أَذْ ذوْڒنْ ذ ثَاكشَّاضْثْ إِ إِشعْبَاونْ. 
مَاشَا أَجدْجِيذْ أَذْ إِفَارْحْ زِي أَربِّي. كُوڒْ  إِجّْ زڭْ إِنِّي إِ غَارسْ إِ غَا إِتّْجَادْجَانْ أَذْ إِفيّشْ، مِينْزِي أَقمُّومْ ن يِينِّي إِسَّاوَاڒنْ س إِخَارِّيقنْ أَذْ إِتّْوَابلّعْ. 
