﻿إِزهِّيذنْ.
55.
إِ ؤُمقّْرَانْ ن إِمغْنَاجنْ. أَكْ-ذ ؤُزنْزُونْ خْ إِفِيڒَانْ. أَخمِّي ن ذَاوُوذْ. 
أَ أَربِّي، سڒْ إِ ثْژَادْجِيثْ إِنُو، وَارْ سّْنُوفَّارَا شَا إِخفْ نّشْ زَّاثْ إِ ثُوثْرَا إِنُو. 
حْضَا أَيِي ؤُ أَرّْ-د خَافِي. نشّْ تّْرَاحغْ تَّاسغْ-د غَارْ زَّاثْ ذ ضفَّارْ، أَمْ تّْشثْشِيغْ ؤُ سّْغُونْفِيغْ، 
زِي سِّيبّثْ ن ڒْحسّْ ن ڒعْذُو، زڭْ ؤُهُوذِّي ن ؤُعفَّانْ. مَاغَارْ نِيثْنِي هجْمنْ-د خَافِي س ڒْمُوعْصِييّثْ، ضفَّارنْ أَيِي س ؤُخيّقْ. 
ؤُڒْ إِنُو إِتّْفَارْفِيرْ ذَايِي ذَاخڒْ، إِنخْڒِيعنْ ن ڒْموْثْ وْضَانْ-د خَافِي. 
ثِيڭّْوُوذِي ذ ثَارْجِيجِيثْ تّطّْفنْثْ أَيِي، ؤُڒَا ذ أَرْجفْ إِحصَّارْ أَيِي. 
نشّْ نِّيغْ: ”مْڒِي ذ أَيِي وْشِينْ أَفْرِيونْ أَمْ ثذْبِيرْثْ، خنِّي إِڒِي ضْوِيغْ، أَذْ زذْغغْ ذِي شَا ن ومْشَانْ نّغْنِي.“ 
خْزَارْ، أَذْ أَروْڒغْ غَارْ ڒَاڭّْوَاجْ قَاعْ، أَذْ سّنْسغْ ذِي ڒخْڒَا. سِيلَاهْ. 
أَذْ ذغْيغْ غَارْ ومْشَانْ ن ؤُفكِّي، حِيمَا أَذْ تّْوَافكّغْ زڭْ ؤُسمِّيضْ، زِي ثْحَارْيَاضْثْ. 
صَارْضْ إِ-ثنْ، أَ سِيذِي إِنُو، سبْضَا إِڒسْ نْسنْ، مِينْزِي تّْوَاڒِيغْ لْعُونْفْ ذ ؤُمنْغِي ذِي ثنْذِينْثْ. 
أَسّْ ذ دْجِيڒثْ قُووَّارنْ نِيثْنِي إِ ڒحْيُوضْ نّسْ. غَارْ ذَاخڒْ ن ثنْذِينْثْ أَقَا ذِينْ ڒغْبنْ ذ ثَامَارَا، 
ڒْغشّْ أَقَا-ث ذَاخڒْ نّسْ، أَزَّايْ نّسْ وَارْ زَّايسْ إِتّْحيِّيذْ شَا دّدْجْ ذ وشْمَاثْ. 
مَاغَارْ وَارْ إِدْجِي ذ ڒعْذُو ونِّي ذ أَيِي إِسّحْقَارَانْ، مِينْزِي أَيَا زمَّارغْ أَذْ ث كْسِيغْ. وَارْ إِدْجِي ؤُڒَا ذ ونِّي ذ أَيِي إِشَارّْهنْ ذ ونِّي إِسّمْغَارَانْ إِخفْ نّسْ س وَاوَاڒْ خَافِي، مِينْزِي زَّايسْ زمَّارغْ أَذْ نُّوفَّارغْ! 
مَاشَا أَقَا ذ شكْ، أَ بْنَاذمْ، شكْ ذ أَقْرِينْ إِنُو، أَمدُّوكّڒْ إِنُو ذ جَّارْ إِنُو! 
نشِّينْ إِنِّي إِڭُّورنْ ذ لمْلِيحْ أَكْ-ذ وَايَاوْيَا ذِي تِّيقّثْ، نڭُّورْ غَارْ ثَادَّارْثْ ن أَربِّي ذڭْ ؤُهِيمُورْ. 
أَذْ خَاسنْ ثوْضَا ڒْموْثْ أَڒَامِي إِ غَا هْوَانْ أَمْ دَّارنْ ذِي ڒَاخَارْثْ، مَاغَارْ أَقَا ذِينْ ڒْغَارْ ذِي ثْزذِّيغِينْ نْسنْ، ذڭْ وُوڒَاونْ نْسنْ. 
نشّْ، وَاهْ، نشّْ أَذْ ڒَاغِيغْ خْ أَربِّي، سِيذِي أَذْ أَيِي إِسّنْجمْ. 
غَارْ ثْمذِّيثْ، غَارْ ثُوفُّوثْ ؤُ س ؤُزِيڒْ أَذْ شثْشِيغْ، أَذْ سّْغُونْفغْ ؤُ نتَّا أَذْ إِسڒْ إِ ثْمِيجَّا إِنُو. 
نتَّا إِڭَّا أَصْڒَاحْ خْ ڒعْمَارْ إِنُو س ڒهْنَا زڭْ إِنِّي غَارِي د-إِقَارّْبنْ إِ وهْجَامْ، مِينْزِي أَقَا-ثنْ ذڭْ وَاطَّاسْ ضِيدّْ إِنُو. 
أَربِّي أَذْ إِسڒْ، أَذْ ثنْ د-إِسّهْوَا. نتَّا إِتّْغِيمَا خْ ڒْعَارْشْ زڭْ وشْحَاڒْ ؤُيَا. سِيلَاهْ. أَقَا نِيثْنِي وَارْ تّْبذِّيڒنْ، وَارْ تّڭّْوذنْ شَا أَربِّي. 
نتَّا إِنطَّارْ أَفُوسْ ذڭْ إِنِّي أَكْ-ذ وِي إِڭَّا ڒهْنَا، نتَّا إِسّخْسَارْ ڒْعَاهْذْ نّسْ. 
أَقمُّومْ نّسْ يَارْضبْ حْسنْ زِي ثْرُوسِّي، مَاشَا ذڭْ وُوڒْ نّسْ إِتُّورْجَا أَمنْغِي. أَوَاڒنْ نّسْ ذ إِڒقَّاغنْ خْ زّشْثْ، مَاشَا أَقَا أَثنْ أَمْ ڒسْيُوفْ تّْوَاجبْذنْ. 
نْضَارْ أَمْنُوسْ نّشْ خْ سِيذِي ؤُ نتَّا أَذْ ذَايكْ إِتّْهِيلَّا. عمَّارْصْ وَارْ إِتّجِّي أَمْسڭّذْ أَذْ إِفَارْغْ. 
شكْ مَاشَا، أَ أَربِّي، أَذْ ثنْ ثسّهْوِيذْ ذڭْ وحْفُورْ ن ثُورْصُوضِي. إِرْيَازنْ ن إِذَامّنْ ذ ڒْغشّْ وَارْ تّْكمّْڒنْ أَزْينْ ن وُوسَّانْ نْسنْ. مَاشَا نشّْ تّشْڒغْ خَاكْ. 
