﻿إِزهِّيذنْ.
46.
إِ ؤُمقّْرَانْ ن إِمغْنَاجنْ. زڭْ أَيْثْ ن قُورَاحْ. س لهَارْپَاثْ إِتّْوَارِّيڭْلَانْ غَارْ سنّجْ. إِزْڒِي. 
أَربِّي ذ أَمْشَانْ ن ثَاروْڒَا ذ جّهْذْ إِ نشِّينْ. أَقَا إِبَانْ-د إِتِّيشْ أَفُوسْ أَطَّاسْ ذِي ڒحْصَارَاثْ. 
خْ ؤُيَا وَارْ نتّڭّْوذْ شَا، وَاخَّا أَذْ ثْبدّڒْ ثَامُّورْثْ، أَذْ وْضَانْ إِذُورَارْ ذڭْ وُوڒْ نْ ڒبْحُورْ، 
أَذْ هَاجَانْثْ ڒْحمْڒَاثْ نّسْ، أَذْ ڭّنْثْ أَكُوفُّو، أَذْ نْهزّنْ إِذُورَارْ س ؤُنّقْڒبْ نّسْ! سِيلَاهْ. 
ثِيغزْرَاثِينْ ن إِغْزَارْ أَذْ سّْفَارّْحنْثْ ثَانْذِينْثْ ن أَربِّي، زَّاوشْثْ إِقدّْسنْ ن ثْزذِّيغِينْ ن ؤُمْعُودْجِي خْ كُوڒْشِي. 
أَربِّي أَقَا-ث ذِي ڒْوسْثْ نّسْ، وَارْ ثتّنْهزَّا، أَربِّي أَذْ أَسْ إِوْشْ أَفُوسْ خْمِي د غَا ثسِّيجْ ثُوفُّوثْ. 
ڒڭْنُوسْ مُوزَّارنْ، ثِيڭلْذِيوِينْ نْهزّنْثْ. نتَّا إِڭَّا ثْمِيجَّا نّسْ أَذْ ثتّْوَاسڒْ، ثَامُّورْثْ أَقَا ثفْسِي. 
سِيذِي ن ڒْعسْكَارَاثْ أَقَا-ث أَكِيذْنغْ، أَربِّي ن يَاعْقُوبْ ذ لْبُورْجْ نّغْ يُوعْڒَانْ. سِيلَاهْ. 
أَسمْ-د، خْزَارمْ ثِيمڭَّا ن سِيذِي، نتَّا إِ إِڭِّينْ أَنخْڒِيعْ خْ ثمُّورْثْ. 
نتَّا إِسّْبدَّا إِمنْغَانْ أَڒْ أَنڭَّارْ ن ثمُّورْثْ، نتَّا أَذْ يَارْژْ ڒْقوْسْ، إِشَّاثْ لَانْسَا ذِي إِوثْوِيثنْ، إِكَارُّوثنْ إِسّشْمَاضْ إِ-ثنْ س ثْمسِّي. 
سْبدّْ، سْنمْ إِلَّا أَقَا نشّْ ذ أَربِّي. نشّْ أَذْ تّْوَاسّْڭعّْذغْ جَارْ ڒڭْنُوسْ، نشّْ أَذْ تّْوَاسّْڭعّْذغْ خْ ثمُّورْثْ. 
سِيذِي ن ڒْعسْكَارَاثْ أَقَا-ث أَكِيذْنغْ، أَربِّي ن يَاعْقُوبْ ذ لْبُورْجْ يُوعْڒَانْ إِ نشِّينْ. سِيلَاهْ. 
