﻿إِزهِّيذنْ.
24.
أَزهّذْ ن ذَاوُوذْ. أَ. أَزهّذْ ؤُمِي تّْڭعّْذنْ غَارْ وذْرَارْ ن صِيهْيُونْ مَارَّا إِمغْنَاجنْ ن ڒْغَاشِي إِتّْعيّْذنْ: إِ سِيذِي ثدْجَا ثمُّورْثْ ذ ؤُعمَّارْ نّسْ، دُّونشْثْ ذ إِمزْذَاغْ نّسْ. 
مَاغَارْ نتَّا إِسَّارْسْ ذْسَاسْ نّسْ خْ ڒبْحُورْ، إِسّمْثنْ إِ-ث خْ سّحْڒَاثْ. 
ثْمِيجَّا: وِي إِزمَّارنْ أَذْ إِڭعّذْ أَذْرَارْ ن سِيذِي، وِي إِزمَّارنْ أَذْ إِبدّْ ذڭْ ومْشَانْ نّسْ إِقدّْسنْ؟ 
ثْمِيجَّا نّغْنِي: ونِّي غَارْ إِدْجَا إِفَاسّنْ إِمزْذَاڭنْ ذ وُوڒْ إِصْفَا، ونِّي وَارْ د-إِتَّارِّي ڒعْمَارْ نّسْ خْ ڒْغشّْ، وَارْ إِتّْجَّادْجْ ژُورْ! 
مَارَّا إِمغْنَاجنْ: نتَّا أَذْ إِكْسِي لْبَارَاكَا زِي سِيذِي، ؤُڒَا ذ ثَاسڭْذَا زِي أَربِّي ن ؤُسنْجمْ نّسْ. 
ذ وَا ذ جِّيڒْ ن يِينِّي خَاسْ يَارزُّونْ، إِنِّي يَارزُّونْ خْ وُوذمْ نّشْ، أَقَا-ث ذ يَاعْقُوبْ. سِيلَاهْ. 
بْ. أَزهّذْ ؤُمِي ؤُذْفنْ غَارْ ثنْذِينْثْ ن صِيهْيُونْ مَارَّا إِمغْنَاجنْ ن ڒْغَاشِي إِتّْعيّْذنْ: سْڭعّْذنْثْ إِزدْجِيفنْ نْومْ، أَ ثِيوُّورَا، سْڭعّْذنْثْ إِخفْ نْكنْثْ، أَ ثِيوُّورَا ن ڒبْذَا، حِيمَا أَذْ يَاذفْ ؤُجدْجِيذْ ن ؤُعُودْجِي! 
ثْمِيجَّا زِي ثوُّورْثْ ن ثنْذِينْثْ: مَانْ ونْ إِ إِدْجَانْ ذ أَجدْجِيذْ ن ؤُعُودْجِي وَانِيثَا؟ مَارَّا إِمغْنَاجنْ: ذ سِيذِي، إِجْهذْ إِجبَّارْ، سِيذِي أَقَا-ث ذ أَجبَّارْ ذڭْ ؤُمنْغِي. 
سْڭعّْذنْثْ إِزدْجِيفنْ نْكنْثْ، أَ ثِيوُّورَا، سْڭعّْذنْثْ إِخفْ نْكنْثْ، أَ ثِيوُّورَا ن ڒبْذَا، حِيمَا أَذْ يَاذفْ ؤُجدْجِيذْ ن ؤُعُودْجِي! 
ثْمِيجَّا زِي ثوَّارْثْ ن ثنْذِينْثْ: مِينْ إِعْنَا نتَّا، أَجدْجِيذْ-أَ ن ؤُعُودْجِي؟ مَارَّا إِمغْنَاجنْ: سِيذِي ن ڒْعسْكَارَاثْ ذ نتَّا ذ أَجدْجِيذْ ن ؤُعُودْجِي. سِيلَاهْ. 
