﻿أَيُوبْ.
42.
أَيُوبْ يَارَّا-د خْ سِيذِي، إِنَّا: 
”نشّْ سّْنغْ أَقَا شكْ ثْزمَّارذْ إِ كُوڒْشِي وَارْ إِسّْبطِّيڒْ ؤُڒَا ذ إِجّْ ن ونْوَايْ نّشْ. 
شكْ ثقَّارذْ: ’مَانْ ونْ إِسّْبَارّْشْننْ بْڒَا ثُوسّْنَا شّْوَارْ ن أَربِّي؟‘ س ؤُيَا سِّيوْڒغْ خْ مِينْ وَارْ فْهِيمغْ، خْ ثْمسْڒَايِينْ نِّي ذِي تّْبهْثغْ أَطَّاسْ، وَارْ ثنْثْ سِّينغْ.“ 
”سڒْ مَاشَا ؤُشَا أَذْ سِّيوْڒغْ، خْسغْ أَذْ شكْ سّقْسِيغْ ؤُشَا خنِّي شكْ أَذْ أَيِي خَاسْ ثسَّارْڭْبذْ. 
س ؤُمزُّوغْ خَاكْ إِ سْڒِيغْ وَاهَا، مَاشَا ڒخُّو ثِيطّْ إِنُو ثژْرِي شكْ. 
خْ ؤُيَا تّْعِيفِّيغْ إِخفْ إِنُو ؤُشَا نْذمّغْ، قِّيمغْ ذِي ثْعجَّاجْثْ ذ يِيغّضْ.“ 
أَوَارْنِي ڒَامِي ثُوغَا إِسِّيوِيڒْ سِيذِي أَوَاڒنْ-أَ أَكْ-ذ أَيُوبْ، إِنَّا سِيذِي إِ إِلِيفَازْ زِي ثَايْمَانْ: ”لْغَاضَابْ إِنُو يَارْغَا خَاكْ ؤُ خْ ثْنَاينْ ن إِمدُّوكَّاڒْ نّشْ، مَاغَارْ كنِّيوْ وَارْ خَافِي ثسِّيوْڒمْ شَا نِيشَانْ أَمْ مَامّشْ خَافِي إِسِّيوڒْ ؤُمْسخَّارْ إِنُو أَيُوبْ. 
خنِّي ڒخُّو، كْسِيمْ كنِّيوْ سبْعَا ن إِفُونَاسنْ إِمژْيَاننْ ذ سبْعَا ن إِشَارِّييّنْ، ؤُشَا ؤُيُورمْ غَارْ ؤُمْسخَّارْ إِنُو أَيُوبْ ؤُشَا قدّْممْ ثنْ ذ ثَاغَارْصْثْ ن وشْمَاضْ إِ يِيخفْ نْومْ. جّمْ أَمْسخَّارْ إِنُو أَيُوبْ أَذْ خَاومْ إِژَّادْجْ. مَاغَارْ نشّْ أَذْ سّْڭعّْذغْ أَغمْبُوبْ نّسْ إِ وسْثَاجبْ، حِيمَا وَارْ تّڭّغْ أَكِيذْومْ أَمْ ثُوبُّوهڒْيَا نْومْ، مِينْزِي كنِّيوْ وَارْ خَافِي ثسِّيوِيڒمْ نِيشَانْ أَمْ مَامّشْ خَافِي إِسِّيوِيڒْ ؤُمْسخَّارْ إِنُو أَيُوبْ.“ 
خنِّي إِفّغْ إِلِيفَازْ زِي ثَايْمَانْ، بِيلْذَاذْ زِي شُوحَا ذ صُوفَارْ زِي نَاعْمَاثْ ؤُشَا ڭِّينْ نِيثْنِي أَمْ مَامّشْ ذ أَسنْ إِنَّا سِيذِي. سِيذِي إِسّْڭعّذْ أَغمْبُوبْ ن أَيُوبْ إِ ؤُسْثَاجبْ ن ثْژَادْجِيثْ نّسْ. 
أَوَارْنِي ڒَامِي ثُوغَا إِتّْژَادْجْ أَيُوبْ ذِي طّْوعْ ن إِمدُّوكَّاڒْ نّسْ، إِنّقْڒبْ سِيذِي ثَامحْبَاسْثْ ن أَيُوبْ إِ ذِي إِدْجَا نتَّا زِي سِّيبّثْ ن ڒهْڒَاشْ نّسْ، ؤُشَا يَارْنِي سِيذِي ذِي مَارَّا أَڭْڒَا ن أَيُوبْ ثْنَاينْ ن ثْسقَّارْ. 
ؤُسِينْ-د غَارسْ مَارَّا أَيْثْمَاسْ ذ مَارَّا سُويثْمَاسْ ذ مَارَّا إِنِّي ث إِسّْننْ زِيشْ. نِيثْنِي شِّينْ أَكِيذسْ أَغْرُومْ ذِي ثَادَّارْثْ نّسْ ؤُشَا سّشْننْ أَسْ أَزِيدْجزْ نْسنْ ؤُشَاعزَّانْ ث خْ مَارَّا ڒْغَارْ خَاسْ د-إِغْضڒْ سِيذِي. إِوْشَا أَسْ كُوڒْ إِجّنْ زَّايْسنْ إِجّْ ن ڒوْزنْ ن نُّوقَارْثْ ؤُڒَا ذ إِشْثْ ن ثْخَاذنْثْ ن وُورغْ. 
إِبَاركْ سِيذِي ثَانڭَّارُوثْ ن أَيُوبْ كْثَارْ زِي ثْمزْوَارُوثْ نّسْ، مَاغَارْ ثُوغَا غَارسْ أَربْعَا-أَڒَافْ ن وُودْجِي ذ ستَّا-أَڒَافْ ن إِڒغْمَانْ ذ وَاڒفْ ن إِفُونَاسنْ ن ثغْنَاشْثْ ذ وَاڒفْ ن ثغْيَاڒْ. 
ثُوغَا غَارسْ سبْعَا ن إِحنْجِيرنْ ذ ثْڒَاثَا ن يسِّيسْ. 
ثَامزْوَارُوثْ إِڭَّا أَسْ يَامِيمَا، وِيسّْ ثْنَاينْ قَّارنْ أَسْ قَاصِيعَا ذ وِيسّْ ثْڒَاثَا قَّارنْ أَسْ قَارْنْ-هَافُّوكْ. 
وَارْ ؤُفِينْ ذِي مَارَّا ثَامُّورْثْ ثِيحْرَامِينْ شْنَانْثْ أَمْ يسِّيسْ ن أَيُوبْ. بَابَاثْسنْثْ إِوْشَا أَسنْثْ ثَاسْغَارْثْ جَارْ أَيْثْمَاثْسنْثْ. 
أَيُوبْ إِدَّارْ أَوَارْنِي إِ ؤُيَا مْيَا ؤُ-ربْعِينْ ن إِسڭّْوُوسَا. نتَّا إِژْرَا إِحنْجِيرنْ نّسْ ذ إِحنْجِيرنْ ن إِحنْجِيرنْ نّسْ غَارسْ أَڒْ جِّيڒْ وِيسّْ أَربْعَا. 
أَيُوبْ إِمُّوثْ أَوَارْنِي ڒَامِي إِوْسَارْ أَطَّاسْ ؤُ ثُوغَا إِجِّيونْ ؤُسَّانْ ن ثُوذَارْثْ نّسْ. 
