﻿أَيُوبْ.
9.
يَارَّا-د أَيُوبْ، إِنَّا: 
سّْنغْ نِيشَانْ، أَقَا أَمُّو إِ ثدْجَا، مَاغَارْ مَامّشْ غَا يِيڒِي بْنَاذمْ ذ أَمْسڭّذْ غَارْ أَربِّي؟ 
مَاڒَا نتَّا إِخْسْ أَكِيذسْ إِمْشَارّعْ، إِڒِي نتَّا وَارْ إِزمَّارْ أَذْ خَاسْ د-يَارّْ ؤُڒَا ذ إِشْثْ ن ثْوَاڒَا خْ وَاڒفْ ن ثْوَاڒَاوِينْ. 
نتَّا ذ أَمِيغِيسْ ن وُوڒْ ذ بُو-ثْزمَّارْ إِجهْذنْ، مَانْ ونْ إِزمَّارنْ أَذْ إِسّقْسحْ إِخفْ نّسْ ضِيدّْ نّسْ ؤُشَا أَذْ إِقِّيمْ إِدَّارْ ذِي ڒَامَانْ؟ 
نتَّا ذ ونِّي إِسّْمُوطُّوينْ إِذُورَارْ أَمْ وَارْ ت تِّيشِينْ إِوْذَانْ، ذ ونِّي ثنْ إِسّْنقْڒَابنْ ذڭْ وغْضَابْ نّسْ، 
نتَّا ذ ونِّي إِسّنْهزَّانْ ثَامُّورْثْ زڭْ ومْشَانْ نّسْ، ذ ونِّي إِڭِّينْ إِپِيلَارنْ نّسْ أَذْ أَرْجِيجنْ، 
نتَّا ذ ونِّي إِتَّامَارنْ ثَافُوشْثْ أَڒَامِي وَارْ د-ثنْقِيرْ، ذ ونِّي إِتّْشمَّاعنْ إِثْرَانْ! 
نتَّا س يِيخفْ نّسْ وَاهَا إِتّْبزَّاعْ إِجنْوَانْ، نتَّا إِصُورُّوفْ ثِيوَا ن ثْعُورَارْ نْ ڒمْوَاجْ ن وَامَانْ. 
نتَّا ذ ونِّي إِڭِّينْ أَوْرَافْ ن إِثْرَانْ ن دُّوبْ أَمقّْرَانْ ذ ؤُرْيُونْ، أَڭْرَاوْ ن سبْعَا ن إِثْرَانْ ذ إِخَامّنْ ن لْجَانُوبْ، 
نتَّا ذ ونِّي إِڭِّينْ ثِيمسْڒَايِينْ ثِيمقّْرَانِينْ، - وَارْ إِزمَّارْ بْنَاذمْ أَذْ ثنْثْ إِفْهمْ - ؤُڒَا ذ ڒعْجَايبْ بْڒَا ڒحْسَابْ. 
خْزَارْ، نتَّا إِعدُّو خَافِي، وَارْ ث ژَترّغْ، إِژكّْوَا، نشّْ وَارْ كِيذسْ تَّاشِيغْ. 
خْزَارْ، مَاڒَا إِخْضفْ نتَّا، مَانْ ونْ إِ ث غَا إِمنْعنْ؟ مَانْ ونْ إِزمَّارنْ أَذْ أَسْ يِينِي: ’مِينْ ذِينْ ثتّڭّذْ شكْ؟‘ 
أَربِّي وَارْ إِتَّارِّي أَغْضَابْ نّسْ أَذْ د-إِذْوڒْ، سَاذُو نّسْ ؤُضَارنْ إِمْعَاوَاننْ ن ’رَاهَابْ‘. 
مَامّشْ إِ غَا ڭّغْ أَذْ خَاسْ د-أَرّغْ، مَامّشْ إِ غَا فَارْزغْ أَوَاڒنْ إِنُو مْلِيحْ زَّاثسْ؟ 
وَاخَّا نشّْ ذ أَمْسڭّذْ، وَارْ زمَّارغْ أَذْ خَاسْ د-أَرّغْ، مَاشَا أَذْ زَاوْڭغْ ڒْقَاضِي إِنُو مَاحنْذْ أَذْ خَافِي إِحِينّْ، 
مَاڒَا خَافِي د-يَارّْ ڒَامِي ڒَاغِيغْ، وَارْ تّْغِيڒغْ أَقَا نتَّا أَذْ إِسڒْ غَارْ ثْمِيجَّا إِنُو. 
أَقَا نتَّا إِڒبّزْ أَيِي س إِشْثْ ن ثْحَارْيَاضْثْ ؤُ يَارنِّي ذڭْ إِيزِّيمنْ إِنُو بَاطڒْ. 
نتَّا وَارْ ذ أَيِي إِتّجِّي أَذْ أَرّغْ نّفْسْ، مَاشَا إِسّْجَاوَانْ أَيِي س ثَارْزُوڭِي. 
مَاڒَا ثقِّيمْ ثْمسْڒَاشْثْ ذِي جّهْذْ، أَقَا نتَّا إِجْهذْ قَاعْ، مَاڒَا ذِي شّْرعْ، إِقَّارْ: ’وِي ذ أَيِي غَا إِعَارْضنْ؟‘ 
وَاخَّا نشّْ ذ أَمْسڭّذْ، عَاذْ أَقمُّومْ إِنُو أَذْ خَافِي إِحْكمْ، وَاخَّا نشّْ بْڒَا ڒْعِيبْ، عَاذْ نتَّا أَذْ أَيِي إِعيّبْ. 
وَاخَّا نشّْ بْڒَا ڒْعِيبْ إِ دْجِيغْ، وَارْ سِّينغْ ڒعْمَارْ إِنُو نِيشَانْ، ثُوذَارْثْ إِنُو حسّْبغْ ت ذ وَالُو. 
خْ ؤُيَا إِ غَا إِنِيغْ: ’قَاعْ ذ إِشْثْ! أَمْ ونِّي إِدْجَانْ بْڒَا ڒْعِيبْ أَمْ ونِّي إِدْجَانْ ذ أَعفَّانْ، نتَّا أَذْ ثنْ إِقْضَا س ثْنَاينْ إِذْسنْ!‘ 
مَاڒَا أَركُّوضْ إِنقّْ ذڭْ إِشْثْ ن ثشْثِي، خنِّي نتَّا إِسْثهزَّا زِي ڒقْضعْ ن ڒَايَاسْ إِ إِمزْذَاڭنْ. 
ثَامُّورْثْ أَذْ ثمّوْشْ ذڭْ ؤُفُوسْ ن ؤُعفَّانْ. إِغمْبَابْ ن ڒْقُوضَاثْ نّسْ إِتّْڒحّفْ أَسنْ. مَاڒَا وَارْ ث إِڭِّي نتَّا، مَانْ ونْ خنِّي؟ 
ذغْيَا خْ ونِّي إِتَّازّْڒنْ أَقَا تّْقدْجِيقنْ وُوسَّانْ إِنُو، أَروْڒنْ غَارْ ذِينْ، وَارْ ثْوِيڒِينْ ڒْخَارْ. 
كِّينْ أَمْ ثْغَارُّوبَا ن ؤُغَانِيمْ، أَمْ ؤُڭِيذرْ إِحوّْمنْ خْ زَّارْذثْ. 
مَاڒَا نِّيغْ: ’أَذْ تُّوغْ أَشثْشِي إِنُو، أَذْ بدّْڒغْ أَغمْبُوبْ إِشضْننْ إِنُو، أَذْ سّْفِيرْنِينغْ!‘، 
أَمُّو إِ تّڭّْوذغْ زِي مَارَّا ڒحْرِيقْ إِنُو. نشّْ سّْنغْ شكْ وَارْ زَّايِي ثتّْبَارِّيذْ. 
نشّْ ذ أَعفَّانْ، مَايمِّي سّْحِيسِّيفغْ إِ وَالُو؟ 
مَاڒَا سِّيرْذغْ س وَامَانْ ن وذْفڒْ، أَذْ سِّيزذْڭغْ إِفَاسّنْ إِنُو س لِّيخِييَا، 
عَاذْ أَذْ أَيِي ثْنثْيذْ ذڭْ وحْفُورْ يَارْصُوذنْ، أَڒْ ذ أَيِي غَا إِعِيفّْ وَارُّوضْ إِنُو. 
مَاغَارْ نتَّا وَارْ إِدْجِي ذ بْنَاذمْ أَمْ نشّْ، ونِّي خفْ زمَّارغْ أَذْ د-أَرّغْ، خْمِي نتَّاوضْ غَارْ ثَادَّارْثْ ن شّْرعْ أَكْ-ذ وَايَاوْيَا. 
وَارْ ذِينْ إِدْجِي ڒْعَاذڒْ جَارْ أَنغْ، ونِّي إِزمَّارنْ أَذْ إِسَّارْسْ أَفُوسْ نّسْ خَانغْ س ثْنَاينْ إِذْنغْ. 
أجّْ إِ-ث أَذْ خَافِي إِكْسِي أَعْمُوذْ نّسْ، وَارْ ذ أَيِي إِسّْنخْڒِيعْ عَاذْ ؤُهُوذِّي نّسْ، 
خنِّي أَذْ سِّيوْڒغْ نْهْڒَا أَذْ زَّايسْ ڭّْوذغْ، مَاغَارْ نشّْ وَارْ دْجِيغْ أَمُّو إِ يِيخفْ إِنُو. 
