﻿2 إِمزْرُوينْ.
15.
خنِّي يُوسَا-د أَرُّوحْ ن أَربِّي خْ عَازَارْيَا، مِّيسْ ن عُوذِيذْ. 
نتَّا يُويُورْ إِبدّْ زَّاثْ إِ أَسَا، إِنَّا أَسْ: ”سڒْ-د غَارِي، أَسَا ذ مَارَّا أَيْثْ ن يَاهُوذَا ذ بِينْيَامِينْ! سِيذِي أَقَا-ث أَكِيذْومْ ؤُ كنِّيوْ أَكِيذسْ. مَاڒَا ثَارزُّومْ خَاسْ، نتَّا أَذْ كنِّيوْ يَارّْ أَذْ ث ثَافمْ، مَاشَا مَاڒَا كنِّيوْ ثْحيّْذمْ خَاسْ، أَذْ خَاومْ إِحيّذْ ؤُڒَا ذ نتَّا. 
أَطَّاسْ ن وُوسَّانْ إِ إِقِّيمْ إِسْرَائِيل بْڒَا أَربِّي ن ثِيذتّْ ؤُ بْڒَا إِجّْ ن ؤُكهَّانْ إِسّْغَارَانْ ؤُ بْڒَا شَّارِيعَا. 
مَاڒَا ذوْڒنْ-د نِيثْنِي غَارْ سِيذِي، أَربِّي ن إِسْرَائِيل، ذِي ڒحْصَارثْ ؤُ أَرْزُونْ خَاسْ، إِجَّا إِ-ثنْ أَذْ ث أَفنْ. 
ذڭْ وُوسَّانْ نِّي وَارْ ذِينْ ثُوغِي ڒهْنَا إِ ونِّي د-إِفّْغنْ ؤُ إِ ونِّي يَارڭّْوْحنْ، مَاغَارْ أَقَا ذِينْ أَطَّاسْ ن ڒحْوڒْ جَارْ مَارَّا إِمزْذَاغْ ن ثمُّورَا. 
إِجّْ ن ڒْڭنْسْ إِتّْوَاعْفسْ زڭْ إِجّْ ن ڒْڭنْسْ نّغْنِي، ؤُ إِشْثْ ن ثنْذِينْثْ زڭْ إِشْثْ ن ثنْذِينْثْ نّغْنِيثْ، مَاغَارْ أَربِّي إِسِّيڭّْوذْ إِ-ثنْ س كُوڒْ ڒحْصَاڒثْ. 
كنِّيوْ مَاشَا إِڒِيمْ ذ إِرْيَازنْ، وَارْ تّجِّيمْ أَذْ أَرْخُونْ إِفَاسّنْ نْومْ، مَاغَارْ أَقَا ذِينْ ڒْمُونثْ إِ ڒْخذْمثْ نْومْ.“ 
ؤُمِي أَسَا إِسْڒَا أَوَاڒنْ-أَ ذ نُّوبُووَا ن ؤُنَابِي عُوذِيذْ، إِسّجْهذْ إِخفْ نّسْ ؤُشَا إِسّْبعّذْ نّْعَاوَاثْ ن لْ-أَصْنَامْ زِي مَارَّا ثَامُّورْثْ ن يَاهُوذَا ذ بِينْيَامِينْ ؤُ زِي مَارَّا ثِيندَّامْ نِّي ثُوغَا إِطّفْ خْ إِذُورَارْ ن إِفْرَايِيمْ ؤُشَا إِعْذڒْ أَعَالْطَارْ ن سِيذِي، ونِّي إِدْجَانْ زَّاثْ إِ وسْقِيفْ ن وَاذَافْ إِ زَّاوشْثْ ثَامقّْرَانْثْ ن سِيذِي. 
إِسّْمُونْ مَارَّا يَاهُوذَا ذ بِينْيَامِينْ، ؤُڒَا ذ إِبَارَّانِييّنْ زڭْ إِفْرَايِيمْ، مَانَاسَّا ؤُ شِيمْعُونْ، مَاغَارْ أَطَّاسْ زِي إِسْرَائِيل عْذُونْ غَارسْ، ؤُمِي نِيثْنِي ژْرِينْ، أَقَا سِيذِي، أَربِّي نّسْ، ثُوغَا-ث أَكِيذسْ. 
نِيثْنِي مُوننْ ذِي ؤُرْشَالِيمْ ذڭْ ؤُيُورْ وِيسّْ ثْڒَاثَا، ذڭْ ؤُسڭّْوَاسْ وِيسّْ خمّسْطَاشْ ن ثْڭلْذَا ن أَسَا. 
ذڭْ وَاسّْ نِّي وهّْبنْ نِيثْنِي سبْعَا-مْيَا ن إِفُونَاسنْ ذ ثْفُونَاسِينْ ذ سبْعَا-أَڒَافْ ن وُودْجِي ذ ثْغَارْصْثْ إِ سِيذِي زِي ثْكشَّاضْثْ إِ كِيذْسنْ إِوْينْ. 
نِيثْنِي ؤُذْفنْ غَارْ إِجّْ ن ڒْعَاهْذْ مَاحنْذْ أَذْ أَرْزُونْ سِيذِي، أَربِّي ن ڒجْذُوذْ نْسنْ، س مَارَّا ؤُڒْ نْسنْ ؤُ س مَارَّا ڒعْمَارْ نْسنْ. 
مَارَّا ونِّي وَارْ يَارزُّونْ خْ سِيذِي، أَربِّي ن إِسْرَائِيل، إِتّْخصَّا أَذْ إِتّْوَانغْ، أَمْ ؤُمژْيَانْ أَمْ ؤُمقّْرَانْ، أَمْ ورْيَازْ أَمْ ثمْغَارْثْ. 
نِيثْنِي جُّودْجنْ إِ سِيذِي س ثْمِيجَّا ثجْهذْ ؤُ س ؤُسْڒوْڒِيوْ، غَارْ وسْرُودّحْ ن ڒبْوَاقْ ذ وَاشَّاونْ ن إِشَارِّي. 
مَارَّا يَاهُوذَا ثْفَارْحْ خْ ثْجَادْجِيثْ، مَاغَارْ نِيثْنِي ڭِّينْ ت س مَارَّا ؤُڒْ نْسنْ ؤُمِي نِيثْنِي أَرْزُونْ خَاسْ س مَارَّا أَرْضَا نْسنْ، ؤُ نتَّا إِجَّا إِ-ثنْ أَذْ ث أَفنْ ؤُشَا سِيذِي إِوْشَا أَسنْ ڒْهُوذْنثْ زِي مَارَّا إِغزْذِيسنْ نْسنْ. 
إِسّْحيّذْ أَسَا ؤُڒَا ذ حنَّاسْ مَاعْكَا زِي جّهْذْ نّسْ، مَاغَارْ نتَّاثْ ثُوغَا ثڭَّا إِشْثْ ن جّْعِيفشْثْ ن ڒخْيَاڒْ إِ ثْربِّيثْ ن شْوَارْثِي. أَسَا إِشقَّارْ جّْعِيفشْثْ نّسْ، إِڒْبزْ إِ-ت ؤُشَا إِسّْشمْضْ إِ-ت غَارْ ثغْزَارْثْ ن قِيذْرُونْ. 
وَارْ تّْوَاحيّْذنْثْ ڒڭْعُوذِي، مَاشَا ؤُڒْ ن أَسَا ثُوغَا إِشْضَارْ نِيشَانْ إِ سِيذِي، مَارَّا ؤُسَّانْ ن ثُوذَارْثْ نّسْ. 
ثِيوْهِيبِينْ إِقدّْسنْ ن بَابَاسْ ذ مِينْ ثُوغَا إِسّْقدّسْ نتَّا س يِيخفْ نّسْ يِيوْيِي-ث ذِي ثَادَّارْثْ ن أَربِّي، ؤُڒَا ذ ثِيوْهِيبِينْ نّسْ إِقدّْسنْ: نُّوقَارْثْ ذ وُورغْ ذ ڒقْشُوعْ نّغْنِي. 
وَارْ ذِينْ إِقِّيمْ عَاذْ ؤُمنْغِي أَڒْ أَسڭّْوَاسْ وِيسّْ خمْسَا ؤُ-ثْڒَاثِينْ ن ثْڭلْذَا ن أَسَا. 
