﻿1 إِجدْجِيذنْ.
15.
ذڭْ ؤُسڭّْوَاسْ وِيسّْ ثْمنْطَاشْ ن ؤُجدْجِيذْ يَارُوبْعَامْ، مِّيسْ ن نَابَاطْ، إِذْوڒْ أَبِييَامْ ذ أَجدْجِيذْ خْ يَاهُوذَا. 
نتَّا إِحْكمْ ثْڒَاثَا ن إِسڭّْوُوسَا ذِي ؤُرْشَالِيمْ. يمَّاسْ قَّارنْ أَسْ مَاعْكَا، يدْجِيسْ ن أَبِيشَالُومْ. 
نتَّا يُويُورْ ذِي مَارَّا دّْنُوبْ ن بَابَاسْ نِّي ثُوغَا إِڭَّا قْبڒْ نّسْ ؤُشَا ؤُڒْ نّسْ وَارْ ثُوغِي شَا إِشْضَارْ غَارْ سِيذِي، أَربِّي نّسْ، أَمْ وُوڒْ ن بَابَاسْ ذَاوُوذْ. 
مَاشَا ذِي طّْوعْ ن ذَاوُوذْ إِوْشَا أَسْ سِيذِي، أَربِّي نّسْ، إِجّْ ن ڒفْنَارْ ذِي ؤُرْشَالِيمْ ؤُمِي إِڭَّا أَذْ إِسّكَّارْ مِّيسْ أَوَارْنِي أَسْ، ؤُ ؤُمِي إِڭَّا أَذْ ثقِّيمْ ثْبدّْ ؤُرْشَالِيمْ، 
مَاغَارْ ذَاوُوذْ ثُوغَا إِڭَّا مِينْ إِدْجَانْ نِيشَانْ ذِي ثِيطَّاوِينْ ن سِيذِي ؤُ نتَّا ثُوغَا وَارْ إِحيّذْ ذِي مَارَّا ثُوذَارْثْ نّسْ خْ مَارَّا مِينْ إِ ذ أَسْ يُومُورْ نتَّا، مْغِيرْ ذِي ثْمسْڒَاشْثْ ن ؤُرِييَا، أَحِيتِّي. 
ثُوغَا ذِينْ أَمنْغِي جَارْ رَاحَابْعَامْ ذ يَارُوبْعَامْ، مَارَّا ؤُسَّانْ ن ثُوذَارْثْ نّسْ. 
إِمزْرُوينْ إِقِّيمنْ ن أَبِييَامْ ذ مَارَّا مِينْ إِڭَّا، مَا مَانْ أَيَا مَارَّا وَارْ إِتّْوَازمّمْ شَا ذڭْ وذْلِيسْ ن إِمزْرُوينْ ن إِجدْجِيذنْ ن يَاهُوذَا؟ ثُوغَا ذِينْ عَاوذْ أَمنْغِي جَارْ أَبِييَامْ ذ يَارُوبْعَامْ. 
أَبِييَامْ إِڭَّا أَذْ يَاريّحْ جَارْ ڒجْذُوذْ نّسْ. نضْڒنْ ث ذِي ثنْذِينْثْ ن ذَاوُوذْ. مِّيسْ أَسَا إِذْوڒْ ذ أَجدْجِيذْ ذڭْ ومْشَانْ نّسْ. 
ذڭْ ؤُسڭّْوَاسْ وِيسّْ عِيشْرِينْ ن يَارُوبْعَامْ، أَجدْجِيذْ ن إِسْرَائِيل، إِذْوڒْ أَسَا ذ أَجدْجِيذْ خْ يَاهُوذَا. 
نتَّا إِحْكمْ وَاحِيثْ ؤُ-ربْعِينْ ن إِسڭّْوُوسَا ذِي ؤُرْشَالِيمْ. حنَّاسْ قَّارنْ أَسْ مَاعْكَا، يدْجِيسْ ن أَبِيشَالُومْ. 
أَسَا إِڭَّا مِينْ إِدْجَانْ نِيشَانْ ذِي ثِيطَّاوِينْ ن سِيذِي، أَمْ إِڭَّا بَابَاسْ ذَاوُوذْ. 
نتَّا إِسُّوفّغْ إِمثْليّنْ زِي ثمُّورْثْ ؤُشَا إِحيّذْ مَارَّا إِميْضَا ن لْ-أَصْنَامْ نْسنْ إِ ثُوغَا ڭِّينْ ڒجْذُوذْ نّسْ. 
نتَّا إِسّْحيّذْ ؤُڒَا ذ حنَّاسْ مَاعْكَا زِي جّهْذْ نّسْ، مَاغَارْ نتَّاثْ ثُوغَا ثڭَّا إِجّْ ن ڒخْيَاڒْ ذ جّْعِيفشْثْ إِ ثْربِّيثْ ن شْوَارْثِي. أَسَا إِقسّْ جّْعِيفشْثْ نّسْ ؤُشَا إِسّْشمْضْ إِ-ت غَارْ ثغْزَارْثْ ن قِيذْرُونْ. 
وَارْ تّْوَاحيّْذنْثْ ڒڭْعُوذِي، مَاشَا ؤُڒْ ن أَسَا ثُوغَا إِشْضَارْ نِيشَانْ إِ سِيذِي، مَارَّا ؤُسَّانْ ن ثُوذَارْثْ نّسْ. 
نتَّا يِيوِي ثِيوْهِيبِينْ إِقدّْسنْ ن بَابَاسْ ؤُڒَا ذ ثِيوْهِيبِينْ نِّي إِسّْقدّسْ نتَّا س يِيخفْ نّسْ ذِي ثَادَّارْثْ ن سِيذِي: نُّوقَارْثْ ذ وُورغْ ذ ڒقْشُوعْ نّغْنِي. 
ثُوغَا ذِينْ أَمنْغِي جَارْ أَسَا ذ بَاعْشَا، أَجدْجِيذْ ن إِسْرَائِيل، مَارَّا ؤُسَّانْ نْسنْ. 
بَاعْشَا، أَجدْجِيذْ ن إِسْرَائِيل، إِڭعّذْ غَارْ ؤُمنْغِي ضِيدّْ إِ يَاهُوذَا ؤُشَا إِبْنَا رَامَا، حِيمَا وَارْ إِتّجِّي ؤُڒَا ذ إِجّْ أَذْ يُويُورْ غَارْ أَسَا، حِيمَا أَذْ غَارسْ د-يَاسْ. 
خنِّي إِكْسِي أَسَا مَارَّا نُّوقَارْثْ ذ وُورغْ إِ ثُوغَا إِقِّيمنْ ذڭْ إِخَّامنْ ن ثْخُوبَايْ ن ثَادَّارْثْ ن سِيذِي ؤُڒَا ذ ثْخُوبَايْ ن ثَادَّارْثْ ن ؤُجدْجِيذْ، ؤُشَا إِسلّمْ مَارَّا أَيَا إِ إِمْسخَّارنْ نّسْ. ؤُشَا أَجدْجِيذْ أَسَا إِسّكّْ إِ-ثنْ غَارْ بِينْهَاذَاذْ، مِّيسْ ن ثَابْرِيمُونْ، مِّيسْ ن حَازْيُونْ، أَجدْجِيذْ ن أَرَامْ، ونِّي ثُوغَا إِزدّْغنْ ذِي ذِيمَاشْقْ، حِيمَا أَذْ يِينِي: 
”أَقَا ذِينْ إِجّْ ن ڒْعَاهْذْ جَارْ أَيِي ذ شكْ، جَارْ بَابَا ذ بَابَاشْ. خْزَارْ نشّْ أَذْ أَشْ د-سّكّغْ إِشْثْ ن ثرْزفْثْ ن نُّوقَارْثْ ذ وُورغْ. رُوحْ، فْسِي ڒْعَاهْذْ نّشْ أَكْ-ذ بَاعْشَا، أَجدْجِيذْ ن إِسْرَائِيل، مَاحنْذْ أَذْ إِكَّارْ أَذْ خَافِي إِڭّْوجْ.“ 
بِينْهَاذَاذْ إِسْڒَا غَارْ ؤُجدْجِيذْ أَسَا ؤُشَا إِسّكّْ إِكُومَانْذَارنْ ن ڒْعسْكَارْ نّسْ غَارْ ثْندَّامْ ن إِسْرَائِيل. نتَّا إِغْڒبْ خْ عِييُونْ ذ ذَانْ ذ أَبَالْ-بَايْثْ-مَاعْكَا ذ مَارَّا كِينَّارُوثْ. أَقَا إِسّكّْ إِ-ثنْ غَارْ مَارَّا ثَامُّورْثْ ن نَافْثَالِي. 
ؤُمِي بَاعْشَا إِسْڒَا خْ ؤُيَا، إِمْسَارْ، أَقَا نتَّا إِسّْبدّْ ذِي ڒبْنِي ن رَامَا ؤُشَا إِقِّيمْ إِزدّغْ ذِي ثِيرْصَا. 
أَجدْجِيذْ أَسَا إِجَّا أَذْ بَارّْحنْ ذِي مَارَّا يَاهُوذَا، وَارْ إِتّْغِيمِي حذْ، حِيمَا نِيثْنِي أَذْ كّْسنْ إِژْرَا زِي رَامَا ذ ؤُكشُّوضْ إِ زِي ثُوغَا إِبنَّا بَاعْشَا. ؤُ س مَانْ أَيَا إِبْنَا ؤُجدْجِيذْ أَسَا ثَانْذِينْثْ ن جِيبْعَا ذِي بِينْيَامِينْ ذ مِيصْفَا. 
إِمزْرُوينْ إِقِّيمنْ ن أَسَا، مَارَّا ثِيمڭَّا نّسْ إِمحْضنْ ذ مَارَّا مِينْ إِڭَّا ؤُڒَا ذ ثِيندَّامْ نِّي إِبْنَا، مَا مَانْ أَيَا مَارَّا وَارْ إِتّْوَازمّمْ شَا ذڭْ وذْلِيسْ ن إِمزْرُوينْ ن إِجدْجِيذنْ ن يَاهُوذَا؟ مَاشَا ؤُمِي إِوْسَارْ، إِهْڒشْ نتَّا زڭْ إِضَارنْ نّسْ س ثْنَاينْ. 
أَسَا إِڭَّا أَذْ يَاريّحْ جَارْ ڒجْذُوذْ نّسْ. نتَّا إِتّْوَانْضڒْ جَارْ ڒجْذُوذْ نّسْ ذِي ثنْذِينْثْ ن بَابَاسْ ذَاوُوذْ. مِّيسْ يَاهُوشَافَاطْ إِذْوڒْ ذ أَجدْجِيذْ ذڭْ ومْشَانْ نّسْ. 
نَاذَابْ، مِّيسْ ن يَارُوبْعَامْ، إِذْوڒْ ذ أَجدْجِيذْ خْ إِسْرَائِيل ذڭْ ؤُسڭّْوَاسْ وِيسّْ ثْنَاينْ ن أَسَا، أَجدْجِيذْ ن يَاهُوذَا. نتَّا إِحْكمْ ثْنَاينْ ن إِسڭّْوُوسَا خْ إِسْرَائِيل. 
نتَّا إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي ؤُشَا يُويُورْ ذڭْ وبْرِيذْ ن بَابَاسْ ؤُ ذِي دّْنُوبْ نّسْ إِ زِي يَارَّا إِسْرَائِيل أَذْ إِخْضَا. 
بَاعْشَا، مِّيسْ ن أَبِييَا، زِي ثَادَّارْثْ ن إِسَّاكَارْ، إِڭَّا خَاسْ إِشْثْ ن ثْمعْمُوتْشْ ؤُ بَاعْشَا إِغْڒبْ خَاسْ ذِي جِيبَّاثُونْ نِّي إِدْجَانْ ن إِفِيلِيسْطِينِييّنْ، ؤُمِي نَاذَابْ ذ مَارَّا إِسْرَائِيل ثُوغَا إِنّْضنْ إِ جِيبَّاثُونْ. 
إِنْغَا إِ-ث بَاعْشَا ذڭْ ؤُسڭّْوَاسْ وِيسّْ ثْڒَاثَا ن أَسَا، أَجدْجِيذْ ن يَاهُوذَا، ؤُ نتَّا إِذْوڒْ ذ أَجدْجِيذْ ذڭْ ومْشَانْ نّسْ. 
ؤُمِي إِذْوڒْ نتَّا ذ أَجدْجِيذْ، إِمْسَارْ، أَقَا إِقْضَا خْ مَارَّا ثَادَّارْثْ ن يَارُوبْعَامْ. ؤُڒَا ذ شَا ن يَارُوبْعَامْ نِّي يَارِّينْ نّفْسْ، وَارْ ث إِجِّي أَذْ إِقِّيمْ إِدَّارْ، أَڒَامِي ث إِثحَّا عْلَاحْسَابْ أَوَاڒْ ن سِيذِي نِّي ثُوغَا إِسِّيوڒْ س ؤُقمُّومْ ن ؤُمْسخَّارْ نّسْ أَخِييَا، أَشِيلُونِي، 
ذِي سِّيبّثْ ن دّْنُوبْ ن يَارُوبْعَامْ إِ زِي إِخْضَا نتَّا ؤُ إِ زِي يَارَّا إِسْرَائِيل أَذْ إِخْضَا س ثْمڭَّا نّسْ إِخوّْجنْ إِ زِي إِسْعَارْ سِيذِي، أَربِّي ن إِسْرَائِيل. 
إِمزْرُوينْ إِقِّيمنْ ن نَاذَابْ، ذ مَارَّا مِينْ إِڭَّا، مَا مَانْ أَيَا مَارَّا وَارْ إِتّْوَازمّمْ شَا ذڭْ وذْلِيسْ ن إِمزْرُوينْ ن إِجدْجِيذنْ ن إِسْرَائِيل؟ 
ثُوغَا ذِينْ أَمنْغِي جَارْ أَسَا ذ بَاعْشَا، أَجدْجِيذْ ن إِسْرَائِيل، مَارَّا ؤُسَّانْ نْسنْ. 
ذڭْ ؤُسڭّْوَاسْ وِيسّْ ثْڒَاثَا ن ؤُجدْجِيذْ أَسَا، أَجدْجِيذْ ن يَاهُوذَا، إِذْوڒْ بَاعْشَا، مِّيسْ ن أَخِييَا، ذ أَجدْجِيذْ خْ مَارَّا إِسْرَائِيل ذِي ثِيرْصَا، ؤُ نتَّا إِحْكمْ أَربْعَا ؤُ-عِيشْرِينْ ن إِسڭّْوُوسَا. 
نتَّا إِڭَّا مِينْ إِدْجَانْ ذ أَعفَّانْ ذِي ثِيطَّاوِينْ ن سِيذِي ؤُ يُويُورْ ذڭْ وبْرِيذْ ن يَارُوبْعَامْ ؤُ ذِي دّْنُوبْ نّسْ إِ زِي يَارَّا إِسْرَائِيل أَذْ إِخْضَا. 
