﻿أَعَاوذْ ن شَّارِيعَا.
8.
”أَذْ ثحْضَامْ مَارَّا ڒُومُورَاثْ إِ زِي ذ أَومْ ؤُمُورغْ أَسّْ-أَ، مَاحنْذْ أَذْ ثنْثْ ثڭّمْ، حِيمَا أَذْ ثدَّارمْ ؤُ أَذْ ثمَّارنْيمْ ؤُشَا أَذْ ثَاذْفمْ غَارْ ثمُّورْثْ، ثنِّي إِجُّودْجْ سِيذِي إِ ڒجْذُوذْ نْومْ، ؤُشَا أَذْ ت ثكْسِيمْ ذ ڒْوَارْثْ. 
أَذْ ثِيذَارذْ مَارَّا أَبْرِيذْ خْ مَانِي شكْ إِڭوّذْ سِيذِي، أَربِّي نّشْ، أَربْعِينْ ن إِسڭّْوُوسَا ذِي ڒخْڒَا حِيمَا أَذْ شكْ إِسّْوَاضعْ ؤُ أَذْ شكْ إِقدْجبْ مَاحنْذْ أَذْ إِسّنْ مِينْ ذِينْ ذڭْ وُوڒْ نّشْ، مَا أَذْ ثحْضِيذْ ڒُومُورَاثْ نّسْ نِيغْ لَّا. 
نتَّا إِسّْوَاضعْ إِ شكْ ؤُ إِسّْڒَاژْ إِ شكْ ؤُ إِوْشَا أَشْ ’مَانَّا‘ ذ مَاشَّا، ثنِّي وَارْ ثسِّينذْ شَا شكْ ؤُڒَا ذ ڒجْذُوذْ نّشْ وَارْ ت سِّيننْ شَا، حِيمَا أَذْ أَشْ إِسّْشنْ بلِّي بْنَاذمْ وَارْ إِدَّارْ س وغْرُومْ وَاهَا، مَاشَا أَقَا بْنَاذمْ إِدَّارْ س مَارَّا مِينْ د-إِفّْغنْ زڭْ ؤُقمُّومْ ن سِيذِي. 
أَرُّوضْ نّشْ عمَّارْصْ وَارْ خَاكْ إِوْسَارْ ؤُڒَا ذ أَضَارْ نّشْ وَارْ يُوفّْ شَا ذِي مَارَّا أَربْعِينْ ن إِسڭّْوُوسَا-يَا. 
سنْ ذڭْ وُوڒْ نّشْ، بلِّي سِيذِي، أَربِّي نّشْ، أَقَا يَاربَّا إِ شكْ، أَمْ مَامّشْ يَاربَّا أَرْيَازْ مِّيسْ 
ؤُشَا حْضَا ڒُومُورَاثْ ن سِيذِي، أَربِّي نّشْ، أَڒَامِي ثدْجِيذْ ذڭْ إِبْرِيذنْ نّسْ ؤُ أَڒَامِي زَّايسْ تّڭّْوذذْ.“ 
”مِينْزِي سِيذِي، أَربِّي نّشْ، أَذْ شكْ إِسِّيذفْ ذڭْ إِشْثْ ن ثمُّورْثْ إِشْنَانْ، إِشْثْ ن ثمُّورْثْ ن ثْغزْرَاثِينْ ذ ڒْعُونْصَارَاثْ ذ وَامَانْ إِهوْڒنْ، إِنِّي د-إِفّْغنْ زِي ثيْسَارْثْ ذ وذْرَارْ، 
إِشْثْ ن ثمُّورْثْ ن إِرْذنْ ذ إِمنْذِي ذ ثْزَايَارِينْ ذ وَارْثَانْ ن ثَازَارْثْ ذ إِرمَّامنْ، إِشْثْ ن ثمُّورْثْ ثشُّورْ س زّشْثْ ن ثْزِيثُونْثْ ؤُ ن ثَامّنْثْ، 
إِشْثْ ن ثمُّورْثْ مَانِي غَا ثشّذْ أَغْرُومْ ؤُمِي وَارْ ذِينْ ڒخْصصْ ؤُ وَارْ شكْ إِتّْخصِّي شَا ذَايسْ، إِشْثْ ن ثمُّورْثْ، إِژْرَا نّسْ شُّورنْ س وُوزَّاڒْ ؤُ زڭْ إِذُورَارْ نّسْ أَذْ ثْنقْشذْ نّْحَاسْ. 
مَاڒَا ثشِّيذْ ؤُ ثجِّيوْنذْ، أَذْ ثْبَارْكذْ سِيذِي، أَربِّي نّشْ، خْ ثمُّورْثْ إِشْنَانْ، ثنِّي ذ أَشْ إِوْشَا.“ 
”حْضَا إِخفْ نّشْ، حِيمَا وَارْ ثتُّوذْ سِيذِي، أَربِّي نّشْ، أَڒَامِي وَارْ ثحْضِيذْ ڒُومُورَاثْ نّسْ، لْفَارَايِيضْ نّسْ ذ ثْوصَّا نّسْ، ثِينِّي ذ أَشْ ؤُمُورغْ أَسّْ-أَ، 
حِيمَا وَارْ إِتِّيڒِي - مَاڒَا ثشِّيذْ ؤُ ثجِّيوْنذْ ؤُشَا أَقَا ثبْنِيذْ ثُوذْرِينْ إِشْنَانْ، ثِينِّي إِ ذِي ثڭِّيذْ أَذْ ذَايْسنْثْ ثْزذْغذْ، 
ؤُشَا إِفُونَاسنْ ذ ثْفُونَاسِينْ نّشْ ذ وُودْجِي نّشْ تّْوَامَّارْنِينْ ؤُ نُّوقَارْثْ ذ وُورغْ نِّي غَاركْ أَقَا تّْوَامَّارْنِينْ، ؤُ مَارَّا مِينْ غَاركْ أَقَا إِتّْوَامَّارْنِي - 
أَذْ ثسّْڭعّْذذْ ؤُڒْ نّشْ، أَذْ ثتُّوذْ سِيذِي، أَربِّي نّشْ، ونِّي شكْ د-إِسُّوفّْغنْ زِي ثمُّورْثْ ن مِيصْرَا، زِي ثَادَّارْثْ ن ثسْمُوغِي ... 
ذ ونِّي إِ شكْ د-إِنذْهنْ ذِي ڒخْڒَا إِمْغَارنْ ؤُ إِسَّاڭّْوَاذنْ مَانِي ثُوغَا إِفِيغْرَانْ يَارْغِينْ ذ ثْغَارْضْمِيوِينْ ؤُڒَا ذِي ثَامُّورْثْ إِتّْفَاذَانْ بْڒَا أَمَانْ، ذ ونِّي د-إِسُّوفّْغنْ أَمَانْ زڭْ وژْرُو ن سّدْجَاحْ، 
ذ ونِّي ذ أَشْ إِوْشِينْ ’مَانَّا‘ إِ مَاشَّا ذِي ڒخْڒَا، مَانَّا نِّي وَارْ سِّيننْ ڒجْذُوذْ نْومْ، حِيمَا أَذْ شكْ إِسّْوَاضعْ ؤُ حِيمَا أَذْ شكْ إِقدْجبْ ؤُ حِيمَا أَذْ أَشْ إِڭّْ ثْشُونِي غَارْ ؤُنڭَّارْ، 
ؤُشَا خنِّي أَذْ ثِينِيذْ ذڭْ وُوڒْ نّشْ: ’س ثْزمَّارْ إِنُو ذ جّهْذْ ن ؤُفُوسْ إِنُو طّْفغْ مَارَّا ڒكْسِيبثْ-أَ إِ يِيخفْ إِنُو.‘ 
إِذَارْ سِيذِي، أَربِّي نّشْ أَقَا نتَّا إِ ذ أَشْ إِوْشِينْ جّهْذْ حِيمَا أَذْ ثْكسْبذْ إِشْثْ ن ڒكْسِيبثْ ثمْغَارْ مَاحنْذْ أَذْ إِمْثنْ أَمُّو ڒْعَاهْذْ نّسْ نِّي ثُوغَا إِجُّودْجْ إِ ڒجْذُوذْ نّشْ، أَمْ ثدْجَا أَسّْ-أَ. 
مَاڒَا ثِيوْضذْ أَذْ ثتُّوذْ سِيذِي، أَربِّي نّشْ، ؤُشَا أَذْ ثُويُورذْ أَوَارْنِي إِ إِربِّيثنْ نّغْنِي، أَذْ أَسنْ ثْعبْذذْ ؤُ أَذْ أَسنْ ثْبنْذْقذْ، نشّْ أَسّْ-أَ بَارّْحغْ أَشْ-د، أَقَا أَذْ ثتّْوَاهلّْكمْ س تِّيذثْ. 
أَذْ ثتّْوَاهلّْكمْ أَمْ ڒڭْنُوسْ نِّي خْ يُوژّڒْ سِيذِي زَّاثْ إِ وُوذمْ نْومْ، مِينْزِي وَارْ ثسْڒِيمْ إِ ثْمِيجَّا ن سِيذِي، أَربِّي نْومْ.“ 
