﻿إِلَاوِييّنْ.
22.
إِسِّيوڒْ سِيذِي أَكْ-ذ مُوسَا، إِنَّا: 
”سِيوڒْ أَكْ-ذ هَارُونْ ؤُ أَكْ-ذ وَارَّاوْ نّسْ، مَاحنْذْ، مَاڒَا إِتّْخصَّا، وَارْ تَّاكّْوَاضنْ غَارْ ثوْهِيبِينْ إِقدّْسنْ ن أَيْثْ ن إِسْرَائِيل ثِينِّي ذ أَيِي سّْقدّْسنْ، حِيمَا وَارْ سّخْسَارَانْ إِسمْ أَمْقدَّاسْ إِنُو. نشّْ ذ سِيذِي! 
إِنِي أَسنْ: ’مَارَّا أَرْيَازْ زِي زَّارِيعثْ نْومْ ذِي مَارَّا جِّيڒَاثْ نْومْ، ونِّي د غَا إِقَارّْبنْ غَارْ ثوْهِيبِينْ إِقدّْسنْ، ثِينِّي سّْقدّْسنْ أَيْثْ ن إِسْرَائِيل إِ سِيذِي، أَمْ إِخْمجْ نتَّا، أَقَا أَذْ إِتّْوَاقسّْ ڒعْمَارْ نِّي زِي زَّاثْ إِ وُوذمْ إِنُو. نشّْ ذ سِيذِي. 
ؤُڒَا ذ إِجّنْ زِي زَّارِيعثْ ن هَارُونْ نِّي ذِي إِدْجَا ڒْبَارْصْ نِيغْ ونِّي غَارْ إِدْجَا ؤُسيّڒْ، وَارْ إِتّتّْ زِي ثوْهِيبِينْ إِقدّْسنْ أَڒْ غَا يِيڒِي إِزْذِيڭْ. ونِّي إِحَاذَانْ شَا زِي مِينْ إِتّْوَاسّْخمْجنْ س إِجّْ ن ؤُمتِّينْ نِيغْ س إِجّْ ن ورْيَازْ نِّي ثُوغَا س ؤُسيّڒْ ن وَادْجُو، 
نِيغْ س إِجّْ ن ورْيَازْ نِّي إِحَاذَانْ شَا مِينْ إِتّْبُوعنْ إِ زِي إِذْوڒْ إِخْمجْ، نِيغْ إِحَاذَا إِجّْ ن بْنَاذمْ إِ زِي إِذْوڒْ إِخْمجْ س مَامّشْ مَا ثڭَّا ثخْمُوجِي نّسْ، 
ڒعْمَارْ نِّي إِحَاذَانْ ثْمسْڒَاشْثْ نِيغْ بْنَاذمْ نِّي أَذْ يِيڒِي إِخْمجْ أَڒْ ثَامذِّيثْ، وَارْ إِتّتّْ زِي ثوْهِيبِينْ إِقدّْسنْ، مْغِيرْ أَوَارْنِي إِ غَا إِسِّيرْذْ أَرِّيمثْ نّسْ س وَامَانْ. 
خْمِي د غَا ثغْڒِي ثْفُوشْثْ، أَذْ يِيڒِي إِزْذِيڭْ. أَوَارْنِي أَيَا أَذْ يشّْ زِي ثوْهِيبِينْ إِقدّْسنْ، مِينْزِي أَقَا أَثنْثْ ذ مَاشَّا نّسْ. 
وَارْ إِتّتّْ زڭْ إِشْثْ ن ڒْخشْبثْ نِيغْ زڭْ إِجّْ ن ؤُمُودَّارْ إِمزّْقنْ، مِينْزِي زَّايسْ إِ غَا إِسّخْمجْ إِخفْ نّسْ، نشّْ ذ سِيذِي! 
أَذْ حْضَانْ مِينْ خفْ ثنْ وصِّيغْ، حِيمَا وَارْ سَّاربُّونْ خْ يِيخفْ نْسنْ دّنْبْ ؤُ خنِّي أَذْ زَّايسْ مّْثنْ، خْمِي غَا سّْعِيدْجْثنْ أَيَا. نشّْ ذ سِيذِي ونِّي ثنْ إِسّْقدّْسنْ. 
ؤُڒَا ذ إِجّْ ن ؤُبَارَّانِي وَارْ إِتّتّْ زِي ثوْهِيبْثْ إِقدّْسنْ. أَمْعزّبْ إِ إِزدّْغنْ جَارْ إِكهَّاننْ ؤُڒَا ذ أَشوَّاڒْ وَارْ تّتّنْ زِي ثوْهِيبْثْ إِقدّْسنْ. 
مَاشَا مَاڒَا أَكهَّانْ إِسْغَا إِجّْ ن بْنَاذمْ س نُّوقَارْثْ نّسْ، أَقَا إِعدّڒْ إِ وَا مَاحنْذْ أَذْ يشّْ زِي مَاشَّا ن ثوْهِيبْثْ نّسْ، ؤُڒَا إِ يِينِّي د-إِتّْوَاخڒْقنْ ذِي ثَادَّارْثْ نّسْ. 
مَاڒَا يدْجِيسْ ن ؤُكهَّانْ ثذْوڒْ ذ ثَامْغَارْثْ ن إِجّْ ن ؤُبَارَّانِي، وَارْ ثتّتّْ شَا زِي ثوْهِيبْثْ إِ د-إِتّْوَاسّْڭعّْذنْ زِي ثوْهِيبِينْ إِقدّْسنْ. 
مَاشَا مَاڒَا يدْجِيسْ ن ؤُكهَّانْ أَقَا-ت ذ ثَاجَّاتْشْ نِيغْ ثتّْوَادْجفْ زڭْ ورْيَازْ نّسْ ؤُشَا وَارْ غَارسْ أَحنْجِيرْ ؤُشَا ثذْوڒْ-د غَارْ ثَادَّارْثْ ن بَابَاسْ، أَمْ ذِي ثمْژِي نّسْ، خنِّي أَذْ ثشّْ زِي مَاشَّا ن ثوْهِيبْثْ ن بَابَاسْ، مَاشَا ؤُڒَا ذ إِجّْ ن ؤُبَارَّانِي أَذْ زَّايسْ يشّْ. 
مَاڒَا شَا ن يِيجّنْ إِشَّا زِي ثوْهِيبْثْ إِقدّْسنْ س ؤُودَّارْ، خنِّي أَذْ غَارسْ يَارْنِي ثَاسْغَارْثْ ن ثخْمُوسشْثْ ؤُشَا أَذْ يَارّْ ثَاوْهِيبْثْ إِقدّْسنْ غَارْ ؤُكهَّانْ. 
وَارْ إِعدّڒْ أَذْ سّخْسَارنْ ثِيوْهِيبِينْ إِقدّْسنْ ن أَيْثْ ن إِسْرَائِيل، ثِينِّي سّْڭعّْذنْ نِيثْنِي غَارْ سِيذِي، 
أَڒَامِي إِ غَا سَّارْبُونْ أَمَارْوَاسْ ن ڒْمُوعْصِييّثْ خْ أَيْثْ ن إِسْرَايِيلْ، ؤُمِي غَا شّنْ نِيثْنِي زِي ثوْهِيبِينْ نْسنْ إِقدّْسنْ إِ ذ يَاوْينْ نِيثْنِي س يِيخفْ نْسنْ، مِينْزِي نشّْ ذ سِيذِي، ونِّي ثنْ إِسّْقدّْسنْ.‘ “ 
إِسِّيوڒْ سِيذِي أَكْ-ذ مُوسَا إِنَّا: 
”سِيوڒْ أَكْ-ذ هَارُونْ ذ وَارَّاوْ نّسْ ؤُ أَكْ-ذ مَارَّا أَيْثْ ن إِسْرَائِيل ؤُشَا إِنِي أَسنْ: ’ذ مَانْ أَيَا إِڭُّورْ إِ كُوڒْ إِجّنْ زِي ثَادَّارْثْ ن إِسْرَائِيل ؤُ إِ إِبَارَّانِييّنْ ذِي إِسْرَائِيل، ونِّي إِ غَا يِيوْينْ ثَاوْهِيبْثْ نّسْ ثنِّي د-يُوسِينْ أَكْ-ذ مَارَّا ڒوْعُوذْ نْسنْ ذ مَارَّا ثِيوْهِيبِينْ نْسنْ نِّي وْشِينْ س ڒْخَاضَارْ، ثنِّي قدّْمنْ نِيثْنِي ذ ثَاغَارْصْثْ ن وشْمَاضْ إِ سِيذِي. 
مَاحنْذْ أَذْ كنِّيوْ يَارّْ أَذْ ثِيڒِيمْ ثتّْوَاقبّْڒمْ إِتّْخصَّا أَذْ ثِيڒِي ثوْهِيبْثْ ذ إِجّْ ن ووْثمْ إِشْنَانْ قَاعْ زڭْ إِفُونَاسنْ نِيغْ زڭْ إِزْمَارنْ نِيغْ زڭْ إِشَارِّييّنْ. 
وَارْ إِعدّڒْ أَذْ ثْقدّْممْ شَا ن ڒْمَاڒْ ذَايسْ أَنعْضَابْ، مِينْزِي أَيَا وَارْ كنِّيوْ د-إِتَّارِّي أَذْ ذَايْومْ إِتّْوَافْ أَرْضَا. 
مَاڒَا إِجّْ ن ورْيَازْ إِقدّمْ إِشْثْ ن ثْغَارْصْثْ ن ڒهْنَا غَارْ سِيذِي، مَاحنْذْ أَذْ إِكمّڒْ إِجّْ ن لْوَاعْذْ نِيغْ أَمْ يِيشْثْ ن ثوْهِيبْثْ س ڒْخَاضَارْ، خنِّي أَذْ ثِيڒِي ثَاغَارْصْثْ ذ إِجّْ ن ؤُمُودَّارْ إِشْنَانْ قَاعْ زِي ڒبْهَايمْ نِيغْ زڭْ وُودْجِي، حِيمَا أَذْ ذَايسْ إِتّْوَافْ أَرْضَا. وَارْ إِعدّڒْ أَذْ ذَايسْ يِيڒِي ؤُڒَا ذ إِجّْ ن ڒْعِيبْ. 
مِينْ إِدْجَانْ ذ أَذَارْغَاڒْ نِيغْ مِينْ إِتّْوَارْژنْ نِيغْ مِينْ ذِي إِدْجَانْ إِجّْ ن ؤُيزِّيمْ يَارزْمنْ نِيغْ مِينْ ذِي دْجَانْثْ ثْفِيضْڒِيوِينْ نِيغْ جْذَامْ نِيغْ شَّامثْ ثخْسَارْ وَارْ ث-إِ-د-ثسّْقَارَّابمْ شَا غَارْ سِيذِي ؤُشَا وَارْ زَّايسْ تِّيوْيمْ ثَاوْهِيبْثْ ن ثْمسِّي إِ سِيذِي خْ ؤُعَالْطَارْ. 
مَاشَا إِجّْ ن ؤُفُونَاسْ نِيغْ إِجّنْ زڭْ وُودْجِي إِ إِقبْحنْ زِي سِّيبّثْ ن ثُوزّڭَّارْثْ نِيغْ ثُوقُوضضْثْ أَطَّاسْ، إِعدّڒْ أَذْ ث-إِ-د-ثسّْوجْذذْ أَمْ يِيشْثْ ن ثوْهِيبْثْ س ڒْخَاضَارْ، مَاشَا وَارْ ذَايسْ إِتّْوَافْ أَرْضَا إِ يِيجّْ ن لْوَاعْذْ. 
مِينْ إِذْڭدّْڭنْ، مِينْ إِڒبْزنْ، مِينْ إِمزّْقنْ، مِينْ إِتّْوَاقسّنْ وَارْ ث تِّيوْيمْ غَارْ سِيذِي، وَارْ تّڭّمْ أَيَا ذِي ثمُّورْثْ نْومْ. 
زڭْ ؤُفُوسْ ن مِّيسْ ن ؤُبَارَّانِي وَارْ تّْقدَّاممْ شَا زِي مَارَّا مَانْ أَيَا ؤُڒَا ذ إِشْثْ ن ثوْهِيبْثْ ذ مَاشَّا إِ أَربِّي، مِينْزِي ذَايسْ ڒْغشّْ نْسنْ ؤُڒَا ذ نّقْصَانْ نّسْ، مَانْ أَيَا وَارْ إِتّْوَاقبِّيڒْ شَا ذِي طّْوعْ نْومْ.‘ “ 
إِسِّيوڒْ سِيذِي أَكْ-ذ مُوسَا، إِنَّا: 
”خْمِي د-إِخدْجقْ ؤُفُونَاسْ نِيغْ إِزْمَارْ نِيغْ إِغَايْضْ، خنِّي أَذْ يِيڒِي سَاذُو حطُّو ن يمَّاسْ سبْعَا ن وُوسَّانْ. زڭْ وَاسّْ وِيسّْ ثْمنْيَا ؤُ أَوَارْنِي أَسْ أَذْ إِصْڒحْ إِ يَارْضَا أَمْ ثوْهِيبْثْ ن ثْمسِّي إِ سِيذِي. 
وَارْ إِعدّڒْ أَذْ ثْغَارْصذْ إِ ؤُفُونَاسْ نِيغْ إِ يِيجّنْ زڭْ وُودْجِي أَكْ-ذ مِّيسْ ذڭْ وَاسّْ ذ إِجّْ. 
خْ مِينِّي ثخْسمْ أَذْ ثْقدّْممْ ثَاوْهِيبْثْ ن ؤُقَاذِي إِ سِيذِي، قدّمْ خنِّي مِينْ إِصڒْحنْ إِ يَارْضَا نْومْ. 
أَذْ ثتّْوَاشّْ ذڭْ وَاسّْ نِّي نِّيثْ. وَارْ زَّايسْ تّجِّيمْ شَا أَڒْ صّْبحْ. نشّْ ذ سِيذِي! 
أَذْ ثحْضَامْ ثِيوصَّا إِنُو ؤُشَا أَذْ زَّايْسنْثْ ثڭّمْ. نشّْ ذ سِيذِي! 
وَارْ سّخْسَارَامْ إِسمْ إِنُو إِقدّْسنْ، حِيمَا نشّْ أَذْ تّْوَاقدّْسغْ ذِي ڒْوسْثْ ن أَيْثْ ن إِسْرَائِيل. نشّْ ذ سِيذِي، ونِّي كنِّيوْ إِسّْقدّْسنْ، 
ذ ونِّي كنِّيوْ د-إِسُّوفّْغنْ زِي ثمُّورْثْ ن مِيصْرَا، حِيمَا أَذْ إِڒِيغْ ذ أَربِّي إِ كنِّيوْ. نشّْ ذ سِيذِي!‘ “ 
