﻿أَمزْوَارُو.
49.
إِڒَاغَا يَاعْقُوبْ خْ إِحنْجِيرنْ نّسْ، إِنَّا: ”سْمُونمْ-د إِخفْ نْومْ، أَذْ أَومْ إِنِيغْ مِينْ ذ أَومْ غَا إِمْسَارنْ ذڭْ ؤُنڭَّارْ ن وُوسَّانْ. 
سْمُونمْ-د إِخفْ نْومْ ؤُشَا سْڒمْ، أَ ثَارْوَا ن يَاعْقُوبْ، سْڒمْ إِ إِسْرَائِيل، بَابَاثْومْ. 
رُوبِينْ، شكْ ذ أَمنْزُو إِنُو، جّهْذْ إِنُو، ذ أَمزْوَارْ ن ثرْيَاسْثْ إِنُو، أَقَا شكْ ذ أَمْسضْفَارْ إِنُو ذِي ڒُوعْڒَا، ذ أَمْسضْفَارْ إِنُو ذِي ڒْعزّْ. 
شكْ أَمشْنَاوْ أَمَانْ إِتّْنقْڒَابنْ، وَارْ د أَيِي ثْضفَّارذْ، أَقَا شكْ ثْڭعّْذذْ غَارْ ڒشْثُو ن ڒمْڒَاشْ ن بَابَاشْ، ڒخْذنِّي ثسّْفضْحذْ ث، أَقَا غَارْ ڒشْثُو إِنُو إِڭعّذْ. 
شِيمْعُونْ ذ لَاوِي ذ أَوْمَاثنْ! ڒمْوَاسْ نْسنْ ذ ڒسْنَاحْ ن لْعُونْفْ. 
ذِي ثْمعْمُوتْشْ نْسنْ وَارْ إِتِّيذفْ ڒعْمَارْ إِنُو، ذڭْ وڭْرَاوْ نْسنْ وَارْ إِشَارّشْ وُوڒْ إِنُو. أَقَا ذڭْ ؤُخيّقْ نْسنْ نْغِينْ إِجّْ ن ورْيَازْ ؤُشَا إِعْجبْ أَسنْ أَذْ قسّنْ إِژوْرَانْ ن إِضَارنْ ن ؤُفُونَاسْ. 
ذ أَمنْعُوڒْ أَخيّقْ نْسنْ، مِينْزِي وَانِيثَا إِجْهذْ أَطَّاسْ، ؤُڒَا ذ أَذُوقّزْ ن ؤُفُوڭمْ نْسنْ، مِينْزِي إِقْسحْ. نشّْ أَذْ ثنْ بْضِيغْ خْ يَاعْقُوبْ، أَذْ ثنْ سُّويُوسغْ ذِي إِسْرَائِيل. 
يَاهُوذَا، أَيْثْمَاشْ أَذْ شكْ سّمْغَارنْ. أَفُوسْ نّشْ أَذْ يِيڒِي خْ يِيرِي ن ڒْعذْيَانْ نّشْ ؤُ إِحنْجِيرنْ ن بَابَاشْ أَذْ أَشْ بنْذْقنْ. 
يَاهُوذَا ذ إِجّْ ن مِّيسْ ن وَايْرَاذْ. زِي زَّارْذثْ إِ ثُوڒْيذْ، أَ مِّي. إِقْوسْ أَمشْنَاوْ أَيْرَاذْ ؤُ أَمشْمَاوْ ثَايْرَاذْثْ. وِي إِزعّمنْ أَذْ ث-د-إِسّْفَاقْ؟ 
ثَاغَّارْشْثْ ن ڒْحَاكمْ وَارْ إِتّْوَاكّسْ خْ يَاهُوذَا ؤُڒَا ذ أَزدْجَاضْ ن صُّولْطَا زِي جَارْ إِضَارنْ نّسْ، أَڒْ د غَا يَاسْ ونِّي إِ غَا إِوْشنْ أَرَّاحثْ ؤُشَا أَذْ أَسْ طَاعنْ ڒڭْنُوسْ. 
إِقّنْ غَارْ ثْزَايَارْثْ أَسْنُوسْ نّسْ ذ مِّيسْ نّسْ ن ثغْيُوتْشْ غَارْ ثْزَايَارْثْ إِشنّْعنْ أَطَّاسْ، إِسِّيرْذْ أَرُّوضْ نّسْ ذِي بِينُو ؤُ أَرُّوضْ نّسْ ذڭْ إِذَامّنْ ن ؤُضِيڒْ. 
ثِيطَّاوِينْ نّسْ ذ ثِيبَارْشَانِينْ س بِينُو ؤُ ثِيغْمَاسْ نّسْ ذ ثِيشمْڒَاڒِينْ س ؤُغِي. 
زابُولُونْ أَذْ إِزْذغْ غَارْ ثْمَا ن ڒبْحَارْ، أَذْ يِيڒِي ذ ڒْمُويِّي إِ إِغَارُّوبَا. أَغزْذِيسْ نّسْ أَذْ يَاريّحْ خْ صِيذُونْ. 
إِسَّاكَارْ ذ إِجّْ ن وغْيُوڒْ إِقْسحْ، إِزّڒْ جَارْ ثْنَاينْ ن ڒْمذْوَاثْ. 
ؤُمِي إِژْرَا أَرَّاحثْ ذ لمْلِيحْ ؤُ ثَامُّورْثْ أَقَا ثَارشّقْ، إِقْوسْ، إِڭَّا ثِيغَارْضِينْ نّسْ مَاحنْذْ أَذْ يَارْبُو أَرّْمحْ ؤُشَا أَمُّو إِ إِذْوڒْ سَاذُو أَزَايْڒُو ن إِسْمغْ. 
ذَانْ أَذْ إِحْكمْ ڒْڭنْسْ نّسْ أَمْ يِيشْثْ زِي ثْقبَّاڒْ ن إِسْرَائِيل. 
أَذْ يِيڒِي ذَانْ ذ أَفِيغَارْ ذڭْ وبْرِيذْ، ثَاڒفْسَا ذڭْ ؤُمسْرُوقْ، ونِّي إِزعّْفنْ ذڭْ إِنِيرْزَاونْ ن ؤُيِيسْ، أَڒْ غَا إِوْضَا ونِّي خَاسْ إِنْيِينْ غَارْ ضفَّارْ. 
أَسنْجمْ نّشْ إِ تّْرَاجِيغْ، أَ سِيذِي! 
جَاذْ، أَذْ خَاسْ حجْمنْثْ بَانْذِييَّاثْ، مَاشَا أَذْ خَاسنْ إِذَارّشْ. 
أَشِيرْ، أَغْرُومْ نّسْ أَذْ يِيڒِي ذ أَغْرُومْ إِسْمنْ، نتَّا أَذْ إِقدّمْ مَاشَّا يِيزِيذنْ إِڭلّْذنْ. 
نَافْثَالِي ذ إِشْثْ ن ثُوذَاذْثْ إِتّْوَاضڒْقنْ، إِسُّوفُّوغْ أَوَاڒنْ شْنَانْ. 
يُوسُوفْ ذ مِّيسْ ن ثْشجَّارْثْ إِتِّيشنْ ڒْغِيدْجثْ، مِّيسْ ن ثْشجَّارْثْ إِتِّيشنْ ڒْغِيدْجثْ غَارْ ثَاڒَا. يسِّيسْ ڭُّورنْثْ خْ وغْبَارْ. 
نِيثْنِي سَّارزْڭنْ خَاسْ ثُوذَارْثْ، نيّْشنْ خَاسْ، وَاهْ إِمْجبَّاذنْ نْ ڒْقوْسْ ضْفَارنْ ث، 
مَاشَا ڒْقوْسْ نّسْ إِقِّيمْ إِمْحضْ ؤُ إِغَادْجنْ ن إِفَاسّنْ نّسْ قِّيمنْ أَرْخُونْ س إِفَاسّنْ ن ؤُمْزمَّارْ ن يَاعْقُوبْ - خْ ؤُيَا نتَّا ذ أَمكْسَاوْ ذ ثَاصْضَارْثْ ن إِسْرَائِيل - 
س أَربِّي ن بَابَاشْ ونِّي شكْ إِ غَا إِعَاوْننْ، أَمْزمَّارْ خْ كُوڒْشِي، ونِّي شكْ إِ غَا إِبَارْكنْ س لْبَارَاكَاثْ ن ؤُجنَّا سنّجْ، س لْبَارَاكَاثْ ن وَامَانْ إِهوْڒنْ إِ ذِينْ إِدْجَانْ سْوَادَّايْ، س لْبَارَاكَاثْ ن ثُوبّشْثْ ذ ڒمْڒَاوثْ. 
لْبَارَاكَاثْ ن بَابَاشْ ذ ثِيمقّْرَانِينْ ؤُعْڒَانْثْ خْ لْبَارَاكَاثْ ن يِينِّي ذ أَيِي د-يجِّينْ ؤُشَا تَّاكّْوَاضنْثْ غَارْ ثْقِيشَّاثِينْ ن ثوْرِيرِينْ ن ڒبْذَا. أَذْ إِڒِينْثْ خْ ؤُزدْجِيفْ ن يُوسُوفْ، خْ ثُوشّنْثْ ن ؤُشُوَّافْ ن ونِّي يَاربُّو تَّاجْ ن وعْزَارْ جَارْ أَيْثْمَاسْ. 
بِينْيَامِينْ ذ إِجّْ ن وُوشّنْ إِتّْمزَّاقْ. غَارْ صّْبحْ أَذْ إِسَارْضْ زَّارْذثْ ؤُ س دْجِيڒثْ إِبطَّا ثَاكشَّاضْثْ.“ 
مَارَّا إِنَا ذ ثنْعَاشْ ن ثْقبَّاڒْ ن إِسْرَائِيل. ذ مَانْ أَيَا مِينْ ذ أَسنْ إِنَّا بَابَاثْسنْ ؤُشَا إِبَارْكْ إِ-ثنْ، وَاهْ، إِبَارْكْ إِ-ثنْ، كُوڒْ إِجّْ س لْبَارَاكَا نّسْ. 
يُومُورْ إِ-ثنْ، إِنَّا أَسنْ: ”أَذْ مَّارنْيغْ غَارْ ڒْڭنْسْ إِنُو. نضْڒمْ أَيِي أَكْ-ذ ڒجْذُوذْ إِنُو ذڭْ إِفْرِي ونِّي إِدْجَانْ ذڭْ إِيَّارْ ن إِفْرُونْ، أَحِيتِّي، 
ذڭْ إِفْرِي ونِّي إِدْجَانْ ذڭْ إِيَّارْ ن مَاكْفِيلَا إِ إِدْجَانْ زَّاثْ إِ مَامْرِي ذِي ثمُّورْثْ ن كنْعَانْ، ثنِّي إِسْغَا إِبْرَاهِيمْ أَكْ-ذ ييَّارْ زِي إِفْرُونْ، أَحِيتِّي، حِيمَا أَذْ يِيڒِي ذ أَنْضڒْ نّسْ. 
ذِينِّي إِ نضْڒنْ إِبْرَاهِيمْ ذ سَارَا ثَامْغَارْثْ نّسْ. ذِينِّي إِ نضْڒنْ إِسْحَاقْ ذ ثمْغَارْثْ نّسْ رِيفْقَا. ؤُ نشّْ نضْڒغْ ذِينْ لِييَا. 
إِيَّارْ س إِفْرِي إِ ثُوغَا ذَايسْ إِدْجَانْ إِمّْسغْ خْ ثَارْوَا ن حِيثْ.“ 
ؤُمِي إِكمّڒْ يَاعْقُوبْ أَذْ إِوصَّا إِحنْجِيرنْ نّسْ، إِكمّشْ إِضَارنْ نّسْ ذِي قَامَا، إِفّغْ إِ-ث بُوحْبڒْ ؤُشَا إِمَّارْنِي غَارْ ڒْڭنْسْ نّسْ. 
