﻿Turpaaina.
50.
Iosep i inep taau nate un tamaana ma i luani ma i dum a papaara waana. 
Ma Iosep i naagagon taa a kum doktaa baa diat laana papaam karomi, naa diat a wamong a minaatin Israael ma ta kum marasin kupi koku i mareng. Io, diat paami lenmaa. 
I welaar ut ma 40 bungbung baa a kum doktaa diat wamongi ma ra marasin, maa a pinapaam mi i laana lo ut 40 bungbung uni. Ma a taara Aaigipto diat ki na tapunuk kup Iaakob welaar ma 70 bungbung. 
Baa a kum bungbung na tapunuk ia raap, Iosep i piri karom a kum mukmuga anun Paraao naa, “Baa muaat a maari iaau, muaat a pirpir taau anung karom Paraao lenbi, 
‘Tamaang ia weweliman ta iaau ma i piri lenbi naa, baa in maat, miaat a punangi u ra maata na waat baa ia ut ia kil muga taai, irong u ra pia Kaanaan. Io, mi un mulaaot wa iaau baa ang waan ma ang punang wa tamaang ma namur ang waan talili balet.’” 
Paraao i piri naa, “Un waan ma un punang wa tamaam, maa ia weweliman ta ui kupi un punangi.” 
Io, Iosep i waan kupi in punang wa tamaana. A kum tena pinapaam raap anun Paraao diat waan ungaai mai, ungaai ma a kum ngaalangaala ko ra nuna mataanitu, ma ra kum ngaalangaala raap kaai taangirong Aaigipto. 
Diat ungaai ma ra taara raap anun Iosep, kum tatena liklik, ma a taara raap anun tamaana Iaakob. A kum naat liklik maku, ma ra kum sip ma a kum bulumakaau maa diat ki talili irong Gosaan. 
A kum kiki na winawaan, ma ra kum muaana baa diat waanwaan ma ra kum os diat kaai diat waan ut, a ngaala na taara maa diat waan ungaai mai. 
Baa diat waan paat u ra wanua baa di walwali wit iaai irong Aataad, marawaai u ra daanim Ioridaan, diat luan dekdek ma diat kulkulaai unaanga nate, ma matira Iosep i taar taa balet 7 na bung na tapunuk kup tamaana. 
A taara Kaanaan baa diat lalaaun matira, diat babo a pinapaam na tapunuk baa di paami u ra wanua baa di walwali a wit iaai irong Aataad. Ma diat piri naa, “A taara Aaigipto diat paam waiaa a pinapaam na tapunuk.” Maa ia a kabina baa di waatung a wanua maa marawaai u ra daanim Ioridaan ma Aabel-Misraaim. 
Io, a kum natnatun Iaakob diat paami lenutmaa ia wapua ta diat uni. 
Diat loi kup a pia Kaanaan, ma diat punang taai u ra maata na waat u ra pia Maakpelaa, marawaai Maamre, a maata na waat ungaai ma ra pakaana pia baa Aabaraam i kul paai kon Epron a te Ket, kupi din punpunang minaat iaai. 
Iosep ungaai ma ra kum tateina raap, ma diat kaai baa diat waan ungaai mai kup a pupunang, diat waan talili raap balet urong Aaigipto namur taa ra pupunang. 
Baa a kum tatein Iosep diat baboi baa tamaandiat ia maat, diat piri lenbi, “Baa Iosep in nuknuk na binabaalu karom daat, u ra mangamangaan baa daat aa paam taai uni, daat a lawaai ma?” 
Io, diat taar wa a pirpir karom Iosep lenbi, “Tamaam ia ung taa a naagagon bi namur baa i maat maku. 
I piri naa, ‘Bi ia a pirpir baa muaat a piri karom Iosep: Iaau aaring ui baa un dumaana wa aakaina baa a kum tatem liklik diat aa paam taai un ui. Maari diat ma un dumaana wa anundiat aakaina, maa diat kaai a kum tultul anun God anun tamaam.’” Baa anundiat wewapua i tuk paa Iosep, Iosep i luan. 
A kum tateina diat waan paat karomi, diat ki but keke namuga naana, ma diat piri lenbi, “Miaat a papaam na karabus karom ui.” 
Iaku Iosep i piri taan diat naa, “Koku muaat burut. Iaau wakir God. 
Muaat nem na baanaakaka iaau, iaku God i pukui kup a koina, kupi in paam ot paa a nuknukina mari daat baboi, baa i walaaun paa mongmongoro na taara. 
Io, koku muaat burut. Iaau ang tabaara muaat ma a kum natnatumuaat kaai.” Ma Iosep i pirpir na maarmaari karom diat, ma i wango a nuknukindiat. 
Iosep i ki irong Aaigipto ungaai ut ma ra wuna taara anun tamaana. I lalaaun paa 110 kilaala. 
Ma i babo taa ut a wetula taaun taara, a kum taptabun Eparaaim. Ma i babo taa utkaai a kum natnatun Maakir a natun Maanaase. A kum natnatun Maakir baa di buta diat, di ung ta diat naa ra kakin Iosep kupi diat a kum natnatun Iosep ma. 
Iosep i piri karom a kum tateina naa, “Iaau ang maat ma. Iaku God in waraaut muaat, ma in ben pari pa muaat ko ra pia mi, ma in ben ta muaat kup a pia baa ia weweliman taai karom Aabaraam, Aaisaak ma Iaakob.” 
Ma Iosep i wapua a taara anun Israael naa, “Muaat a weweliman karom iaau naa, u ra bung baa God in waraaut muaat ma in ben apari pa muaat, muaat a lo paa utkaai a ururing ma muaat a waan pari ungaai mai ko ra taamaan mi.” 
Ma Iosep i maat baa i 110 kilaala anuna. Ma namur diat wamong taa a minaatina ma ra kum marasin kupi koku i mareng. Ma diat waruk taai u ra bok na minaat irong Aaigipto. 
