﻿लूका.
13.
वोना बेरा काही लोग गीन, यीसु ला, काही गलीली मानूस गीनको बारे मा सांगन आइन, जिनको खून को बरोबरी बलिदान कियो गयो जनावर लक, राजपाल पिलातुस ना करयो होतो। 
तबा यीसु ना उन लोग गीनला कहीस, तुम्ही काजक सोचासो का यो गलीली मानूस बाकी लोकगीन लक लगत पापी सेत, यो कारन लक, उन पर आफद आइसेस। 
असो गोस्टी नहात मी तुमी ला सागंसू, का तुमी पस्तावा कर मन नही बदलने, तो वसोच नास होय जाने। 
अखीन तुमी काजक, सोचासो का सीलोह मा मीनार पड़न को कारन 18 लोकगीन मर गईन, उ येरुसलेम को सब रव्हन वारा लक जादा पापी होतिन। 
असो नहात अदी तुमी पस्तावा कर, मन नही बदलने तो असोच नास भई जाने। 
तबा यीसु ना उनला, एक उदाहरन सांग्यो, कोनी, मानूस को अंगूर को बारी मा, एक अँजीर को झाड़ होत्यो। उ वोमा फर खोजन आयो पर वोला, एक भी फर नही मिलयो। 
तबा वोना अंगूर को बगीचा को माली ला कहीस, चोव! मी तीन- साल लक, यो अँजीर को झाड़ मा फर खोजन आयो, पर एकच फर नही पायो। एला, काप डाखो काहे का यो फालतू मा जघा घेरासेत। 
पर माली ना कव्हयो, मालीक यो साल अखीन रव्हन दे, मी एको, चारि कन खन्दकेना येको, जड़ मा मी खात डाखसू। 
तबा मंग भी नही फलेत, त काप दियो जाहेत। 
पवीतर दिवस मा यीसु कोनी, सभाघर मा उपदेस देवत होत्यो। 
वहान एक बाई होती जोन ला 18 साल लक, एक कमजोर करन वालो, बुरो आतमा झोमो होत्यो वा वोवन केना, कुबड़ी भई गई होती। वा कसी, भी सीधी नही होय सकत होती। 
यीसु ना वोला चोवके, ना बुलायो अखीन वोला कहीस, हे बाई तु साजरी भई गइसेस। 
अखीन वोना वोको, पर हात रख्यो, उ वोच बेरा साजरो भई गई अखीन, परमेस्वर ला धन्यवाद बड़ाई देवन लगी। 
तबा सभाघर को मुखिया गीन, हिजड़ गईन काहेका, यीसु ना पवीतर दिवस मा बाई ला साजरो करीस, तबा लोकगीन कव्हन, लगीन 6 दिवस काम को सेत, वोना दिवस मा साजरो होव, अना पवीतर दिवस मा नोको आव। 
पर पिरभू ना कहीस, हे कपटी गीन का पवीतर दिवस मा तुम आपरो जानवर गधा बईल गीनला डोगा मा पानी देवसो का नही? 
का साजरो नाहती, का यो बायका जोन अबराहम को टूरी सेत, जोनला सैतान ना अठरा साल लक बन्धो होतो, पवीतर दिवस यो बंधन लक सुटाई जाय? 
यीसु को यो गोस्टी आयक केना, वोको सब बिरोध करनवारा लजा गईन, अना सप्पा लोकगीन वोना महीमा को काम चोवके खुसी लक भर गईन। 
यीसु ना कव्हयो परमेस्वर को, राज कोन को जसो सेत, मी एको बरोबरी काजक लक करु? 
सरग को राज एक राई को दाना जसो सेत, जोनला कोनी मानूस ना बगीचा मा लगायो, वा गजब मोठयो भयी गयो, अखीन पक्सी ओना झाड़ को डार मा बसेरा करन लगीन। 
मंघा यीसु ना कव्हयो, “परमेस्वर को राज को बरोबरी काजक लक करु? 
वो खमीर को जसो सेत जोनला लेय के, एक बायको ना दहा किलो कनीक मा मिला दियो सबा 10 कीलो आप खमीर बन गयो।” 
यीसु गाँव-गाँव नगर-नगर सीकावत, येरुसलेम नगर को कन, जाय रहयो होतो। 
कोनी ना पुसयो ओ पिरभू! का जरा सो लोक गीन सूटकारा पाहेत? एको पर यीसु ना कव्हयो, 
सकड़ो किवाड़ लक, धसनो को पूरो-पूरो कोसीस करो, काहेकि मी तुमी ला कव्हसू, कोसीस करनो पर भी गजब लोकगीन धसन को लायक भी नही रहेत। 
जब घरा को मालीक उभो भई केना, किवाड़ लगा देहेत, तबा तुम्हि बाहेर लक खट-खाटावने, अखीन कव्हने आमरो लाय किवाड़ उघाड़!तब उ तुम्हिला सांग देहत, तुम्ही कहान लक आइसेव, मी नही जानासू? 
तबा तुमच कव्हने, आमी तोरो संग जेवन करीसेस, तुमी बजार मा उपदेस देत होतो। 
पर उ तुमरो लक, कव्ह देहत, “अरे अन्याय को काम करन वालो, मी तुम्ही ला नही जानासू तुम्ही कोन सेव? तुमी मोरी नजर लक हट जाओ!” 
जबा तुमी ही अबराहम इसहाक याकूब अखीन, सबा भविस्यवक्ता गीनला, परमेस्वर को राज मा चोवने, पर अपरो आप ला उन लक बेगरो चोयके तुम्हि रोवने अखीन पस्तावा करने । 
दिन उगती, दिन बुड़ती, उत्तर अखीन दक्सिन का लोक गीन आहेत अखीन, परमेस्वर को राज मा मोठोयो, जेवनार मा जेवन करयेत। 
चोवो जोन मघा सेत, उ पुढा भई जाहेत। अखीन जो पुढा सेत, उ मंघा भई जाहेत। 
वोच बेरा मा काही मोसे को नियम को गुरू जी गीन, आयके सांगन लगीन, हे गुरूजी तुम्ही यहान लक, बिदाई लेलो काहेका, राजा हेरोदेस तुमी, ला मार डाखनो चाव्हासे। 
यीसु ना उनला कव्हयो, जाके ना उ कोल्हिया ला कव्हने, मी आज काल अखीन परो, बुरो आतमा गीन ला हेड़ासू, अखीन रोगी गीनला साजरो करासू, अखीन परो को दिवस मोरो काम पूरो भई जाहेत। 
आज काल अखीन परो को दिवस मोला चलनो से, काहेका यो नही होय सकासे, का कोनी परमेस्वर को भविस्यवक्ता येरुसलेम तीरथ लक, बाहेर मारो जाहेत। 
यो येरुसलेम नगर तु भविस्यवक्ता गीनको हत्‍या करासे अखीन तोरो कना, जोन परमेस्वर को गोस्टी आना सेत, वोला गोटा लक मार डाकासेत, मीना कितरो बार चाहयोसेव, का तोरो सन्तान गीनला, इक्कठो करू, जसो कुकडी आपरो बच्चा गीन, ला पंखा को खाल्या, लुकाय लेवासे असोच सबा ला, लुकाय लेऊ, पर तु ना मोरो एक नही चलन दियो। 
अता तुम्हारो घर तोरो लय, छोड़ दियो जाहेत। मी तुमी लक खरो सांगासू, तुम्हि मोला जबा तकन नही चोवने, तबा तकन तुम्हि आवन वारो बेरा मा असो नही सागंने, का धन्य से उ जोन पिरभू को नाव लक आवासे। 
