﻿Mark.
15.
Jingteng ma a thiempu kolok ngaining upa ngai, Dan Oja ngai, khan upa rupngai ankholo a kinrangtak a ankintup a khan chong anleimintuk. Anmani ning Jesu kha thirrui a ankhit a anleiroi, khan Pilate kutchunga anleipe. 
Pilate ning chong aleirakal, <<Nang Jehudi ngai Reng mo ni-e?>> Jesu ning aleimasang, <<Nangning niti kha e je.>> 
Thiempu kolok ngaining Jesu kha akikhella anleirilset, 
khawa jarra Pilate ning Jesu deng aleirakal nok, <<Nang namasanglei sik mo ni-e? Rangairo anmani rikip ning nuchunga anirilset hi!>> 
Jesu ning chongbai khat num leimasang nokmak, khawa jarra Pilate ning aleingak. 
Rakan Reikahoi anthoracham ansurra anda ngai karra mipui anmanomna miring inkhat kha Pilate ning aleimoso pe chak. 
Khawa lai khan Barabbas anti raalruk ngaile mikathat miring inkhat mikhumna a anlei om. 
Mipui ngai kha anhong kintup a aleitho ang a athonoknasik Pilate deng anhongti, 
Pilate ning anmanideng aleirakal, <<Jehudi ngai Rengpa kha kunumoso pe sik nin monom mi?>> 
Thiempu kolok ngaining Jesu chunga thangse annei jarra akut chunga anhei pesuok e ti kha Pilate ning aleijet. 
Takkha thiempu kolok ngaining mipui ngai kha anleimathok a, Barabbas pot kha moso nasik a anlei minti. 
Pilate ning mipui deng aleirilnok, <<khachu nangni ning Jehudi ngai Reng tia ninkoi padeng kei angmo ninimintho nom?>> 
Anmani ning anhei ong malet a, <<Cross a makhai ro!>> anti. 
Takkha Pilate ning aleirakal, <<Angsik jarra, amaning ang thothel namo anei e?>> Anmani ning akikhella an-onga anleiti, <<Cross a makhai ro!>> 
Pilate ning mipui mulungkha aleimintai nom jarra Barabbas kha anmani sik a aleimoso pe jei. Khan Jesu kha anrachak a cross a makhai sik a aleipe jei. 
Raalmi ngaining Jesu kha Ramkoron pa inn tollai sunga ankei minlut a khan raalmi rikip anlei kinkoichun. 
Anmani ning pon sendup akinchuol kha Jesu anleiminsil, liling ria anbol lukhu, kha alu chunga anleiminkhu. 
Khan anmani ngaining <<Jehudi Rengpa niringsei sot rase!>> tia chibei anleitho. 
Anmani ngaining Jesu lukha luchei ning anleirachak, anleimichilthon, khan ankemorkhup anthep a ankinkun a anleikumuk. 
Anmani ning anmunuipui soli, pon sendup akinchuol kha anlik pe a, khan ama pon kha anminsil malet je. Khan cross a makhai thatsik a ankei so je. 
Lampui-a anmani ning mi inkhat ariming Simon anti aram ria khopui a akahong anlei kintonga, khan raalmi ngaining amakha namrop a Jesu cross kha anlei mindom. Simon kha Cyrene mi e khana Alexander le Rufus ngai pa e. 
Anmani ning Jesu kha Golgotha, hiwa tina chu <<Lusai mun>> antina khan anroi je. 
Khana khan theiburju le lei anminchun kha myrrh anti kha min innasik anleitho, tak Jesu khawa kha lei in mak. 
Khan Jesu kha cross a anmakhai a ama ponder kha anmani ning anleikinsem, atu ningmo pon kinlek kha anpha sik tia machal anlei-en. 
Cross a anmakhai kha jingteng pung ko a-e. 
Ama cross chung a engset chonga hi-anghin anleitar: <<JEHUDI NGAI RENGPA.>> 
Ama le kinroi-a muruk inni, inkhat achangteng, inkhat awoiteng cross a anmakhai del. 
Mi akase akahong ngaining anlu ankalek a chong ero a Jesu deng anleiril: <<O-a! Bek-inn nithet li nithum sunga kasak sik niti khale! 
Atun cross chung ria hong chum inlang, nibinga kinhuk rang ro!>> 
Khawa angkhan thiempu kolok ngai le Dan oja ngai ning Jesu anmunui so-a, inkhat le inkhat ankinbek a, <<Amaning milak chu ahuk a, abinga chu kinhuk tor mak! 
Messiah Israel ngai Rengpa, cross chung ria atun hongchum ro, khan nahongchum kha kinmuli keini ning nataksen kinte!>> Khan cross a ama le anmakhai bung inni ngai khaning num ama anlei ril set. 
Sunchimma ram pumpui akijing ning aleimukhu, khawakha pung inthum kutung kha-angkhan aleiti je. 
Pung inthum a Jesu rasa kinlaktak a-onga, <<Eloi, Eloi, lema sabachthani?>> ati, hiwa tina chu, <<Ka Pathien, ka Pathien angsikmo kei nana dadoi e?>> 
Khana akaom mi alek ngaining anjet a anti, <<Rangai ru, amaning Elijah akoi hi!>> 
Ankarra mi inkhat ataanna ponlom kha theiburju kuthur kha amiche-a luchei inkhat mor a akithil a, khana ria Jesu ner katung amajop nasik apeli aleiti, <<Ngaakdiri! Elijah ahonga ama cross ria akadom mata sik mi, enri!>> 
Khana rasa kinringa a-onga Jesu kha athi jei. 
Bek-inna andong pon kha achung ria athoi kutung aher inni a akin ther je. 
Khawa mun a cross mudon akingir raalmi lamkakei inkhat ning Jesu thidan kha aleimu. Amaning aleiti, <<Akidiktak a hiwa mipa hi Pathien Sapa e!>> 
Akalakdet ria alei ka-en numei alek anlei om. Ankarra khan Mary Magdalene, anaipa James le Joseph annu Mary, khana Salome ngai an e. 
Anmani ning Jesu kha Galilee a aomlai anleijui khan anleisen. Khawa munna khan Jerusalem a ama le anhei kinroi numei katamtak num anlei om. 
Arimathea a Joseph ahong tung kha kholei teng a-e je. Amakha Pathien Rengram ahongtung sik alei kangaak, kaja ka-om upa rup karra inkhat e. Khawa kini kha kinrinni e (ti chu, Jehudi ngai Serni kini makma) khana Joseph ning kin-ngam tak a Pilate maikunga awase-a amadeng Jesu kulong kha aleini. 
Pilate ning Jesu athi jei ti aleijet phakhan aleingak. Raalmi lamkakeipa kha akoi-a Jesu thina asot mije tia alei rakal. 
Raalmi lamkakeipa chong ajet so-a, Pilate ning Joseph deng Jesu kulong kha naleithei sik aleitipe. 
Joseph ning ruipon kinnem neng arocho-a, akulong kha akadamthak a pon khaning akusun a lunga ankiwit thaan sunga aware jei. Khana lung kolok inkhat aminlet a thaan inkhar suokna kha aleikhar. 
Mary Magdalene le Joseph nu Mary ning Jesu kulong anrena kha anleimu je. 
