﻿PANTHAANTSI.
51.
¡Pawá! Awiroka nisironka-taniri, pinkaminthaajina. Kaminthaan-taniri pinatzii, pimpyaako-tajinaro nokinakaasitani. 
Piwashaanta-kainaro nantakiro kaari kamiitha-tatsiri. Pinkimi-takairo pishita-jinaromi nokaaripirotaki. 
Noyotzi oshiki nopiyatha-waitakami. Ti onkanti nomaisantiro nokaaripirotaki. 
Apatziro nokaaripiro-tzimo-takimi awiroka. Nantasi-takaro okaratzi pipinka-kaanari. Tima onkarati pinkantajiri awiroka, tampatzika onkantyaa, Kitisiriri pinatzii awiroka pimatan-tarori pikisawintanta. 
Kaari-pirori nokantaka, nasi nowiro owakira notzimaki. Tima omotyaa-takina asitanari tsika yantayi-taitziro kaari kamiithatatsini. 
Pinisironkatari awiroka kaari amatawi-tanta-tsini kapichiini. Pikanta-kaakaro awiroka noyotani-siri-tajyaa. 
Pinkimi-takajyaana pinkaatan-tajyaa-naromi kaasi-rontsi, airo noipatsi-siri-waitanta. Pisiyakairo pinkiwa-jinaromi nañaa-minto, kitii onkantajyaa osiyaaro sharaka. 
Pinkanta-kaiyaaro nonkimajiro tsika inkimo-siri-taiti, aajatzi tsika intharowintaityaa. Piwiriinta-poroki-tajina piwatsi-naawai-takina. 
Pinkimi-takaan-tairo pintzikaa-pitha-jiityaaromi noyaaripironka airo piñaantaaro, Pinkimi-takaantiro pishi-pitha-tajinaromi okaratzi owaaripiro-takinari. 
¡Pawá! Piiti-siri-tajina. Pisiyakaantiro piwakira-tajinaromi nosiri, tampatzika-siri nonkantajyaa. 
Airo pookana. Airo paapitha-tanaro kitikiri pitasorinka. 
Papiitajiro panintaa-kaiyaana pikimitajiro owakira piwawisaa-kotaana. Piwasi-tapii-tanta-jyaanaro iroopirori pitasorinka. 
Irootaki noyomitaan-tajyaariri ikaratzi kisimawai-tzimiri ikimisantajimi, Impiyasi-tajimi ikaratzi kaaripiro-witain-chari. 
¡Ñaamisa Pawá, owawisaa-kotaanarí! Pimpyaako-tajinaro nowakantaki. Kamini-waanti nompanthaa-wintajimi awiroka pitampatzika-siri-tzira. 
¡Pawá! Piwinthachiratakaina. Pinkatha-waanti nonkantajyaa nompanthaa-wintajimi. 
Tima ti onimotajimi namasi-waityaamiri nompomitiri natsipi-takaani. Ti pinintajiri okatziyainkati iyachaaryiinka nopomita-siwai-tamiri. 
Iro pininta-piro-tajiri awiroka Pawa piñiina onkatsi-tzimo-siri-tajina okaratzi nantzimo-tzimiri. Tima inkarati ikimita-kaantaitari iriipirori yatsipi-takaitani ipomitai-tziniriri Pawa, iriitaki atziri okatsitzimo-siri-tziri iyaari-pironka. 
Pinkimi-takaantiro paakamiitha-tairimi Kisakowintoni-satzi, pinisironka-tairi. Pisiyakaantiro papiita-jiromi pimpiriintairo otanto-payi Aapatyaawini. 
Ari inimota-jimiri ipomitai-tziri yatsipi-takaitani kamiitha-piro-tatsiri, Iriitaki mapirotaironi onkatziyainkati iyachaaryiinka impomitai-timiri, maaroni ikaratzi yasitakai-tamiri ipomitai-tziri. Aritaki impomitai-tajimiri ipiraitari pomitai-rontsiki. 
