﻿PANTHAANTSI.
22.
¡Pawá! ¡Pawá! ¿Paitama pookantanakanari? ¿Paita kaari pipokanta piwawisaa-kotajina? ¿Paita kaari pikimantana nasinonkaa-waita? 
¡Pawá! Nokaima-witami kitaitiri, titzimaita pakina. Nomawitakaro tsitini-paiti, titzimaita nisitakoti, 
Iro kantacha, tasorintsi pinatzii awiroka, Tima pisaiki awiroka tsika ipanthaa-jiitzi Israel-iiti. 
Awiroka yawintaaka pairani nowaisatziti-payi. Yawintaa-yitakami, pookakaa-winta-yitakiri awiroka. 
Ikowako-takimi pinkisa-wintyaari, pimatakiro pookakaa-winta-yitakiri awiroka. Yawintaa-yitakami awiroka, tikatsi owasiwintaa-waitairini. 
Tima atziri nonawitaka naaka, iro kantacha ikimita-kaita-kanari kinitsi. Oshiki imaninta-waitakina atziri-payi, ithainka-siri-waitakina. 
Isironta-winta-waitakana ikaratzi ñaayitanari, Ithainka-mawai-taitakina, itikaina-waita, ikanta-wakaa-jiitaka: 
“Piñaa-matsitiri awintaariri Pawa. Añaawakiri aririka yamitako-tairi. Tima inkanta-wakaa-jiitajaa oshiki inisironkatari, añaawakiri aririka iwawisaa-kotairi.” 
Tima awiroka kantakaakaro notziman-takari imotyaa-taitakina. Awiroka kantakaakaro nawintaan-tamiri ainiro nothotziro owaaki othomi asitanari. 
Awiroka asitakanari tikira-mintha nontzimiita. Ainiro nosaiki omotyaaki asitanari, awiroka Nowawani. 
Airo pisaika-pithatana intaina, tima okaakitaki nonkimaatsi-waityaa. Tikatsi kisakowintyaanani. 
Tima ithonka itzikakina kisaniintanari, ikimitakari ipiyojiita ipiraitari, Isiyakari iyatsimanka poñaachari Kithoki-jaariki, ithonka ishonkasijii-takina. 
Paraanka ikantajiitaka ikaratzi kisaniintanari, Ikimitakari kashikari iwari iwathatsiti, iraikithanthaiki. 
Tima nokimitakaro naaka nijaa isakoitziri, Tima ithonka okithoryaa-yitaki notonki. Okimiwai-takaro nasankani owyaata-tyiiyaa, tima ithonka owyaataka inthompointa. 
Tima piryaa-kintsi nokantaka, osiyawai-takaro opiryaa-pitokitzi kowitzi. Otsirikaka nonini nopanti-waantiki. Tima pookakina tsika opiryaa-panitzi kipatsi nonkami. 
Tima ikimitakari otsitzi ipiyo-winta-jiitakana kaari-pirori, ithonka ishonka-paakina. Imorontawai-takina nakoki aajatzi noitziki. 
Oyosiita-sitaka nomisina, koñaa-porokitaki notonki. Oshiki yamina-mintha-takina kisaniintanari. 
Ipawakaakaro nomanthaki. Iñaariwintakaro noithaari. 
¡Irooma awiroka Pawa, airo pookana! Awiroka sintsi-takaa-janari. Pimpoki sintziini pinkisa-winta-jyaana. 
